“Матниёз Охун” қабристони ободонлаштирилди

Ўтган давр мобайнида Президентимиз ва ҳукуматимиз томонидан диний бағрикенгликни таъминлаш, диний урф-одатларни ҳурмат қилиш, айниқса муқаддас қадамжолар, зиёратгоҳлар, масжидлар ва қабристонларни янада обод қилиш борасида улкан ишлар амалга оширилмоқда. Шунингдек, ушбу соҳадаги ишларни ривожлантириш ва фаолиятни тартибга солувчи бир қатор қонун ҳужжатлари қабул қилинган бўлиб, улар доирасида кўплаб тизимли ишлар амалга оширилмоқда.

Амударё туманида ҳам муборак Рамазон ойи ҳамда “Наврўз” умуммиллий байрами олдидан аждодларимиз қўним топган муқаддас қадамжолар ва қабристонлар ободонлаштирилмоқда.

Жумладан, Амир Темур овулида жойлашган “Матниёз охун” қабристони ҳам ҳашар йўли билан ободонлаштирилди. Ободонлаштириш ишлари бир неча кун давомида уюшқоқлик билан ўтказилиб ушбу савобли ишга туман ободонлаштириш бошқармаси ишчилари, маҳалла имомлари ҳамда овул ҳудудида истиқомат қилувчи ёш-у қари  ўз ҳиссаларини қўшишди.

Аслида ободликка интилиш, поклик айниқса, қабристонларни озода сақлашга доимо эътибор қаратиш халқимизнинг минг йиллик қадриятларидан биридир.

Маълумот учун, қабристоннинг умумий ер майдони 10,7 гектарни ташкил қилади. Ҳашар давомида, ҳашарчилар томонидан 150 метрлик пахса деворлар кўтарилиб, йўлакларга тош ётқизилди. Зиёратчилар учун таҳоратхоналар таъмирланиб, пардозлаш ишлари олиб борилди.

 Шунингдек, дарахт ва буталар оқланиб, шакл берилди ҳамда, ортиқча шох-шаббалар, қуриб қолган ўт-ўланлар қабристон ташқарисига чиқариб ташланди. Ҳар бир қабр атрофи тозаланиб, айримлари таъмирланди.

Шу ўринда айтиш жоизки, мазкур қабристонга Амир Темур овулининг зиёли, обрўли инсонлари ва уларнинг аждодлари дафн этилган. Ўз даврида овулдаги маънавият ва маърифатга интилувчан инсонларга тўғри йўлни кўрсатган зиёлилар сулоласи вакили Матниёз охун бобонинг муборак қабрлари ҳам шу ерда жойлашган.

Ҳашар давомида Юсуф Эшон бобо жомеъ масжиди имом-хатиби Абдураҳмон Матсафоев халқимиз азал-азалдан бундай хайрли ишларни кўпчилик бўлиб, бамаслаҳат бажариб келганлигини, ўтганларни ёдга олиб, уларнинг руҳларини шод этиш – савоби улуғ амаллардан эканлигини, марҳумларнинг ҳоки поклари қўним топган масканларни обод қилиш ва уларнинг ҳақларига дуолар қилиш инсоний бурч эканлигини таъкидлади.

Бундан ташқари, ислом дини таълимотларига кўра, атроф-муҳитни кўкламзорлаштириш, унинг тозалигига, савобли ва эзгу ишларни адо этмоқликка, зиёратгоҳ-у қабристонларни обод қилишдек хайрли ишларга камарбаста бўлиш фарз эканлиги, бу каби ҳайрли ишлар кўпчиликка манфаатли бўлгани боис, савоби ҳам мислсизлиги ҳақида ибратли сўзларини сўзлади.

Дунёдан ўтган ота-боболари, яқинлари хотирасига ҳурмат кўрсатиш ҳар бир инсоннинг  зиммасидаги фарзандлик, қариндошлик, қолаверса, инсонийлик бурчидир. Буни яхши ангалаган фуқаролар ҳашар ишларида уюшқоқлик билан қатнашиб, зиёратгоҳлар ободлигига ўз ҳиссаларини қўшдилар.

Туман ҳокимлигининг Ахборот хизмати