ЎРТА ТИББИЁТ МУТАХАССИСЛАРИ УЧУН ЎЗ-ЎЗИНИ БАНД ҚИЛИШНИ ТАШКИЛЛАШТИРИШ БЎЙИЧА СЕМИНАР МАШҒУЛОТЛАРИ ЎТКАЗИЛДИ

Президентимиз томонидан қабул қилинаётган ҳар бир Қарор ва Фармонлар замирида инсон ва унинг қадр-қиммати, соғлиғи ва фаровон ҳаёти биринчи даражада туради. Давлатимиз раҳбарининг 2021 йил 5 май куни қабул қилинган “Соғлиқни сақлаш тизимида олиб борилаётган ислоҳотларни изчил давом эттириш ва тиббиёт ходимларининг салоҳиятини ошириш учун зарур шарт-шароитлар яратиш тўғрисида”ги Фармони ҳам юртимизда аҳолига кўрсатиладиган тиббий хизмат сифатини ва қамровини кенгайтиришга қаратилганлиги билан аҳамиятли.

Амударё туманида ушбу Фармонда белгиланган вазифалар ижросини таъминлаш ҳамда ўрта тиббиёт мутахассислигига эга бўлган фуқароларга ўз-ўзининг бандлигини таъминлаш бўйича йўл-йўриқлар кўрсатиш юзасидан семинар машғулоти ўтказилди.

1 февраль куни туман Маданият бўлимида ўтказилган ушбу семинар машғулотида Қорақалпоғистон Республикаси Соғлиқни сақлаш вазири ўринбосари Акмал Асқаров, Нукус Тиббиёт билим юрти ўқитувчиси Жадра Қадирбоева, Нукус шаҳар Тиббиёт бирлашмаси физиотерапия бўлими мудири Роза Қурбонбоева, туман прокурори Жавлонбек Муфтуллаев, Тиббиёт бирлашмаси бошлиғи Фахриддин Абдуллаев, туман Тиббиёт бирлашмаси бош ҳамшираси ва вақтинча ишсиз бўлган ўрта тиббиёт мутахассислари иштирок этдилар.

Сўзга чиққан масъуллар Фармонга кўра 2021 йил 1 июлдан бошлаб ҳамширалик иши ўзини ўзи банд қилган шахслар шуғулланиши мумкин бўлган фаолият турлари рўйхатига киритилгани, уларнинг ушбу хизматлар билан малакаларини ошириб борган ҳолда шуғулланишлари белгиланганини таъкидлашди. Бу эса ўз навбатида ўрта тиббиёт ходимларининг бандлигини таъминлаш билан бир қаторда сон жиҳатдан ўсаётган аҳолимизнинг тиббий хизматга бўлган эҳтиёжини таъминлашда, ҳар бир инсон тиббиёт ходими назоратида бўлишига хизмат қилиши билан муҳим аҳамият касб этишини алоҳида эътироф этишди.

Таъкидланганидек, давлат тиббиёт муассасалари билан бир қаторда нодавлат тиббиёт ташкилотлари фаолиятини йўлга қўйиш ва уларга янги имкониятлар яратиш масаласи Фармонда ўз аксини топган. Унга кўра 2021 йил 1 июлдан бошлаб нодавлат тиббиёт ташкилотларига махсус автотранспорт воситасида ташкил этиладиган “мобиль тиббиёт” хизмати ёрдамида жойига чиққан ҳолда аҳолига тиббий хизмат кўрсатиш, нодавлат тиббиёт ташкилотининг ўрта тиббиёт ходимларидан иборат “тиббий пункт”ларини ташкил этишга рухсат берилди.

Семинар машғулоти давомида вақтинча ишсиз бўлган ўрта тиббиёт ходимларини ўз-ўзини банд қилиш бўйича Фармонда белгилаб берилган чора-тадбирлар, кредит ва субсидия олиш тартиби, иш стажи юритилиши, ишлаш механизми тушунтириб ўтилди.

Ундан ташқари, Нукус шаҳар Тиббиёт бирлашмаси физиотерапия бўлими мудири Роза Қурбонбоева физиотерапия жиҳозларини харид қилиш, уларни ишлатиш бўйича батафсил маълумотлар берди. Нукус Тиббиёт билим юрти ўқитувчиси Жадра Қадирбоева эса кўп йиллар давомида ишсиз бўлган тиббий ходимларининг малакасини ошириш, дипломларини қайта тиклаш бўйича ҳуқуқий тушунчалар бериб ўтди. Шу билан бир қаторда малака ошириш истагида бўлган тиббиёт ходимлари рўйхати шакллантирилди.

Семинар машғулоти иштирокчилари масъулларга ўзларини қизиқтирган саволлар билан мурожаат қилиб, тўлиқ жавоблар олдилар.

Л.Янгибоева, туман Тиббиёт бирлашмаси бош ҳамшираси.