KORRUPTsIYa - YoShLAR NIGOHIDA

Bugungi kunda korruptsiyaga qarshi kurashish, ushbu illatga nisbatan murosasiz munosabatni shakllantirish, korruptsiya holatlarining oldini olish maqsadida bir qancha chora-tadbirlar amalga oshirilmoqda.

Bu orqali qonun ustuvorligini taʼminlash bugungi kun tartibidagi asosiy vazifa hisoblanadi. Mana shu vazifalarni amalga oshirish choralarining bir koʻrinishi sifatida oʻtgan 2021-yilda Adliya vazirligi tomonidan 9-dekabr – Xalqaro korruptsiyaga qarshi kurashish kuni munosabati bilan tashkil etilgan “Korruptsiya – taraqqiyot kushandasi” nomli umummilliy insholar tanlovi Respublika boʻylab keng miqyosda tashkil etildi.

Amudaryo tumanida ham “Korruptsiya – taraqqiyot kushandasi” nomli umummilliy insholar tanlovi oʻtkazilib, unda tumanimizdagi umumiy oʻrta taʼlim maktablarining 8-11-sinf oʻquvchilari hamda oliy taʼlim muassasasi talabalari ishtirok etib tanlov qizgʻin va yuqori darajada oʻtkazildi.

Insholar tanlovida ishtirokchilar jamiyatni yemiruvchi asosiy illat-korruptsiya ekanligini oʻzining ijodkorlik qobiliyatlari orqali sermazmun satrlada ifodalab berishdi.

Shuningdek, gʻolib boʻlgan ishtirokchilar tuman Xalq taʼlimi boʻlimi, Adliya boʻlimi hamda Xalq deputatlari tuman Kengashining Qonunchilikni taʼminlash va korruptsiyaga karshi kurashish masalalari boʻyicha doimiy komissiya tomonidan esdalik sovgʻalari bilan taqdirlandilar. Oʻzbekiston Respublikasi boʻylab oʻtkazilgan ushbu tanlovda 10 mingdan ortiq oʻquvchi-yoshlarning insholari saralab olinib, eng munosib koʻrilganlari “Korruptsiya – yoshlar nigohida” nomli kitobga kiritildi.

Quvonarlisi, tumanimizdagi 40-sonli umumtaʼlim maktabining sobiq oʻquvchisi Komila Baxtiyorovaning ham ijod maxsuli yuqori baholanib ushbu kitobga kiritildi.

31-yanvar kuni Amudaryo tumani hokimligi binosida mazkur kitobning taqdimot marosimi oʻtkazildi. Unda xalq deputatlari tuman Kengashi kotibiyati, tuman hokimligi va siyosiy partiyalarning tuman Kengashlari masʼullari ishtirok etdi.

Komila Baxtiyorova hozirgi kunda Oʻzbekiston Davlat Jahon tillari universitetining xorijiy tillar fakulteti, ingliz tili va adabiyoti taʼlim yoʻnalishida 1-bosqich talabasi.

Shu oʻrinda aytish lozimki, Respublika miqyosida oʻtkazilgan ushbu tanlovda tumanimizdan yetishib chiqqan yosh isteʼdodlardan birining mehnati yuqori baholanib, eʼtirofga sazovor boʻlgani Komilaning barcha tengdoshlari va tumanimiz yoshlarini ham bilim olishga, oʻz ustida izlanishga chorladi.

Oʻtkazilgan insholar tanlovi orqali adolatparvar yoshlarimizning ona vatanga mehr-muhabbati, korruptsiyaga qarshi kurashishda yoshlarimizning fikrlash qobiliyati ancha teranligi va shaxsiy dunyoqarashga ega ekanligi yaqqol namoyon boʻldi.

Darhaqiqat, gap korruptsiyaga qarshi kurash haqida borar ekan, bu borada jamoatchilikning nazorati juda muhim ekanini alohida taʼkidlash kerak. Eng asosiysi, bu jarayonda yoshlarning faolligi sezilayotgani eʼtiborga molikdir.

Vatanimiz kelajagi yoshlar qoʻlida. Shunday ekan, ularning maʼnan barkamol boʻlib yetishishlari, korruptsiya singari illatning tuzogʻiga tushmasliklari uchun barchamiz birdek harakat qilmogʻimiz darkor.

F.Eshimbetova