МЕҲНАТИ ҚАДР ТОПГАН ОДДИЙ ДЕҲҚОН

Собиқ иттифоқ даврида деярли барча ўқув муассасаларида энг кўринарли жойга “Қишлоқда яшайсанми, техникани ўрган!” деган чақириқнома шиор илиб қўйиларди. Юқори синф ўқувчилари умумтаълим мактабини  тугатганлик ҳақидаги аттестати билан бирга, албатта, тракторчи мутахассислиги бўйича ҳужжатга ҳам эга бўлишарди. Гарчи отаси Хўжамурод ота Аширов савдо соҳаси ходими бўлса-да, оиладаги кенжа ўғил Ёқуббой техникага ихлос қўйди. Мактабни тугатмасданоқ Ёқуббой  ўзи бошқарадиган техникани мукаммал ўрганишга қарор қилди. Тўғри-да, техникаси бузилса, кимга ялиниб юради? Агар уни миридан-сиригача ўрганиб олса, биринчидан, ўзига  яхши, қолаверса, бажарадиган ишида сифат ва самара  бўлади.

Ёқуббой дилидаги ана шу орзусини амалга ошириш мақсадида оиласида ҳеч кимнинг хаёлига келмаган таълим даргоҳини танлади. 1988-1989 йилларда Россиянинг Волгоград вилоятидаги 2-сонли Камышин номли  ҳунар-техника билим юртида токарлик мутахассислиги бўйича таҳсил олди. Ўқишни  тугатиб, хўжаликда ишчи сифатида илк меҳнат фаолиятини бошлаган Ё.Аширов 1989-1992 йилларда ҳарбий хизмат бурчини шараф билан адо этди. Кейинчалик хўжалик ишчиси, Туркманистон Республикасининг Тошҳовуз шаҳридаги махсус автоматика корхонасида монтёр, Қиличбой  хўжалигида ва “Қори бува” фермер хўжалигида тракторчи вазифаларида ҳалол ва фидойи меҳнат қилди.

Агар инсонда юксак назарий билим бўлса-ю, унда қатъият, ўзига ишонч, ташкилотчилик ва тадбиркорлик сифатлари бўлмаса, ўзидаги назарий билимни амалда қўллашга қодир шахс сифатида намоён бўлолмайди. Қишлоқ хўжалиги соҳаси бўйича олий маълумотга эга кўплаб мутахассисларнинг ўзлари танлаган соҳа бўйича кўнгилдагидай иш юритолмасликлари боиси ҳам, назаримда ана шундан.

Агар таъбир жоиз бўлса, Ё.Аширов ўз соҳасининг дипломсиз етук мутахассиси, тўғрироғи, олими. Ер, техника, бошқарув илмини ўз ҳаётий тажрибалари орқали эгаллаган Ё.Аширов 2009-2017 йилларда “Ёқуббой Аширов” фермер хўжалигини маҳорат билан бошқарди. Фермер хўжалиги тасарруфидаги экишлик майдонларидан тортиб, ирригация тармоқлари, ҳар битта техника ва агрегатни муфассал назоратдан ўтказди, камчиликларини  тўлдирди, носоз техникаларни ўзи бош бўлиб тузатди. Ерларнинг мелиоратив ҳолатини яхшилаш мақсадида суғориш тизимларини тозалаб, захкашлар ҳолатини яхшилади. Натижада “Ёқуббой Аширов” фермер хўжалигида пахта ва  бошқа қишлоқ хўжалик экинлари ҳосилдорлиги ошиб, тумандаги илғор хўжаликлар қаторидан жой олди.

Тиниб-тинчимас ва меҳнаткаш Ёқуббой Аширов 2017-2020 йилларда Қиличбой муқобил машина-трактор парки раҳбари сифатида ҳудуддаги фермер хўжаликларига техника хизмати кўрсатиш сифатини замон талаблари даражасига кўтарди. Бу эса деҳқончилик маданиятини юксалтириш имконини берди.

Айни пайтда МЧЖ шаклидаги “Аmudaryotex” хорижий корхонаси пахтачилик кластерининг ҳудудий агрономи ва “Ёқуббой Аширов” фермер хўжалиги раҳбари сифатида фаолият олиб бораётган тажрибали деҳқон ҳар куни далада. Нафақат ўзи раҳбарлик қилаётган фермер хўжалиги, балки пахтачилик кластери билан шартнома тузган фермер хўжаликлари далаларини кезиб, 2021 йилги пахта ҳосилининг салмоғини чамалайди.

Оппоқ маржон тизмаларидай чаноқлардан тошиб турган ҳосил баракасидан мамнун, кайфияти чоғ Ёқуббойни мустақиллик байрами арафасида, эрталабдан йўқловчилар кўп бўлди. Биринчи бўлиб туман ҳокими Султонбой Йўлдашев, сўнг кетма-кет дўстлари, яқинлари “Шуҳрат” медали билан мукофотланганини айтишганида аввало бунга ишонинқирамади. Хушхабар қанот ёзиб, бир зумда бутун туманга тарқалганида фарзандлари интернет тармоғида эълон қилинган Президент Фармонини ўқиб беришди.

Мустақиллигимизнинг 30 йиллиги муносабати билан Президент Фармонига кўра, турли соҳаларда фаолият юритаётган юртдошларимиздан бир гуруҳи фахрий унвон, орден ва медаллар билан мукофотланган эдилар. Мукофотланганлар орасида “Ёқуббой Аширов” фермер хўжалиги раҳбари Ёқуббой Аширов ҳам бор эди.

– Ҳеч кутмагандим, – қувончини яшира олмайди Ёқуббой Аширов. – Интернет тармоғида эълон қилинган Президент Фармонини фарзандларим ўқишаяпти-ю, қулоқларимга ишонмайман. Ахир мен бир оддий деҳқон бўлсам...

Оддий деҳқон! Янгиланаётган Ўзбекистонда меҳнаткаш инсоннинг қадр-қиммати жойига қўйилаётганидан нишона эди бу! Президент Фармонига кўра, қиличбойлик оддий деҳқон Ёқуббой Аширов “Шуҳрат” медали билан тақдирлангани ҳам деҳқоннинг ҳалол ва фидойи меҳнати шарафлангани, қадр топганининг исботи.

Ўзининг ёшлик шижоатини, билим ва салоҳиятини туманимиз иқтисодиётини ривожлантириш, қишлоқ хўжалигини, деҳқончилик маданиятини юксалтиришга бағишлаган Ёқуббой Ашировга мукофот муборак, далалар томон қўяётган ҳар бир қадамингиз баракали, ҳосил хирмонларингиз сарбаланд бўлсин, деймиз.