AMUDARYoDA MILLIY ARMIYaMIZNING 30 YILLIGI KATTA TANTANA BILAN NIShONLANDI
Vatan! Onamizday aziz, moʻʼtabar va munis mehr qoʻrgʻoni, otamizday buyuk ehtiromga munosib makon. Kindik qonimiz toʻkilgan muqaddas goʻsha!
Xalqimiz bekorga “qon tortadi” yoki “qondoshlar oʻrtasida uzilmas rishta bor”, deb aytishmagan. Shuning uchun biz qayerda boʻlishimizdan qatʼiy nazar, onamiz bagʻriga intilgan kabi oʻzimiz tugʻilgan tuproqqa talpinib turamiz. Vatanni ona degan muqaddas soʻz bilan yonma-yon ishlatishimizda ham ajib bir hikmat bor. Chunki, inson dunyoga kelmasidan avval onasining vujudida ulgʻayadi, dunyoga kelgach esa Vatan bagʻrida, Vatanning cheksiz mehr-muhabbat taftida unib-oʻsadi. Shu bois, onani ardoqlash Vatanni, Vatanni himoya qilish onaning hurmatini joyiga qoʻyish, tinchlik-xotirjamligini taʼminlashdir.
Donishmand xalqimiz zakosi tufayli yaratilgan “Tugʻilgan yerdan koʻngil uzilmas, yurt qoʻriganning yurti buzilmas”, degan purmaʼno maqolda ham ona bilan Vatanni asrab-avaylashga goʻzal ishora bor.
Xalqimizning mard va jasur, ona Vatanni sevib-ardoqlaydigan sadoqatli himoyachilari, Alpomish oʻgʻlonlari bor ekan, mustaqil mamlakatimiz gullab-yashnayveradi, onajonlar xotirjam, ona Yurt koʻksida har tong allalar yangrayveradi.
Oʻzbekiston Qurolli Kuchlarining 30 yilligi hamda Vatan himoyachilari kuni munosabati bilan tuman Madaniyat markazi binosida tashkil etilgan teatrlashtirilgan tantanali tadbirning har bir lahzasida ana shunday goʻzal tuygʻular jarang sochdi. Vatanga sadoqat, mehr-muhabbat, Mustaqillik gʻoyalariga yuksak ehtirom tuygʻulari aks-sado berib, ona Yurt himoyachilari sharaflandi. Vatan xavfsizligi, sarhadlarimiz daxlsizligini taʼminlayotgan Vatan posbonlarining mardligi va jasoratini madh etuvchi vatanparvarlik ruhidagi kuy-qoʻshiqlar yangradi. Yangilangan mustahkam Milliy Armiyamiz kuch qudratini ifoda etuvchi adabiy kompozitsiyalar, sahna koʻrinishlari namoyish etildi.
Bayram tantanasi oʻtkaziladigan tuman Madaniyat markazi foyesida, Davlat xavfsizlik xizmati Chegara qoʻshinlarining tumanimizdagi harbiy qismlari tomonidan zamonaviy qurol-aslahalar kshrgazmasi tashkil etildi. Gullar va turfa yoritgichlar fonida Oʻzbekiston va Qoraqalpogʻiston Respublikasi bayroqlari hilpirab turgan foyeda mehmonlarni 9- va 21-sonli bolalar musiqa va sanʼat maktablarining sanʼatsevar oʻquvchilari Vatanni madh etuvchi harbiy marsh sadolari bilan kutib oldilar. Kontsert zali toʻridagi katta monitorda “Oʻzbekiston Qurolli Kuchlarining 30 yillik bayrami muborak boʻlsin!” shiori Oʻzbekiston va Qoraqalpogʻiston Respublikalari bayroqlari fonida bayram tantanasiga oʻzgacha shukuh bagʻishladi. Qalblarga koʻtarinki kayfiyat bagʻishlovchi chorlov va Oʻzbekiston va Qoraqalpogʻiston Respublikalari madhiyalari yangradi.
Tantanali bayram tadbiriga tashrif buyurgan tumanimiz hududidagi Davlat xavfsizlik xizmati Chegara qoʻshinlariga qarashli harbiy qismlarning zobitlari, muddatli harbiy xizmat burchini ado etayotgan askarlari va Milliy Armiyamizning faxriy hamda zahiradagi zobit va askarlariga Amudaryo tumani hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Mahmud Shermetov oʻzining samimiy tilaklarini izhor etib bayram tadbirini ochib berdi.
Shundan soʻng Davlat xavfsizlik xizmati Chegara qoʻshinlari tarkibidagi harbiy qism harbiy xizmatchisi Zuhriddin Turapov, harbiy xizmatchi Otabek Mahmudovlar soʻzga chiqishib, oʻz tabrik nutqlarida Mustaqillik yillarida yurtimizda davom etayotgan moddiy va maʼnaviy taraqqiyot asosida tinchlikni saqlash, iqtisodiyotni rivojlantirish va xalqimiz turmush darajasini yanada yuksaltirish borasida ulkan natijalarga erishilgani va bu taraqqiyotning birdan-bir omili, Vatandagi barqaror tinchlik tufayli ekanligini taʼkidlab, tinchlik himoyachilari, ona Vatan opsbonlarining beqiyos katta xizmati, matonat va jasoratini alohida eʼtirof etishdi.
Bayram tadbirining rasmiy tantanali qismidan soʻng sahnadagi monitorda Oʻzbekiston Qurolli Kuchlarining faoliyati, zobit va askarlarning yurtimiz sarhadlarini qoʻriqlash jarayonidagi jasorat va qahramonliklari aks ettirilib, tuman madaniyat boʻlimi sanʼatkorlari tomonidan tayyorlangan katta kontsert dasturi namoyish etildi. Sanʼatkorlarning har bir chiqishidan oldin tinchlik, osoyishtalik posbonlari – Vatan himoyachilarini sharaflovchi sheʼrlar oʻqildi. Dilrabo kuy-qoʻshiqlar yangrab, jozibali raqslar ijro etildi.
Tantanali bayram tadbiri davomida tuman Mudofaa ishlari boʻlimiga hamda tumanimiz hududidagi Davlat xavfsizlik xizmati Chegara qoʻshinlari harbiy qismlarida xizmat burchini oʻtayotgan Milliy Armiya zobitlari, muddatli harbiy xizmat burchlarini ado etayotgan namunali askarlarga Amudaryo tumani hokimining tashakkurnomalari taqdim etilib, esdalik sovgʻalari topshirildi.
Biri-biridan jozibali kuy-qoʻshiqlar yangrab, tumanimiz hududidagi harbiy qismlarda oʻz xizmat burchini oʻtayotgan harbiylar ham raqsga tushib, bayramni xushnudlik bilan nishonladilar. Zero, ana shu Alpomish oʻgʻlonlar bor ekan:
Otaning koʻngli toʻq, yashar xotirjam,
Beshiklarin quchgan onalar xurram.
Vatan, har kuningda tantana, bayram –
Qudratli Armiyang – QALQON bor uchun!
Robiya YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
