САЙЁР СУДДА 7 НАФАР МУҚАДДАМ СУДЛАНГАН ФУҚАРОЛАРГА НИСБАТАН МАЪМУРИЙ НАЗОРАТ ЎРНАТИЛДИ

Маълумки, ўта хавфли рецидивист деб топилган, оғир ёки ўта оғир жиноятлар содир этганлиги учун озодликдан маҳрум қилишга ҳукм этилган, ҳар қандай қасддан қилинган жиноятлар учун икки ёки ундан ортиқ марта озодликдан маҳрум қилишга ҳукм этилган шахсларга нисбатан маъмурий назорат ўрнатилади. Маъмурий назорат ўрнатишга доир ишлар суд томонидан кўриб чиқилади ва бундай шахсларга нисбатан маълум чекловлар белгиланади.

Шу йил 18 январь куни Амударё тумани Ички ишлар бўлими биносида сайёр суд ўтказилиб, ҳуқуқбузарликлар профилактикаси бўлинмаси ҳисобида турган 7 нафар муқаддам судланган фуқароларга нисбатан маъмурий назорат тўғрисидаги тақдимномаларига асосан иш материаллари кўриб чиқилди. Ушбу суд ишида Жиноят ишлари бўйича туман суди масъуллари, туман Ички ишлар бўлимининг Ҳуқуқбузарликлар профилактикаси бўлинмаси бошлиғи Орифжон Қосимов, профилактика инспекторлари ҳамда вояга етмаганлар масалалари бўйича инспектор-психологлар қатнашдилар.

Маълумки, “Жазони ижро этиш муассасаларидан озод қилинган айрим тоифадаги шахслар устидан маъмурий назорат тўғрисида”ги Ўзбекистон Республикаси Қонунида маъмурий назоратни ўрнатиш, амалга ошириш, узайтириш, тугатиш, маъмурий чекловларни қисман бекор қилиш масалалари тартибга солинган. Маъмурий назорат ўрнатиш зарурлиги тўғрисидаги тақдимнома 10 кундан кечиктирмай Жиноят ишлари бўйича судлар томонидан ички ишлар органи вакили ва маъмурий назорат ўрнатиш масаласи кўриб чиқилаётган шахс иштирокида кўриб чиқилади ва маъмурий назорат бир йил муддатга ўрнатилади. Шунингдек, маъмурий назорат остидаги шахсларга нисбатан суднинг содир этилган қилмишнинг хусусияти ҳисобга олинган ҳолдаги қарори асосида муайян маъмурий чекловлар қўлланилади.

Назорат остидаги шахс маъмурий ҳуқуқбузарлик содир этган тақдирда, маъмурий назорат муддати ички ишлар органининг тақдимномаси асосида суд томонидан олти ойгача, лекин судланганлик ҳолатининг тугалланиши ёки судланганликнинг олиб ташланиши муддатларидан ортиқ бўлмаган муддатга узайтирилиши мумкин. Шу ўринда айтиш жоизки, суднинг маъмурий назорат ўрнатиш, унинг муддатини узайтириш ёки муддатидан илгари тугатиш ёхуд маъмурий чекловларни қисман бекор қилиш тўғрисидаги қарорлари устидан ҳам юқори турувчи судга шикоят берилишига йўл қўйилади.

Шунга кўра мазкур суд иши давомида 7 нафар муқаддам судланган фуқаролар жазосини ўтаб чиққанлиги туфайли эндиликда уларнинг турмуш тарзи ва хулқ атворини назорат қилиш, қайта жиноят ёки ҳуқуқбузарликлар содир қилишига йўл қўймаслик мақсадида 6 ой муддатга маъмурий назорат ўрнатилди. Шунингдек, келгусида улар билан профилактик ишлар олиб бориш бўйича чора-тадбирлар белгилаб олинди.

Маъмурий назоратга олинган шахсларга ҳақ-ҳуқуқлари ва мажбуриятлари тўлиқ тушунтирилди. Ундан ташқари, уларга кечқурун соат 22:00 дан эрталабки соат 06:00 гача яшаш уйидан чиқмаслик, спиртли ичимликлар қўйиб сотиладиган жойлар, яъни кафе, бар, ресторанларда бўлмаслик, алкоголли ичимликлар истеъмол қилмаслик каби чекловлар ўрнатилганлиги, Ички ишлар бўлимининг рухсатисиз туман ҳудудидан чиқиб кетмаслик, рўйхатдан ўтиш учун ҳар ойда икки маротаба туман Ички ишлар бўлимига келиб учрашиш кераклиги маълум қилинди.

Ҳуқуқбузарларга профилактик таъсир кўрсатиш ва жазонинг тарбиявий аҳамиятини кучайтириш мақсадида амалга оширилаётган бу каби чора-тадбирлар ўзининг ижобий самарасини кўрсатмоқда. Бу борадаги амалий ишлар натижасида жазони ижро этиш муассасаларидан озод қилинган шахслар томонидан қайта жиноят ва ҳуқуқбузарликлар содир этилишининг олди олинмоқда.

Жасур Ўразбоев, Жиноят ишлари бўйича туман суди раиси.