КОРРУПЦИЯ - ЁШЛАР НИГОҲИДА

Бугунги кунда коррупцияга қарши курашиш, ушбу иллатга нисбатан муросасиз муносабатни шакллантириш, коррупция ҳолатларининг олдини олиш мақсадида бир қанча чора-тадбирлар амалга оширилмоқда.

Бу орқали қонун устуворлигини таъминлаш бугунги кун тартибидаги асосий вазифа ҳисобланади. Мана шу вазифаларни амалга ошириш чораларининг бир кўриниши сифатида ўтган 2021 йилда Адлия вазирлиги томонидан 9 декабрь – Халқаро коррупцияга қарши курашиш куни муносабати билан ташкил этилган “Коррупция – тараққиёт кушандаси” номли умуммиллий иншолар танлови Республика бўйлаб кенг миқёсда ташкил этилди.

Амударё туманида ҳам “Коррупция – тараққиёт кушандаси” номли умуммиллий иншолар танлови ўтказилиб, унда туманимиздаги умумий ўрта таълим мактабларининг 8-11 синф ўқувчилари ҳамда олий таълим муассасаси талабалари иштирок этиб танлов қизғин ва юқори даражада ўтказилди.

Иншолар танловида иштирокчилар жамиятни емирувчи асосий иллат-коррупция эканлигини ўзининг ижодкорлик қобилиятлари орқали сермазмун сатрлада ифодалаб беришди.

Шунингдек, ғолиб бўлган иштирокчилар туман Халқ таълими бўлими, Адлия бўлими ҳамда Халқ депутатлари туман Кенгашининг Қонунчиликни таъминлаш ва коррупцияга карши курашиш масалалари бўйича доимий комиссия томонидан эсдалик совғалари билан тақдирландилар. Ўзбекистон Республикаси бўйлаб ўтказилган ушбу танловда 10 мингдан ортиқ ўқувчи-ёшларнинг иншолари саралаб олиниб, энг муносиб кўрилганлари “Коррупция – ёшлар нигоҳида” номли китобга киритилди.

Қувонарлиси, туманимиздаги 40-сонли умумтаълим мактабининг собиқ ўқувчиси Комила Бахтиёрованинг ҳам ижод махсули юқори баҳоланиб ушбу китобга киритилди.

31 январь куни Амударё тумани ҳокимлиги биносида мазкур китобнинг тақдимот маросими ўтказилди. Унда халқ депутатлари туман Кенгаши котибияти, туман ҳокимлиги ва сиёсий партияларнинг туман Кенгашлари масъуллари иштирок этди.

Комила Бахтиёрова ҳозирги кунда Ўзбекистон Давлат Жаҳон тиллари университетининг хорижий тиллар факультети, инглиз тили ва адабиёти таълим йўналишида 1-босқич талабаси.

Шу ўринда айтиш лозимки, Республика миқёсида ўтказилган ушбу танловда туманимиздан етишиб чиққан ёш истеъдодлардан бирининг меҳнати юқори баҳоланиб, эътирофга сазовор бўлгани Комиланинг барча тенгдошлари ва туманимиз ёшларини ҳам билим олишга, ўз устида изланишга чорлади.

Ўтказилган иншолар танлови орқали адолатпарвар ёшларимизнинг она ватанга меҳр-муҳаббати, коррупцияга қарши курашишда ёшларимизнинг фикрлаш қобилияти анча теранлиги ва шахсий дунёқарашга эга эканлиги яққол намоён бўлди.

Дарҳақиқат, гап коррупцияга қарши кураш ҳақида борар экан, бу борада жамоатчиликнинг назорати жуда муҳим эканини алоҳида таъкидлаш керак. Энг асосийси, бу жараёнда ёшларнинг фаоллиги сезилаётгани эътиборга моликдир.

Ватанимиз келажаги ёшлар қўлида. Шундай экан, уларнинг маънан баркамол бўлиб етишишлари, коррупция сингари иллатнинг тузоғига тушмасликлари учун барчамиз бирдек ҳаракат қилмоғимиз даркор.

Ф.Эшимбетова