OʻRTA TIBBIYoT MUTAXASSISLARI UChUN OʻZ-OʻZINI BAND QILIShNI TAShKILLAShTIRISh BOʻYIChA SEMINAR MAShGʻULOTLARI OʻTKAZILDI

Prezidentimiz tomonidan qabul qilinayotgan har bir Qaror va Farmonlar zamirida inson va uning qadr-qimmati, sogʻligʻi va farovon hayoti birinchi darajada turadi. Davlatimiz rahbarining 2021-yil 5-may kuni qabul qilingan “Sogʻliqni saqlash tizimida olib borilayotgan islohotlarni izchil davom ettirish va tibbiyot xodimlarining salohiyatini oshirish uchun zarur shart-sharoitlar yaratish toʻgʻrisida”gi Farmoni ham yurtimizda aholiga koʻrsatiladigan tibbiy xizmat sifatini va qamrovini kengaytirishga qaratilganligi bilan ahamiyatli.

Amudaryo tumanida ushbu Farmonda belgilangan vazifalar ijrosini taʼminlash hamda oʻrta tibbiyot mutaxassisligiga ega boʻlgan fuqarolarga oʻz-oʻzining bandligini taʼminlash boʻyicha yoʻl-yoʻriqlar koʻrsatish yuzasidan seminar mashgʻuloti oʻtkazildi.

1-fevral kuni tuman Madaniyat boʻlimida oʻtkazilgan ushbu seminar mashgʻulotida Qoraqalpogʻiston Respublikasi Sogʻliqni saqlash vaziri oʻrinbosari Akmal Asqarov, Nukus Tibbiyot bilim yurti oʻqituvchisi Jadra Qadirboyeva, Nukus shahar Tibbiyot birlashmasi fizioterapiya boʻlimi mudiri Roza Qurbonboyeva, tuman prokurori Javlonbek Muftullayev, Tibbiyot birlashmasi boshligʻi Faxriddin Abdullayev, tuman Tibbiyot birlashmasi bosh hamshirasi va vaqtincha ishsiz boʻlgan oʻrta tibbiyot mutaxassislari ishtirok etdilar.

Soʻzga chiqqan masʼullar Farmonga koʻra 2021-yil 1-iyuldan boshlab hamshiralik ishi oʻzini oʻzi band qilgan shaxslar shugʻullanishi mumkin boʻlgan faoliyat turlari roʻyxatiga kiritilgani, ularning ushbu xizmatlar bilan malakalarini oshirib borgan holda shugʻullanishlari belgilanganini taʼkidlashdi. Bu esa oʻz navbatida oʻrta tibbiyot xodimlarining bandligini taʼminlash bilan bir qatorda son jihatdan oʻsayotgan aholimizning tibbiy xizmatga boʻlgan ehtiyojini taʼminlashda, har bir inson tibbiyot xodimi nazoratida boʻlishiga xizmat qilishi bilan muhim ahamiyat kasb etishini alohida eʼtirof etishdi.

Taʼkidlanganidek, davlat tibbiyot muassasalari bilan bir qatorda nodavlat tibbiyot tashkilotlari faoliyatini yoʻlga qoʻyish va ularga yangi imkoniyatlar yaratish masalasi Farmonda oʻz aksini topgan. Unga koʻra 2021-yil 1-iyuldan boshlab nodavlat tibbiyot tashkilotlariga maxsus avtotransport vositasida tashkil etiladigan “mobil tibbiyot” xizmati yordamida joyiga chiqqan holda aholiga tibbiy xizmat koʻrsatish, nodavlat tibbiyot tashkilotining oʻrta tibbiyot xodimlaridan iborat “tibbiy punkt”larini tashkil etishga ruxsat berildi.

Seminar mashgʻuloti davomida vaqtincha ishsiz boʻlgan oʻrta tibbiyot xodimlarini oʻz-oʻzini band qilish boʻyicha Farmonda belgilab berilgan chora-tadbirlar, kredit va subsidiya olish tartibi, ish staji yuritilishi, ishlash mexanizmi tushuntirib oʻtildi.

Undan tashqari, Nukus shahar Tibbiyot birlashmasi fizioterapiya boʻlimi mudiri Roza Qurbonboyeva fizioterapiya jihozlarini xarid qilish, ularni ishlatish boʻyicha batafsil maʼlumotlar berdi. Nukus Tibbiyot bilim yurti oʻqituvchisi Jadra Qadirboyeva esa koʻp yillar davomida ishsiz boʻlgan tibbiy xodimlarining malakasini oshirish, diplomlarini qayta tiklash boʻyicha huquqiy tushunchalar berib oʻtdi. Shu bilan bir qatorda malaka oshirish istagida boʻlgan tibbiyot xodimlari roʻyxati shakllantirildi.

Seminar mashgʻuloti ishtirokchilari masʼullarga oʻzlarini qiziqtirgan savollar bilan murojaat qilib, toʻliq javoblar oldilar.

L.Yangiboyeva, tuman Tibbiyot birlashmasi bosh hamshirasi.