АСКАР ОНАЛАРИНИ ШАРАФЛАШГА БАҒИШЛАНГАН ТАДБИР ЎТКАЗИЛДИ

Мамлакатимизда Ватанни шараф билан ҳимоя қилаётган ҳарбийларнинг, йигитлик бурчини адо этаётган мард ва жасур аскарларнинг оналарига ҳурмат ва эҳтиром кўрсатиш мақсадида маънавий-маърифий тадбирлар ўтказиш анъанага айланди. Ҳар йили 14 январь – Ватан ҳимоячилари куни олдидан шу муносабат билан жойларда тадбир ўтказилиб, аскар оналари шарафланади. Зеро, бугунги тинч ва осойишта ҳаётимизни, сарҳадларимиз дахлсизлигини таъминлаётган Ватанимиз посбонларининг оналари ҳар қанча эъзозлашга, шарафлашга лойиқ.

Амударё туманида ҳам Ўзбекистон Республикаси Қуролли кучларининг 30 йиллиги байрами муносабати билан “Аскар оналарини шарафлаймиз” деб номланган тадбир ўтказилди.

13 январь куни 9-сонли Мусиқа ва санъат мактабида бўлиб ўтган ушбу тадбирда туман ҳокимининг хотин-қизлар масалалари бўйича маслаҳатчиси, Маҳалла ва оилани қўллаб-қувватлаш бўлими бошлиғининг биринчи ўринбосари Муқаддас Бекназарова, туман Мудофаа бўлими ходими Роман Рўзметов, давлат хавфсизлик хизмати чегара қўшинларига қарашли ҳарбий қисм хизматчи ва аскарлари, фуқаролар йиғинлари масъуллари ҳамда Ватан олдидаги бурчини адо этиш учун Қуролли кучларимиз сафида хизмат қилаётган аскар оналари иштирок этдилар.

Тадбирни туман Маҳалла ва оилани қўллаб-қувватлаш бўлими бошлиғининг биринчи ўринбосари Муқаддас Бекназарова очиб берди ва йиғилганларни 14 январь – Ватан ҳимоячилари куни билан муборакбод этиб, ватанпарвар, мард ўғлонларни ўстираётган ота-оналарни шарафлади. Шундан сўнг, туман ҳокими Султонбой Йўлдашевнинг байрам табригини ўқиб эшиттирди. 

Тадбирда бугунги кунда давлатимиз раҳбари раҳнамолигида амалга оширилаётган кенг кўламли ислоҳотлар самарасида Миллий армиямиз сафларида хизмат қилиш, юртимиз ва халқимиз осойишталигини таъминлашга ҳисса қўшиш ҳар бир йигит учун юксак шон-шараф ишига айланганини алоҳида таъкидланди. Шунингдек, айни пайтда юртимизнинг турли ҳудудларидаги ҳарбий қисмларда бурчига садоқат билан хизмат қилаётган аскарларнинг оналари шарафланди. Ушбу тадбирда иштирок этаётган бошқа масъуллар ва аскар оналари Манзура Қўчқарова, Нигора Сапаровалар ҳам барчани Ўзбекистон Республикаси Қуролли кучларининг 30 йиллик байрами билан табриклади.

Тадбирда сўзга чиққанлар томонидан таъкидланганидек, ўтган йиллар давомида Ватан посбонларига муносиб шарт-шароит яратиб  бериш, ҳарбий хизматчилар, уларнинг оила аъзоларини ижтимоий ҳимоялаш борасида тизимли ишлар амалга оширилди. Натижада ҳарбий хизматнинг мақоми юксалиб, фуқароларнинг мазкур жабҳага бўлган қизиқиши янада ошди. Фарзанди муддатли ҳарбий хизматни ўташи ота-она учун ҳам, яқинлари учун ҳам фахр ва ифтихорга айланди.

Ватан ҳимоясидек шарафли йигитлик бурчини бажариб келаётган мард ўғлонларни тарбиялаб вояга етказган азиз оналарга ҳомийларнинг эсдалик совғалари топширилди.

Шундан сўнг, тадбирга туманимизда йигитлик бурчини аъло даражада ўтаётган аскар йигитларимизнинг кириб келиши онажонларга кутилмаган совға бўлди. Энг ҳаяжонли бўлган бу лаҳзалар онажонларга жуда катта қувонч бахш этди.

Тумандаги таниқли санъаткорлар ижросидаги куй-қўшиқлар ҳам таклиф этилганларга ҳақиқий байрам кайфиятларини тақдим этдилар. Тадбир иштирокчилари, аскарлар ва уларнинг оналари қувноқ рақслари билан даврага янада кўтаринкилик, завқ-шавқ киритдилар.

Тадбир барча иштирокчиларда катта таассурот қолдирди.

Гавҳар ЧИМБАЙЧИЕВА.