“YaShIL MAKON” LOYIHASI ASOSIDAGI “DOLZARB 40 KUNLIK” AKTsIYaSI DOIRASIDA OʻTKAZILAYoTGAN TADBIRLAR HAR BIR QALBGA MAʼNAVIY RUH BAGʻIShLAMOQDA

Ota-bobolarimiz bekorga: “koʻchat ek, bogʻ yarat, bugun sen eksang, ertaga rohatini farzandlaring  koʻradi”, deyishmagan. Shu bois, bugun biz yozning  jaziramasida soyasida salqinlab, mevalaridan bahramand boʻlayotgan dov-daraxtlar, bogʻ-rogʻlarni ekib, oʻzlaridan bebaho maʼnaviy meros qoldirgan ota-bobolarimiz ishini davom ettirish – koʻchat ekish ham maʼnaviy qadriyatdir.

Prezidentimiz tashabbuslari bilan malakatimiz boʻylab keng quloch yoygan “Yashil makon” loyihasi asosidagi “Dolzarb 40 kunlik” aktsiyasi  doirasida amalga oshirilayotgan tadbirlar ham har bir fuqaro qalbida koʻchat ekib, bogʻ yaratishga nafaqat ixlos va ishtiyoq tuygʻusini, balki oʻzi yashayotgan, mehnat qilayotgan makonni  tabiiy rivojlantirish, yashil maskanlarga aylantirish istagini uygʻotgani bilan muhim ahamiyat kasb etmoqda.

“Yashil   makon”  loyihasi asosida eʼlon qilingan “Dolzarb 40 kunlik” aktsiyasi doirasida Choykoʻl ovulidagi 42-sonli umumtaʼlim maktabi oʻqituvchilar jamoasi hamda oʻquvchi-yoshlari ham faol ishtirok  etishmoqda. Avvalo, maktab hududidagi tabiiy ravishda oʻsgan turongʻi daraxtlariga shakl berilib, yangidan oʻsib chiqqan turongʻi nihollari alohida tartibga keltirildi. Maktab binosi atrofidagi ariqlar va yondosh ariqchalar kuzgi xas-xazonlardan tozalanib, oʻqituvchilar va oʻquvchilarning shaxsiy tashabbuslari bilan yangi koʻchatlar ekish uchun tartib bilan chuqurchalar tayyorlandi. Maktab atrofidagi 0,35-0,40 sotix atrofidagi yerga  15-16-noyabr kunlari 200 tupga yaqin mevali va manzarali daraxt koʻchatlari oʻtqazildi.

“Dolzarb 40 kunlik” aktsiyachi doirasida quyi sinflarda “Atrofimizdagi olam moʻʼjizalari” mavzusida tabiatni oʻrganishga bagʻishlangan dars-mashgʻulotlar, yuqori sinflarda “Oʻz yashash maskanimiz va maktabimiz hududini yashillikka burkaymiz!” shiori ostida davra suhbatlari, “Tabiat - onamiz” mavusida guruhlararo savol-javob tadbirlari oʻtkazilib, oʻquvchi-yoshlar oʻzlarining ona tabiatga munosabatlarini ifoda etuvchi insholar, bayonlar yozdilar.
“Dolzarb 40 kunlik” aktsiyasi doirasidagi tadbirlar 17-noyabr kuni ham davom ettirilib, oʻquvchi-yoshlar oʻzlari olib kelgan turli xil mevali daraxt koʻchatlarini maktab bogʻiga ekdilar. Shuningdek, “Koʻchat ekish ham yuksak maʼnaviyat” mavzusida oʻqituvchilar tomonidan tashkil etilgan davra suhbatlaridan bahramand boʻldilar.

Aktsiya doirasida faol ishtirok etayotgan oʻqituvchi va oʻquvchi-yoshlar boshqalarga namuna qilib koʻrsatildi va ushbu xayrli ishni yanada jipslik bilan davom ettirish borasida yangi rejalar ham belgilab olindi.

Robiya YOʻLDOShEVA, 42-sonli maktabning ijodiy-madaniy

masalalar boʻyicha targʻibotchisi.