АМУДАРЁЛИК АЁЛ-ҚИЗЛАРГА ҲУРМАТ-ЭҲТИРОМ КЎРСАТИЛДИ

Мамлакатимизда хотин-қизларнинг ижтимоий-сиёсий ва маънавий фаоллигини ошириш, уларнинг турли соҳа ва тармоқларда ўз қобилият ва имкониятларини рўёбга чиқариши учун шарт-шароит яратиш, ҳуқуқ ва қонуний манфаатларига сўзсиз риоя қилинишини таъминлаш, оналик ва болаликни ҳар томонлама қўллаб-қувватлаш, шунингдек, оила институтини мустаҳкамлаш борасида кенг кўламли ишлар амалга оширилмоқда.

Аёлларимизнинг жисмоний, маънавий ва интеллектуал салоҳиятини юксалтириш, уларнинг саломатлигини мустаҳкамлаш, ижтимоий муҳофазасини кучайтириш, оила, оналик ва болаликни ҳимоя қилиш, тадбиркор аёлларни қўллаб-қувватлаш мақсадида қатор ислоҳотлар амалга оширилмоқда. Ҳар йили 8 март санасининг алоҳида байрам сифатида мамлакат бўйлаб чинакам тантана қилиниши жамиятимизда аёлларга бўлган эътиборнинг нечоғлик юксак эканлигини ифодалайди.

Жорий қилнинг 5 март санасида 8 март – Халқаро хотин-қизлар кунига бағишлаб Қиличбой маданият маркази биносида туман маданият бўлими томонидан ташкиллаштирилган амударёлик азиз ва мўътабар аёлларни шарафловчи “Муқаддас Аёл” деб номланган адабий-мусиқий байрам тадбирида ҳам фидойи ва меҳнаткаш, мунис ва меҳрибон аёл-қизларга ҳурмат-эҳтиром кўрсатилди.

Юртимизда уйғониш, янгиланиш ва яшнаб-яшаришни тараннум этувчи “Баҳор вальси” куйи янграган лаҳзаларда тадбир меҳмонлари бўлган азиз ва муҳтарама онахонлар, гўзал опа-сингиллар чеҳрасида баҳорий қувончлар жилваланди. Туманимиздаги 38-, 40-сонли мактабларнинг рақс гуруҳлари раққосалари ижросидаги баҳор ва аёл гўзаллиги ҳамда буюк илоҳий қудратини ифода этувчи “Баҳор вальси” аёл зотини улуғловчи “Муқаддас Аёл” мусиқий садоларига уланиб кетди.

Тадбир бошловчилари оналик ва болаликни, аёл латофати ва назокати, меҳр-у муҳаббатини ўзида мужассам этган дилбар шеърларни ўқиб, аёлларга чуқур эҳтиром кўрсатдилар.

Шунингдек, тадбир давомида туман маданият бўлими санъаткорлари томонидан тайёрланган концерт дастури намойиш этилиб, она, баҳор, дўстлик ва тинчликни тараннум этувчи куй ва қўшиқлар янгради. Концерт дастури давомида 38-, 40-сонли, 83- ва 47-, 15-сонли умумтаълим мактабларининг рақс гуруҳлари жамоалари ўзларининг дилбар рақслари билан тадбир иштирокчиларига баҳорий кайфият улашдилар.

 Айниқса, 4-сонли мактабгача таълим ташкилоти тарбияланувчилари ҳамда 9-сонли болалар мусиқа ва санъат мактаби рақс жамоаларининг чиқишлари барчага манзур бўлди. Ижрочиларнинг ҳар бир чиқишида мўътабар ва мунис оналар, азиз ва муҳтарама Аёллар қадр-қиммати, меҳр-муҳаббати, оиладаги ва жамиятдаги бетакрор ўрни юксак пардаларда тараннум этилди.

“Муқаддас Аёл” тадбирида азиз Аёллар нафақат баҳорга қиёсланди, балки меҳри қуёшдай оламни чароғон этиб, бетимсол ҳарорат бахш этувчи, башарият қалбини нурлантириб тургувчи буюк хилқат сифатида қадрланди.

Тадбир якунида хушовоз хонанда Ғайратжон Янгибоев ижросидаги “Аёл” қўшиғига барча иштирокчилар жўр бўлдилар.

Рисолат ИБРАГИМОВА.