SAYYoR SUDDA 7 NAFAR MUQADDAM SUDLANGAN FUQAROLARGA NISBATAN MAʼMURIY NAZORAT OʻRNATILDI

Maʼlumki, oʻta xavfli retsidivist deb topilgan, ogʻir yoki oʻta ogʻir jinoyatlar sodir etganligi uchun ozodlikdan mahrum qilishga hukm etilgan, har qanday qasddan qilingan jinoyatlar uchun ikki yoki undan ortiq marta ozodlikdan mahrum qilishga hukm etilgan shaxslarga nisbatan maʼmuriy nazorat oʻrnatiladi. Maʼmuriy nazorat oʻrnatishga doir ishlar sud tomonidan koʻrib chiqiladi va bunday shaxslarga nisbatan maʼlum cheklovlar belgilanadi.

Shu yil 18-yanvar kuni Amudaryo tumani Ichki ishlar boʻlimi binosida sayyor sud oʻtkazilib, huquqbuzarliklar profilaktikasi boʻlinmasi hisobida turgan 7 nafar muqaddam sudlangan fuqarolarga nisbatan maʼmuriy nazorat toʻgʻrisidagi taqdimnomalariga asosan ish materiallari koʻrib chiqildi. Ushbu sud ishida Jinoyat ishlari boʻyicha tuman sudi masʼullari, tuman Ichki ishlar boʻlimining Huquqbuzarliklar profilaktikasi boʻlinmasi boshligʻi Orifjon Qosimov, profilaktika inspektorlari hamda voyaga yetmaganlar masalalari boʻyicha inspektor-psixologlar qatnashdilar.

Maʼlumki, “Jazoni ijro etish muassasalaridan ozod qilingan ayrim toifadagi shaxslar ustidan maʼmuriy nazorat toʻgʻrisida”gi Oʻzbekiston Respublikasi Qonunida maʼmuriy nazoratni oʻrnatish, amalga oshirish, uzaytirish, tugatish, maʼmuriy cheklovlarni qisman bekor qilish masalalari tartibga solingan. Maʼmuriy nazorat oʻrnatish zarurligi toʻgʻrisidagi taqdimnoma 10 kundan kechiktirmay Jinoyat ishlari boʻyicha sudlar tomonidan ichki ishlar organi vakili va maʼmuriy nazorat oʻrnatish masalasi koʻrib chiqilayotgan shaxs ishtirokida koʻrib chiqiladi va maʼmuriy nazorat bir yil muddatga oʻrnatiladi. Shuningdek, maʼmuriy nazorat ostidagi shaxslarga nisbatan sudning sodir etilgan qilmishning xususiyati hisobga olingan holdagi qarori asosida muayyan maʼmuriy cheklovlar qoʻllaniladi.

Nazorat ostidagi shaxs maʼmuriy huquqbuzarlik sodir etgan taqdirda, maʼmuriy nazorat muddati ichki ishlar organining taqdimnomasi asosida sud tomonidan olti oygacha, lekin sudlanganlik holatining tugallanishi yoki sudlanganlikning olib tashlanishi muddatlaridan ortiq boʻlmagan muddatga uzaytirilishi mumkin. Shu oʻrinda aytish joizki, sudning maʼmuriy nazorat oʻrnatish, uning muddatini uzaytirish yoki muddatidan ilgari tugatish yoxud maʼmuriy cheklovlarni qisman bekor qilish toʻgʻrisidagi qarorlari ustidan ham yuqori turuvchi sudga shikoyat berilishiga yoʻl qoʻyiladi.

Shunga koʻra mazkur sud ishi davomida 7 nafar muqaddam sudlangan fuqarolar jazosini oʻtab chiqqanligi tufayli endilikda ularning turmush tarzi va xulq atvorini nazorat qilish, qayta jinoyat yoki huquqbuzarliklar sodir qilishiga yoʻl qoʻymaslik maqsadida 6 oy muddatga maʼmuriy nazorat oʻrnatildi. Shuningdek, kelgusida ular bilan profilaktik ishlar olib borish boʻyicha chora-tadbirlar belgilab olindi.

Maʼmuriy nazoratga olingan shaxslarga haq-huquqlari va majburiyatlari toʻliq tushuntirildi. Undan tashqari, ularga kechqurun soat 22:00 dan ertalabki soat 06:00 gacha yashash uyidan chiqmaslik, spirtli ichimliklar qoʻyib sotiladigan joylar, yaʼni kafe, bar, restoranlarda boʻlmaslik, alkogolli ichimliklar isteʼmol qilmaslik kabi cheklovlar oʻrnatilganligi, Ichki ishlar boʻlimining ruxsatisiz tuman hududidan chiqib ketmaslik, roʻyxatdan oʻtish uchun har oyda ikki marotaba tuman Ichki ishlar boʻlimiga kelib uchrashish kerakligi maʼlum qilindi.

Huquqbuzarlarga profilaktik taʼsir koʻrsatish va jazoning tarbiyaviy ahamiyatini kuchaytirish maqsadida amalga oshirilayotgan bu kabi chora-tadbirlar oʻzining ijobiy samarasini koʻrsatmoqda. Bu boradagi amaliy ishlar natijasida jazoni ijro etish muassasalaridan ozod qilingan shaxslar tomonidan qayta jinoyat va huquqbuzarliklar sodir etilishining oldi olinmoqda.

Jasur Oʻrazboyev, Jinoyat ishlari boʻyicha tuman sudi raisi.