Тинчликнинг қадри улуғ
Маҳалла кичик бир давлатга ўхшайди менинг назаримда. Унинг ҳам ўз чегаралари, ўзига яраша йиллар давомида шаклланган урф-одатлари, ёзилмаган қонун-қоидалари бор. Лекин маҳалладошнинг дард-у ташвишлари, қувончларига шерик бўлиб, кези келганда йиқилганларни қўлидан ушлаб турғизиш, шу мўъжазгина ҳудуднинг оғир юкини елкага ортмоқлаб ишлаш ҳам осон эмас. Фақат ўзбек халқигагина хос бўлган бу тузилма шунинг учун ҳам ноёбдир. Юртимизнинг тинчлиги, аввало, маҳалла, кейин эса оилалар тинчлигига кўп жиҳатдан боғлиқ. Шу боис, маҳалла раиси ва ходимлари зиммасига жуда катта масъулият юкланган.
Маҳалла раиси бўлиш осон иш эмас. Чунки ҳаёт ҳеч қачон бир маромда турмайди. Ҳар бир кун, ҳар бир лаҳзада бирор янгилик, бирор ҳодиса юз беради. Маҳалла ҳаёти билан, унинг қувонч-у ташвишлари билан яшаб, доим ҳаммадан бир қадам олдинда юрмаган маҳалла раиси ҳеч қачон обрў-эътибор, ҳурмат қозонмайди. Одамлар унга эргашиши, қулоқ солиши учун ҳам катта билим, тажриба, шу билан бирга шахсий ибрат ҳам жуда зарур.
Мен ўзим Иккинчи жаҳон уруши қатнашчисининг фарзанди бўлганим, отамдан уруш хотираларини кўп эшитганим учун ҳам тинчликнинг қадри қанчалик баланд эканини жуда яхши тушунаман. Отамнинг болалиги очарчилик йилларига, ёшлик даври урушга, ўрта ёшлик даври эса урушдан кейинги тикланиш йилларига тўғри келган экан. Биз турмушнинг арзимас қийинчиликларидан сал нолисак отам: “сизлар бахтли инсонсизлар, сал ҳаракат қилсангиз, даромад топасиз, бозорларда истаган нарсангиз муҳайё. Қандай яхши, дориломон кунларда яшаяпсизлар. Биз кўрган қора кунларни ҳеч қачон кўрманг. Биз бир парча нон топсак, кўзимизга суриб, сувга ботириб еганмиз. Тинчликнинг қадрига етинг, болаларим, тинчликни йўқотсак – уни топиш жуда мушкул”, дер эдилар. Йиллар ўтиб, ёшим улғайган сайин бу сўзларнинг қадрини теран англаб етдим.
Бугун ўзим ҳам одамлар билан мулоқот қилганимда доим шу сўзни такрорлайман. Сўнгги кунларда қўшни Қозоғистон давлатида бўлиб ўтган талотўплар шу давлатнинг иқтисодига қанчалик катта талофат келтирганини, қанча қурбонлар берилганини ўз кўзимиз билан кўриб турибмиз. Энди уни тиклашга қанча маблағ, қанча вақт кетишини тасаввур қилиш қийин эмас. Ваҳоланки, шунча маблағ юрт равнақи учун, унинг ободлиги учун сарфланганда қанчалар яхши бўлар эди. Доим ичимда шу сўзларни такрорлайман:
– Юртимизга кўз тегмасин, тинчлигимиз абадий бўлсин!
Зебогул Ражабова, «Янгиобод» МФЙ раиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
