Harbiy xizmatchilar OTMga yoʻllanma beruvchi imtiyozli tavsiyanomalar olish uchun test topshirdi

Bugungi kunda Oʻzbekiston Qurolli Kuchlari safida xizmat qilish nafaqat konstitutsion burch, balki jismoniy va maʼnaviy chiniqish maktabi, qolaversa, kelajak uchun katta imkoniyatlar eshigiga aylandi. Shu kunlarda mamlakatimizdagi barcha harbiy qismlarda, xususan, Davlat xavfsizlik xizmati Chegara qoʻshinlariga qarashli boʻlinmalarda Vatan oldidagi yigitlik burchini sharaf bilan oʻtab, fuqarolik hayotiga qaytishga hozirlik koʻrayotgan mard oʻgʻlonlar uchun hayajonli damlar boshlandi. Ular yil davomida egallagan bilimlarini yakuniy baholash hamda kelgusida oliy taʼlim muassasalariga imtiyozli kirish huquqini beruvchi tavsiyanomalarni qoʻlga kiritish maqsadida muhim test sinovlarini topshirmoqdalar.

Taʼkidlash joizki, davlatimiz rahbari tomonidan yoshlarga qaratilayotgan eʼtibor va gʻamxoʻrlik natijasida armiya va taʼlim oʻrtasida mustahkam koʻprik yaratildi. Bu borada Oʻzbekiston Respublikasi Mudofaa, Ichki ishlar, Favqulodda vaziyatlar vazirliklari hamda Davlat xavfsizlik xizmati va Milliy gvardiyaning 2019-yil 30-dekabrdagi qoʻshma qarori muhim huquqiy asos boʻlib xizmat qilmoqda. Mazkur hujjat bilan tasdiqlangan Nizomga koʻra, muddatli harbiy xizmatni oʻtayotgan, jangovar va maʼnaviy-maʼrifiy tayyorgarlik boʻyicha yuksak natijalarga erishgan, zaruriy bilimga ega boʻlgan va eng muhimi, namunali harbiy intizomi bilan safdoshlariga oʻrnak boʻlgan eng munosib harbiy xizmatchilarga harbiy qism qoʻmondonligining imtiyozli tavsiyanomasi berilishi belgilangan. Mazkur sinovlar ana shunday sharafli va masʼuliyatli tanlovning yakuniy bosqichidir.

Davlat xavfsizlik xizmati Chegara qoʻshinlariga qarashdi Amudaryo tumanidagi harbiy qismlaridan birida tashkil etilgan sinov jarayonlari ham yuqori saviyada, shaffoflik va odillik mezonlari asosida oʻtkazildi. Bu shunchaki bir kunlik imtihon emas, balki askarning yil davomida oʻz ustida qanday ishlagani, jangovar va maʼnaviy-maʼrifiy tayyorgarlik mashgʻulotlarida olgan baholari, xizmatda erishgan yutuqlari hamda komandirlar tomonidan berilgan vazifalarni qanchalik vijdonan bajarganiga beriladigan xolis bahodir. Shu bois, test sinovlariga kirgan har bir harbiy xizmatchining koʻzida qatʼiyat va bilimga boʻlgan ishonchni koʻrish mumkin.

Sinovlarning tuzilishi ham askarlarning har tomonlama salohiyatini tekshirishga qaratilgan. Test savollari jami 100 ta boʻlib, ular askarning turli yoʻnalishlardagi bilimini qamrab oladi. Xususan, savollarning 40 tasi bevosita jangovar tayyorgarlikka, 20 tasi maʼnaviy-maʼrifiy bilimlarga, 10 tasi matematika, 10 tasi fizika hamda qolgan 20 tasi mantiqiy fikrlashni aniqlashga yoʻnaltirilgan.

Baholash tizimi ham oʻziga xos tartibda ishlab chiqilgan: jangovar tayyorgarlik boʻyicha har bir toʻgʻri javobga 1,2 ball, maʼnaviy-maʼrifiy tayyorgarlik uchun 1,1 ball, qolgan yoʻnalishlar uchun esa 1 balldan hisoblanadi. Bundan koʻrinib turibdiki, zamonaviy askar nafaqat jismonan baquvvat, balki yuksak intellektual salohiyatga ham ega boʻlishi talab etiladi. Test sinovlarini yechish uchun nomzodlarga umumiy 3 soat vaqt ajratilgan boʻlib, bu muddat ularning oʻz bilimlarini toʻliq namoyon etishlari uchun yetarli imkoniyatdir.

Yuqoridagi qoʻshma qarorga muvofiq, tavsiyanomani qoʻlga kiritgan yigitlar respublikaning oliy harbiy taʼlim muassasalariga oʻqishga kirishda test sinovlarida toʻplagan ballarining 50 foizi miqdorida qoʻshimcha ball shaklidagi imtiyozga ega boʻladilar. Bundan tashqari, boshqa oliy taʼlim muassasalari bakalavriatiga hujjat topshirganlarida, ular uchun umumiy qabul parametrlaridan tashqari ajratiladigan alohida kvotalar doirasida tanlovda ishtirok etish huquqi beriladi. Yana bir muhim jihat shundaki, harbiy qismlar qoʻmondonligi tomonidan berilgan ushbu tavsiyanomalar berilgan sanadan boshlab uch yil mobaynida oʻz kuchini yoʻqotmaydi.

Ushbu imtihonlar nafaqat eng sara askarlarni aniqlash, balki ertangi kunning malakali kadrlarini kashf etish uchun ham muhim sinov vazifasini oʻtaydi.