АСКАРЛАР ИМТИЁЗЛИ ТАВСИЯНОМА УЧУН ТЕСТ ТОПШИРДИ
Ҳарбий хизматни ўташ ҳар бир ўғлон учун муқаддас бурч ва ғурурдир. Бу йўналишда ватан ҳимоячиларига, жумладан муддатли ҳарбий хизматни ўтаётган аскарларга қатор имконият ва имтиёзлар яратилган. Муддатли ҳарбий хизматни ўтаётган ҳарбий хизматчиларга Ўзбекистон Республикаси олий таълим муассасаларига ўқишга кириш учун тавсияномалар бериш тартиби жорий қилингани ҳам шулар жумласидандир.
Амударё муҳандислик техникумида тумандаги Давлат хавфсизлик хизмати чегара қўшинларига қарашли ҳарбий қисмда муддатли ҳарбий хизмат бурчини ўтаётган йигитлар учун тест синовлари ўтказилди.
Тест жараёнлари Давлат тест марказининг Қорақалпоғистон Республикаси бўлими, Амударё тумани ҳокимлиги, Ёшлар ишлари агентлиги туман бўлими билан ҳамкорликда ташкил қилинди.
Муддатли ҳарбий хизматни ўтаётган ҳарбий хизматчиларга Ўзбекистон Республикаси олий таълим муассасаларига ўқишга кириш учун тавсияномалар бериш тартиби тўғрисидаги низомга мувофиқ тест жараёни адолатли ва шаффоф тазда ўтказилди.
Шу ўринда қайд этиш лозимки, тавсияномалар Ўзбекистон Республикаси Қуролли Кучлари сафида муддатли ҳарбий хизматни ўтаб бўлган, жанговар ва маънавий-маърифий тайёргарлик бўйича юксак натижаларга эришган, зарурий билим савиясига эга, намунали ҳарбий интизомини намоён этган энг муносиб ҳарбий хизматчиларга берилади.
Амударё муҳандислик техникуми биносида бўлиб ўтган мазкур тест синовида муддатли ҳарбий хизматчиларнинг жанговар, маънавий-маърифий тайёргарлик дастурларини ўзлаштирганлик даражаси, математика, физика фанлари бўйича билими, шунингдек, мантиқий фикрлаш қобилияти синовдан ўтказилди.
Келгусида аниқ мақсадларни олдига қўйган ўғлонлар берилган имкониятдан унумли фойдаланишга, бор билимини ишга солиб, берилган саволларга тўғри ва аниқ жавоб беришга ҳаракат қилишди.
Давлат тест марказининг Қорақалпоғистон Республикаси бўлими ходимлари тест жараёнига алоҳида масъулият ва жавобгарлик билан ёндашиб, замонавий видеокузатув мосламаларидан фойдаланган ҳолда имтиҳоннинг шаффоф ва ҳаққоний ўтишини кузатиб бордилар.
Яна бир жиҳат, имтиёзли тавсиянома беришда аскарларнинг ҳарбий хизмат мобайнида жанговар, маънавий-маърифий тайёргарлик фанларидан олган баҳолари, ҳизматда эришган ютуқлари, намунали ҳулқи, вазифаларни ало даражада бажарганлиги ҳам эътиборга олинади.
Ўзбекистон Республикаси Қуролли Кучлари сафида муддатли ҳарбий хизматни ўтаб, тавсияномага эга бўлган фуқаролар республиканинг олий ҳарбий таълим муассасаларидаги тегишли таълим йўналишларига ўқишга киришда тест синовлари натижаларига кўра ўзлари тўплаган балларининг 50 фоизи миқдорида қўшимча балл шаклидаги имтиёзга эга бўладилар. Қолаверса, олий ҳарбий таълим муассасаларидан ташқари республиканинг барча олий таълим муассасалари бакалавриатура йўналишларига ўқишга кириш учун қабул параметрларидан ташқари ажратиладиган алоҳида қабул кўрсаткичлари доирасида танловда иштирок этиш ҳуқуқига эга бўладилар.
Қуроли Кучларимиз сафида хизмат қилаётган ҳар бир ўғлон бизнинг фахримиз ва ғуруримиздир. Ўз йигитлик бурчини ўтаб, олий таълим муассасаларида ўқишни давом эттираётган ёшлар эса юрт тараққиёти ва халқ фаровонлигига янада кўпроқ ҳисса қўшиши шубҳасиз.
Фотима Эшимбетова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
