Ҳарбий хизматчилар ОТМга йўлланма берувчи имтиёзли тавсияномалар олиш учун тест топширди

Бугунги кунда Ўзбекистон Қуролли Кучлари сафида хизмат қилиш нафақат конституцион бурч, балки жисмоний ва маънавий чиниқиш мактаби, қолаверса, келажак учун катта имкониятлар эшигига айланди. Шу кунларда мамлакатимиздаги барча ҳарбий қисмларда, хусусан, Давлат хавфсизлик хизмати Чегара қўшинларига қарашли бўлинмаларда Ватан олдидаги йигитлик бурчини шараф билан ўтаб, фуқаролик ҳаётига қайтишга ҳозирлик кўраётган мард ўғлонлар учун ҳаяжонли дамлар бошланди. Улар йил давомида эгаллаган билимларини якуний баҳолаш ҳамда келгусида олий таълим муассасаларига имтиёзли кириш ҳуқуқини берувчи тавсияномаларни қўлга киритиш мақсадида муҳим тест синовларини топширмоқдалар.

Таъкидлаш жоизки, давлатимиз раҳбари томонидан ёшларга қаратилаётган эътибор ва ғамхўрлик натижасида армия ва таълим ўртасида мустаҳкам кўприк яратилди. Бу борада Ўзбекистон Республикаси Мудофаа, Ички ишлар, Фавқулодда вазиятлар вазирликлари ҳамда Давлат хавфсизлик хизмати ва Миллий гвардиянинг 2019 йил 30 декабрдаги қўшма қарори муҳим ҳуқуқий асос бўлиб хизмат қилмоқда. Мазкур ҳужжат билан тасдиқланган Низомга кўра, муддатли ҳарбий хизматни ўтаётган, жанговар ва маънавий-маърифий тайёргарлик бўйича юксак натижаларга эришган, зарурий билимга эга бўлган ва энг муҳими, намунали ҳарбий интизоми билан сафдошларига ўрнак бўлган энг муносиб ҳарбий хизматчиларга ҳарбий қисм қўмондонлигининг имтиёзли тавсияномаси берилиши белгиланган. Мазкур синовлар ана шундай шарафли ва масъулиятли танловнинг якуний босқичидир.

Давлат хавфсизлик хизмати Чегара қўшинларига қарашди Амударё туманидаги ҳарбий қисмларидан бирида ташкил этилган синов жараёнлари ҳам юқори савияда, шаффофлик ва одиллик мезонлари асосида ўтказилди. Бу шунчаки бир кунлик имтиҳон эмас, балки аскарнинг йил давомида ўз устида қандай ишлагани, жанговар ва маънавий-маърифий тайёргарлик машғулотларида олган баҳолари, хизматда эришган ютуқлари ҳамда командирлар томонидан берилган вазифаларни қанчалик виждонан бажарганига бериладиган холис баҳодир. Шу боис, тест синовларига кирган ҳар бир ҳарбий хизматчининг кўзида қатъият ва билимга бўлган ишончни кўриш мумкин.

Синовларнинг тузилиши ҳам аскарларнинг ҳар томонлама салоҳиятини текширишга қаратилган. Тест саволлари жами 100 та бўлиб, улар аскарнинг турли йўналишлардаги билимини қамраб олади. Хусусан, саволларнинг 40 таси бевосита жанговар тайёргарликка, 20 таси маънавий-маърифий билимларга, 10 таси математика, 10 таси физика ҳамда қолган 20 таси мантиқий фикрлашни аниқлашга йўналтирилган.

Баҳолаш тизими ҳам ўзига хос тартибда ишлаб чиқилган: жанговар тайёргарлик бўйича ҳар бир тўғри жавобга 1,2 балл, маънавий-маърифий тайёргарлик учун 1,1 балл, қолган йўналишлар учун эса 1 баллдан ҳисобланади. Бундан кўриниб турибдики, замонавий аскар нафақат жисмонан бақувват, балки юксак интеллектуал салоҳиятга ҳам эга бўлиши талаб этилади. Тест синовларини ечиш учун номзодларга умумий 3 соат вақт ажратилган бўлиб, бу муддат уларнинг ўз билимларини тўлиқ намоён этишлари учун етарли имкониятдир.

Юқоридаги қўшма қарорга мувофиқ, тавсияномани қўлга киритган йигитлар республиканинг олий ҳарбий таълим муассасаларига ўқишга киришда тест синовларида тўплаган балларининг 50 фоизи миқдорида қўшимча балл шаклидаги имтиёзга эга бўладилар. Бундан ташқари, бошқа олий таълим муассасалари бакалавриатига ҳужжат топширганларида, улар учун умумий қабул параметрларидан ташқари ажратиладиган алоҳида квоталар доирасида танловда иштирок этиш ҳуқуқи берилади. Яна бир муҳим жиҳат шундаки, ҳарбий қисмлар қўмондонлиги томонидан берилган ушбу тавсияномалар берилган санадан бошлаб уч йил мобайнида ўз кучини йўқотмайди.

Ушбу имтиҳонлар нафақат энг сара аскарларни аниқлаш, балки эртанги куннинг малакали кадрларини кашф этиш учун ҳам муҳим синов вазифасини ўтайди.