Дарахтлар ва буталарнинг кесилишига йўл қўймаслик мақсадида тарғибот тадбирлари ўтказилмоқда
Маълумки, 2021 йил 30 декбрь куни Ўзбекистон Республикаси Президентининг “Республикада кўкаламзорлаштириш ишларини жадаллаштириш, дарахтлар муҳофазасини янада самарали ташкил этиш чора-тадбирлари тўғрисида”ги қарори қабул қилинган эди.
Қарорга мувофиқ туман Экология бўлими томонидан давлат ўрмон фондига кирмайдиган қимматбаҳо дарахтлар ва буталарнинг кесилишига йўл қўймаслик мақсадида тумандаги корхона ва ташкилотлар, фермер хўжаликлари ва аҳоли ўртасида тарғибот-ташвиқот ишлари ўтказилмоқда.
26 январь куни Ўрта қалъа овулида яшовчи аҳоли ўртасида келгусида дарахтларнинг ноқонуний равишда кесилишига, қирғовул, кабутар каби қушларнинг овланишига йўл қўймаслик мақсадида тарғибот тадбири ўтказилди. Тадбирда туман Экология бўлими бошлиғи Нурбек Узакбаев томонидан атроф-муҳитга зарар етказмаслик, кўчатлар сонини кўпайтириш, ноёб турдаги ҳайвонларни овламаслик бўйича аҳолига кенг тарзда тушинтиришлар берилди.
Тадбирда туман инспекторлари томонидан назорат рейд тадбирлари мунтазам равишда ўтказилиб келинаётганлиги, қонунбузилиш ҳолатлари аниқланган тақдирда, Ўзбекистон Республикаси маъмурий жавобгарлик тўғрисидаги кодекснинг тегишли моддаларига асосан белгиланган тартибда чоралар кўрилиши огоҳлантирилди.
Шундан сўнг, туман ҳокимлигининг кичик мажлислар залида тумандаги фермер хўжаликлари раҳбарлари иштирокида йиғилиш бўлиб ўтди. Йиғилишда туман Экология бўлими бошлиғи Нурбек Узақбаев фермерларга мурожаат қилар экан, ҳар бир фермер ўз ҳудудидаги атроф-муҳит тозалигини сақлашга, фуқароларнинг табиатга зарар етказмасликлари учун жавобгар эканлигини таъкидлади. Ҳамда туман фермер хўжаликлари раҳбарларидан бу борадаги кафолот хатлари олинди.
Шунингдек йиғилишда, Қорақалпоғистон Республикаси ҳудудида қирғовуллар сонининг камайиб кетиши сабабли Қорақалпоғистон Республикаси Вазирлар Кенгаши томонидан қабул қилинган қарор муҳокама қилинди. Қарорга асосан, 2022-2023 йилларда Республика ҳудудида қирғовулларни овлаш қатъиян ман этилди.
Йиғилишда қайд этиб ўтилганидек, Давлат экология қўмитасига 2022 йил 1 декабрга қадар Экологик кодекс лойиҳасини ишлаб чиқиб, Вазирлар Маҳкамасига киритиш вазифаси юклатилди. Кодексни кенг жамоатчилик, илмий-тадқиқот институтлари, фуқаролик жамияти институтлари ва оммавий ахборот воситалари вакилларини жалб этган ҳолда ишлаб чиқиш белгиланган. Шу сабабли қонун лойиҳасини ишлаб чиқишда фуқароларнинг таклифлари, фикр-мулоҳазалари муҳим аҳамият касб этиши таъкидланди. Шунингдек, қонунчиликка мувофиқ эндиликда ноқонуний дарахт кесиш ҳолатларини суратга олиб юборган фуқароларга ҳам бир марталик мукофот пули тўланади.
Республика миқёсида Президентимиз фармони асосида “Яшил майдон” акциялари ташкил этилиб, яшил майдонлар сони кўпайтирилган бир вақтда, дарахтларнинг ноқонуний равишда кесилиши катта хато ҳисобланади.
Дарҳақиқат, табиатнинг ўзи заргарга ўхшайди. Унинг бағридан униб чиққан ҳар бир гиёҳ, ҳар бир дарахт, ўрмонлар, ҳайвонот олами ўзига хос бир оламдир. Бу табиий бойликка дахл қилинишининг олдини олиш, муҳофаза қилиш фақат шу соҳа ходимларининг иши эмас, балки барчанинг бурчидир. Чунки, биз яшаётган ҳудуд мусаффолиги, экологик мувозанат барчамизга бирдай дахлдордир.
Ф.Эшимбетова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
