“ЯШИЛ МАКОН” ЛОЙИҲАСИ АСОСИДАГИ “ДОЛЗАРБ 40 КУНЛИК” АКЦИЯСИ ДОИРАСИДА ЎТКАЗИЛАЁТГАН ТАДБИРЛАР ҲАР БИР ҚАЛБГА МАЪНАВИЙ РУҲ БАҒИШЛАМОҚДА

Ота-боболаримиз бекорга: “кўчат эк, боғ ярат, бугун сен эксанг, эртага роҳатини фарзандларинг  кўради”, дейишмаган. Шу боис, бугун биз ёзнинг  жазирамасида соясида салқинлаб, меваларидан баҳраманд бўлаётган дов-дарахтлар, боғ-роғларни экиб, ўзларидан бебаҳо маънавий мерос қолдирган ота-боболаримиз ишини давом эттириш – кўчат экиш ҳам маънавий қадриятдир.

Президентимиз ташаббуслари билан малакатимиз бўйлаб кенг қулоч ёйган “Яшил макон” лойиҳаси асосидаги “Долзарб 40 кунлик” акцияси  доирасида амалга оширилаётган тадбирлар ҳам ҳар бир фуқаро қалбида кўчат экиб, боғ яратишга нафақат ихлос ва иштиёқ туйғусини, балки ўзи яшаётган, меҳнат қилаётган маконни  табиий ривожлантириш, яшил масканларга айлантириш истагини уйғотгани билан муҳим аҳамият касб этмоқда.

“Яшил   макон”  лойиҳаси асосида эълон қилинган “Долзарб 40 кунлик” акцияси доирасида Чойкўл овулидаги 42-сонли умумтаълим мактаби ўқитувчилар жамоаси ҳамда ўқувчи-ёшлари ҳам фаол иштирок  этишмоқда. Аввало, мактаб ҳудудидаги табиий равишда ўсган туронғи дарахтларига шакл берилиб, янгидан ўсиб чиққан туронғи ниҳоллари алоҳида тартибга келтирилди. Мактаб биноси атрофидаги ариқлар ва ёндош ариқчалар кузги хас-хазонлардан тозаланиб, ўқитувчилар ва ўқувчиларнинг шахсий ташаббуслари билан янги кўчатлар экиш учун тартиб билан чуқурчалар тайёрланди. Мактаб атрофидаги 0,35-0,40 сотих атрофидаги ерга  15-16 ноябрь кунлари 200 тупга яқин мевали ва манзарали дарахт кўчатлари ўтқазилди.

“Долзарб 40 кунлик” акциячи доирасида қуйи синфларда “Атрофимиздаги олам мўъжизалари” мавзусида табиатни ўрганишга бағишланган дарс-машғулотлар, юқори синфларда “Ўз яшаш масканимиз ва мактабимиз ҳудудини яшилликка буркаймиз!” шиори остида давра суҳбатлари, “Табиат - онамиз” мавусида гуруҳлараро савол-жавоб тадбирлари ўтказилиб, ўқувчи-ёшлар ўзларининг она табиатга муносабатларини ифода этувчи иншолар, баёнлар ёздилар.
“Долзарб 40 кунлик” акцияси доирасидаги тадбирлар 17 ноябрь куни ҳам давом эттирилиб, ўқувчи-ёшлар ўзлари олиб келган турли хил мевали дарахт кўчатларини мактаб боғига экдилар. Шунингдек, “Кўчат экиш ҳам юксак маънавият” мавзусида ўқитувчилар томонидан ташкил этилган давра суҳбатларидан баҳраманд бўлдилар.

Акция доирасида фаол иштирок этаётган ўқитувчи ва ўқувчи-ёшлар бошқаларга намуна қилиб кўрсатилди ва ушбу хайрли ишни янада жипслик билан давом эттириш борасида янги режалар ҳам белгилаб олинди.

Робия ЙЎЛДОШЕВА, 42-сонли мактабнинг ижодий-маданий

масалалар бўйича тарғиботчиси.