ХАЛҚАРО НОГИРОНЛАР КУНИ МУНОСАБАТИ БИЛАН ТАДБИР ЎТКАЗИЛДИ

Мамлакатимизда кексалар ва ногиронлиги бўлган шахсларни ижтимоий ҳимоя қилиш ва қўллаб-қуватлаш масаласига алоҳида эътибор қаратилмоқда. Буни ушбу йўналишда амалга оширилаётган чора-тадбирларда ҳам кўришимиз мумкин.

Ҳар йили 3 декабрь санасида Халқаро ногиронлар кунининг нишонланишидан асосий мақсад – бутун дунёда амалга ошириладиган дастур ва лойиҳаларда ногиронлиги бўлган шахслар бошқа кишилар билан тенг ҳуқуқлилик асосида иштирок этишини, уларнинг манфаатлари, ҳуқуқлари инобатга олинишини, барча мамлакатларда ногиронларнинг қадр-қимматини ҳимояловчи қонунларнинг жорий этилишини таъминлаб, барча учун очиқ ва дўстона бўлган жамият қуришдан иборатдир.

Айни пайтда туманимизда 4 079 нафар ногиронлиги бўлган шахслар, 86 нафар ўзгалар парваришига муҳтож кишилар, 42 нафар ёлғиз пенсионерлар истиқомат қилишади. Аҳоли саломатлигини муҳофаза қилишга, ногиронликнинг олдини олишга ва ногиронлиги бўлган шахсларнинг жамият билан уйғунлашиб кетиши учун шарт-шароитлар яратишга, уларда садоқат ва фидойилик, шукроналик туйғуларини шакллантиришга қаратилган кенг кўламли ишлар олиб борилмоқда.
Шу йилнинг 3 декабрида Манғит шаҳрида жойлашган “Нур” тўйхонасида Халқаро ногиронлар кунига бағишланган тадбир бўлиб ўтди. Унда Ногиронлар жамияти туман бўлими,  Кўзи ожизлар жамияти туман бўлими ҳисобида турувчи, якка-ёлғиз яшовчи имконияти чекланган 50 нафар фуқаролар иштирок этдилар.

Тўкин дастурхон атрофидан жой олган ногиронлиги бўлган фуқароларни туман ҳокими ўринбосари Маҳмуджон Шерметов, Маҳалла ва оилани қўллаб-қувватлаш бўлими бошлиғи ўринбосари Муқаддас Бекназарова, Ногиронлар жамияти туман бўлими бошлиғи Нилуфар Холбоева, Қўнғирот туман Кўзи ожизлар жамияти раиси Махсет Қиличевлар байрам билан қизғин қутладилар.

Туман ҳокимлиги ташаббуси билан ташкиллаштирилган байрам тадбирида меҳмонларга халқимизнинг миллий таоми – палов тортилди.

Шунингдек, совға-саломлар билан бир қаторда қўлтиқтаёқ, таёқ, аравача, эшитиш мосламаси каби зарур протез ортопедия воситалари ҳам топширилди.

Тадбирда туман Маданият бўлими томонидан тайёрланган махсус концерт дастури намойиш этилди.

Шунингдек, туман ахборот – кутубхона маркази ходимлари томонидан “Ҳеч ким меҳр-эътибордан четда қолмайди” шиори остида китоблар кўргазмаси ташкил этилди, китобсевар имконияти чекланган меҳмонларга китоблар совға қилинди.

Бу каби хайрли ишларнинг амалга оширилишида катта маъно бор. Чунки давлатимиз сиёсатида ҳам, муқаддас динимизда ҳам инсон энг азиз ва мукаррам саналади. Кўнгли ярим, имконияти чекланган инсонларга қувонч улашиш, уларнинг байрам кунларида бир дастурхон атрофида ўтириб, самимий суҳбатлашишлари, дийдорлашишлари учун имконият яратиш ҳам савобдир.

Ойгул РАЖАБОВА.