АМУДАРЁДА МИЛЛИЙ АРМИЯМИЗНИНГ 30 ЙИЛЛИГИ КАТТА ТАНТАНА БИЛАН НИШОНЛАНДИ
Ватан! Онамиздай азиз, мўътабар ва мунис меҳр қўрғони, отамиздай буюк эҳтиромга муносиб макон. Киндик қонимиз тўкилган муқаддас гўша!
Халқимиз бекорга “қон тортади” ёки “қондошлар ўртасида узилмас ришта бор”, деб айтишмаган. Шунинг учун биз қаерда бўлишимиздан қатъий назар, онамиз бағрига интилган каби ўзимиз туғилган тупроққа талпиниб турамиз. Ватанни она деган муқаддас сўз билан ёнма-ён ишлатишимизда ҳам ажиб бир ҳикмат бор. Чунки, инсон дунёга келмасидан аввал онасининг вужудида улғаяди, дунёга келгач эса Ватан бағрида, Ватаннинг чексиз меҳр-муҳаббат тафтида униб-ўсади. Шу боис, онани ардоқлаш Ватанни, Ватанни ҳимоя қилиш онанинг ҳурматини жойига қўйиш, тинчлик-хотиржамлигини таъминлашдир.
Донишманд халқимиз закоси туфайли яратилган “Туғилган ердан кўнгил узилмас, юрт қўриганнинг юрти бузилмас”, деган пурмаъно мақолда ҳам она билан Ватанни асраб-авайлашга гўзал ишора бор.
Халқимизнинг мард ва жасур, она Ватанни севиб-ардоқлайдиган садоқатли ҳимоячилари, Алпомиш ўғлонлари бор экан, мустақил мамлакатимиз гуллаб-яшнайверади, онажонлар хотиржам, она Юрт кўксида ҳар тонг аллалар янграйверади.
Ўзбекистон Қуролли Кучларининг 30 йиллиги ҳамда Ватан ҳимоячилари куни муносабати билан туман Маданият маркази биносида ташкил этилган театрлаштирилган тантанали тадбирнинг ҳар бир лаҳзасида ана шундай гўзал туйғулар жаранг сочди. Ватанга садоқат, меҳр-муҳаббат, Мустақиллик ғояларига юксак эҳтиром туйғулари акс-садо бериб, она Юрт ҳимоячилари шарафланди. Ватан хавфсизлиги, сарҳадларимиз дахлсизлигини таъминлаётган Ватан посбонларининг мардлиги ва жасоратини мадҳ этувчи ватанпарварлик руҳидаги куй-қўшиқлар янгради. Янгиланган мустаҳкам Миллий Армиямиз куч қудратини ифода этувчи адабий композициялар, саҳна кўринишлари намойиш этилди.
Байрам тантанаси ўтказиладиган туман Маданият маркази фойесида, Давлат хавфсизлик хизмати Чегара қўшинларининг туманимиздаги ҳарбий қисмлари томонидан замонавий қурол-аслаҳалар кшргазмаси ташкил этилди. Гуллар ва турфа ёритгичлар фонида Ўзбекистон ва Қорақалпоғистон Республикаси байроқлари ҳилпираб турган фойеда меҳмонларни 9- ва 21-сонли болалар мусиқа ва санъат мактабларининг санъатсевар ўқувчилари Ватанни мадҳ этувчи ҳарбий марш садолари билан кутиб олдилар. Концерт зали тўридаги катта мониторда “Ўзбекистон Қуролли Кучларининг 30 йиллик байрами муборак бўлсин!” шиори Ўзбекистон ва Қорақалпоғистон Республикалари байроқлари фонида байрам тантанасига ўзгача шукуҳ бағишлади. Қалбларга кўтаринки кайфият бағишловчи чорлов ва Ўзбекистон ва Қорақалпоғистон Республикалари мадҳиялари янгради.
Тантанали байрам тадбирига ташриф буюрган туманимиз ҳудудидаги Давлат хавфсизлик хизмати Чегара қўшинларига қарашли ҳарбий қисмларнинг зобитлари, муддатли ҳарбий хизмат бурчини адо этаётган аскарлари ва Миллий Армиямизнинг фахрий ҳамда заҳирадаги зобит ва аскарларига Амударё тумани ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Маҳмуд Шерметов ўзининг самимий тилакларини изҳор этиб байрам тадбирини очиб берди.
Шундан сўнг Давлат хавфсизлик хизмати Чегара қўшинлари таркибидаги ҳарбий қисм ҳарбий хизматчиси Зуҳриддин Турапов, ҳарбий хизматчи Отабек Маҳмудовлар сўзга чиқишиб, ўз табрик нутқларида Мустақиллик йилларида юртимизда давом этаётган моддий ва маънавий тараққиёт асосида тинчликни сақлаш, иқтисодиётни ривожлантириш ва халқимиз турмуш даражасини янада юксалтириш борасида улкан натижаларга эришилгани ва бу тараққиётнинг бирдан-бир омили, Ватандаги барқарор тинчлик туфайли эканлигини таъкидлаб, тинчлик ҳимоячилари, она Ватан опсбонларининг беқиёс катта хизмати, матонат ва жасоратини алоҳида эътироф этишди.
Байрам тадбирининг расмий тантанали қисмидан сўнг саҳнадаги мониторда Ўзбекистон Қуролли Кучларининг фаолияти, зобит ва аскарларнинг юртимиз сарҳадларини қўриқлаш жараёнидаги жасорат ва қаҳрамонликлари акс эттирилиб, туман маданият бўлими санъаткорлари томонидан тайёрланган катта концерт дастури намойиш этилди. Санъаткорларнинг ҳар бир чиқишидан олдин тинчлик, осойишталик посбонлари – Ватан ҳимоячиларини шарафловчи шеърлар ўқилди. Дилрабо куй-қўшиқлар янграб, жозибали рақслар ижро этилди.
Тантанали байрам тадбири давомида туман Мудофаа ишлари бўлимига ҳамда туманимиз ҳудудидаги Давлат хавфсизлик хизмати Чегара қўшинлари ҳарбий қисмларида хизмат бурчини ўтаётган Миллий Армия зобитлари, муддатли ҳарбий хизмат бурчларини адо этаётган намунали аскарларга Амударё тумани ҳокимининг ташаккурномалари тақдим этилиб, эсдалик совғалари топширилди.
Бири-биридан жозибали куй-қўшиқлар янграб, туманимиз ҳудудидаги ҳарбий қисмларда ўз хизмат бурчини ўтаётган ҳарбийлар ҳам рақсга тушиб, байрамни хушнудлик билан нишонладилар. Зеро, ана шу Алпомиш ўғлонлар бор экан:
Отанинг кўнгли тўқ, яшар хотиржам,
Бешикларин қучган оналар хуррам.
Ватан, ҳар кунингда тантана, байрам –
Қудратли Армиянг – ҚАЛҚОН бор учун!
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
