ФАРОВОН МАҲАЛЛАСИДА МАХСУС-ТАКТИК ЎҚУВ МАШҚИ ЎТКАЗИЛДИ

Амударё тумани Фавқулодда вазиятлар бўлими томонидан туман ҳокими – Фуқаро муҳофазаси бошлиғининг 2022 йил 17 январдаги тегишли буйруғига мувофиқ махсус-тактик ўқув машқи ташкил этилди.

Жорий йилнинг 2 март куни Фаровон маҳалласи ҳудудида “Маҳалла фуқаро муҳофазаси” йиғма гуруҳини яратиш ва фаолиятини ташкиллаштириш мақсадидаги ушбу ўқув машқи доирасида дастлаб ўқув-амалий семинар ўтказилди. Ўқув-амалий семинарга туман ҳокимлиги, Фавқулодда вазиятлар бўлими, Ўзбекистон Қизил ярим ой жамияти туман бўлими, Маҳалла ва оилани қўллаб-қувватлаш бўлими ҳамда фуқаролар йиғинлари ходимлари иштирок этишди.

Кўргазмали ўқув-семинарнинг назарий қисмини туман Фавқулодда вазиятлар бўлими ходими Бекзод Тажибоев олиб борди ҳамда “Маҳалла фуқаро муҳофазаси”нинг асосий вазифалари, функцияси, тузилма фаолиятини ташкил этиш, молиялаштириш ва моддий-техник таъминлаш тартиби тўғрисида маърузалар қилди.

Шунингдек, “Маҳалла фуқаро муҳофазаси” йиғма гуруҳларини асбоб-анжом, мол-мулк ва ҳимоя воситалари билан таъминлашни ташкил этиш ва гуруҳ аъзоларининг амалий кўникмаларини шакллантиришга қаратилган тартиб-қоидалари, биринчи тиббий ёрдам кўрсатиш, аҳолини фавқулодда вазиятлар, яъни зилзила, сел ва сув тошқини, ис гази ва бошқа заҳарли газлардан, овқатдан заҳарланиш, ёнғин, сувда чўкиш, қутуриш касаллиги ҳамда ҳудудларнинг радиоактив, кимёвий ва биологик зарарланиши билан боғлиқ фавқулодда вазиятлардан муҳофаза қилишга, тайёрлашга доир ҳаракатлар тўғрисида тушунчалар бериб ўтди.

Кўргазмали ўқув машқининг амалий қисмида “Маҳалла фуқаро муҳофазаси” йиғма гуруҳи шахсий таркибининг ҳолати ҳамда Фаровон маҳалла фуқаролар йиғини ҳудудида содир бўлиши мумкин бўлган фавқулодда вазиятлар инобатга олиниб, махсус-тактик ўқув машқи ўтказилди. Дастлаб туман Фавқулодда вазиятлар бўлимининг Қутқарув отряди ҳамда ҳудудий Фавқулодда вазиятлар давлат тузилмаси куч ва воситаларининг махсус техника, асбоб-анжомларини ишлатиш ва уларнинг тактик-техник тавсифлари бўйича тушунчалар берилди.

Фавқулодда вазиятлар давлат тузилмаси куч ва воситалари томонидан фавқулодда вазиятларни бартараф этиш бўйича амалий ҳаракатлар ўқув машқлари тарзида кўрсатиб берилди. Шунингдек, авария, ҳалокат, табиий офатлар, эпидемия хавфи юзага келганда ҳамда ҳарбий ҳаракатлар даврида юзага келиши мумкин бўлган фавқулодда вазиятлардан аҳоли ҳаёти ва соғлигини, моддий бойликларни муҳофаза қилишга қаратилган тадбирлар, бу жараёндаги ҳаракатлар амалда бажариб кўрилди.

Ушбу тадбирга Фаровон маҳалла фуқаролар йиғинида тузилган Фуқаро муҳофазаси тузилмасидан 11 нафар ходим жалб қилинди. Жами ўтказилган кўргазмали ўқув амалий семинари ва тактик-махсус ўқув машқига 37 нафар фуқаро ва 9 та махсус техника қатнашди.

Тадбир якунида барча ваколатли идоралар вакиллари билан ўқув машқи юзасидан фикрлар алмашилди ва келгусидаги вазифалар белгилаб олинди.

Б.Тажибоев, туман ФВБ бўлинма бошлиғи.