ХИЗМАТ ТАКОМИЛЛАШИШИ НАТИЖАСИДА ҚЎРИҚЛАНАДИГАН ОБЪЕКТЛАР СОНИ ОРТМОҚДА

Мамлакатимизда барча соҳаларни ислоҳ қилиш, иш юритиш тизимини такомиллаштириш, замонавий технологиялар ҳамда малакали кадрлар билан таъминлаш борасидаги саъй-ҳаракатлар изчил давом эттирилиб, салмоқли натижалар қўлга киритилмоқда. Бу Ўзбекистон Республикаси Миллий гвардияси Қўриқлаш бошқармаси хизматининг қўриқлаш хавфсизлик техника воситаларини жорий қилиш ва фойдаланишни ташкиллаштириш тизимида ҳам яққол намоён бўлмоқда.

Бугунги кунда Амударё туманидаги Қўриқлаш бўлими техник қўриқлаш маркази томонидан 151 та объект ва 31 хонадон ишончли қўриқланмоқда. Шахсий таркибда 60 нафарга яқин ходим хизмат қилади. Хизмат вазифасини амалга оширишда 4 та хизмат машинасидан фойдаланилади. Жиноятчиликнинг олдини олиш, ўзгалар мулкини талон-тарож қилиш каби жиноятларга йўл қўймаслик мақсадида Қўриқлаш бўлими томонидан тизим янги замонавий қўриқлов ускуналари, алоқа ва транспорт воситалари билан жиҳозланди. Сўнгги русумдаги ушбу алоқа ва автотранспорт воситалари қўриқлаш хизматини самарали ташкил қилишга замин яратмоқда.

12 январь куни Қўриқлаш бўлими техник қўриқлаш маркази томонидан шартнома асосида қўриқланаётган якка тадбиркорга тегишли бўлган "Дониёржон Сабиров" корхонаси ва ва Муҳайё Йўлдошева хонадонида режа асосида тактик ўқув машғулоти ўтказилди.

Машғулот давомида қўриқлаш хизмати фаолияти самарадорлигини ошириш, тизимни илғор технологиялари билан изчил таъминлаш борасида кўрилаётган чора-тадбирлар хусусида сўз юритилди. Шунингдек, қўриқловдаги объектлар, айниқса, аҳоли хонадонлари хавфсизлигини ҳимоя қилиш чоралари кўрилаётгани таъкидланди.

Шу билан бирга туман ҳудудида фаолият кўрсатаётган халқ хўжалиги идоралари, таълим муассасалари, бозорлар, савдо ва хизмат кўрсатиш шохобчалари, хусусий дўконлар, компьютер марказлари, тўлов қабул қилиш шохобчалари, мулкчилик шаклидан қатъий назар бошқа савдо ва хизмат кўрсатиш объектлари, кўп қаватли уйларда фуқароларнинг хавфсизлиги таъминланаётгани ҳақида маълумотлар берилди.

Ундан ташқари, объектга ва хонадонга номаълум шахс талон-тарож қилиш мақсадида кирган пайтда хизмат ходимлари ва объектлар эгалари томонидан амалга оширилиши лозим бўлган ҳаракатлар кўргазмали тарзда бажарилиб, кўрсатиб берилди.

Бундай ҳолат содир бўлганида Қўриқлаш бўлими техник қўриқлаш марказига сигнал етиб бориши, шундан кейинги тезкор гуруҳнинг ҳаракатлари амалда бажарилиб, барчасига кенг тушунчалар берилди. Ўқув машғулоти хавфсизлик чоралари кўрилган ҳолда талофатларсиз ўтказилди.

Туман Қўриқлаш бўлими техник қўриқлаш маркази томонидан шу кунга қадар барча объект ва хонадонлар қўриқлаш сигнализацияси воситаси «Приток-А» тизими орқали шартнома асосида қўриқланиб келинмоқда. Эътиборли жиҳати, қўриқловга олинган объектларда кейинги йилларда ўғирликларнинг содир этилишига йўл қўйилмади.

Қўриқлаш бўлими ходимлари турли тарғибот-ташвиқот тадбирларини ҳам ўтказиб, ҳуқуқбузарликларнинг олдини олишга катта ҳисса қўшаётгани натижасида қўриқловдаги объектлар кўпайиб, янгидан қурилаётган савдо мажмуалари, бозор расталари фуқаролар томонидан қўриқловга топширилмоқда. Бу, албатта, қўриқлаш хизматига бўлган ишончнинг ортиб бораётганидан далолат беради.

Б.Атаджанов, туман Қўриқлаш бўлими бошлиғи.