ҚИПЧОҚ ДАВЛАТ ЎРМОН ХЎЖАЛИГИДА МАХСУС-ТАКТИК ЎҚУВ МАШҒУЛОТИ ЎТКАЗИЛДИ

Қипчоқ давлат ўрмон хўжалигида “Объектда содир бўлган техноген тусдаги фавқулодда вазиятларни бартараф этишдаги ҳаракатлари” мавзусида махсус-тактик ўқув машқи ўтказилди.

Ўқув машқида Қипчоқ давлат ўрмон хўжалиги директори ўринбосари Рустам Досманов, туман Фавқулодда вазиятлар бўлимининг бўлинма бошлиғи капитан Бекзод Тажибаев, туман Фавқулодда вазиятлар давлат тузилмасининг тегишли хизматлари ва Қипчоқ давлат ўрмон хўжалигининг маъсул ходимлари иштирок этдилар.

Тадбир Қорақалпоғистон Республикаси Вазирлар Кенгашининг Раиси – Фуқаро муҳофазаси бошлиғининг шу йил 22 январдаги “Аҳоли ва ҳудудларни фавқулодда вазиятлардан муҳофаза қилиш бўйича 2020 йилда  амалга оширилган тадбирлар ва 2021 йилда устувор вазифалар тўғрисида”ги буйруғи талаблари ҳамда Қорақалпоғистон Республикаси Фавқулодда  вазиятлар бошқармасининг тегишли кўрсатмаларига асосан ташкил этилди.

Табиий ва техноген тусдаги фавқулодда вазиятлар юзага келганда объект раҳбарлар таркиби ҳамда фуқаро муҳофазаси шахсий таркибининг тўғри ҳаракат қилиш кўникмаларини такомиллаштириш мақсадида ташкил этилган ушбу ўқув машғулоти икки босқичда ўтказилди. Биринчи босқичда объектда туман Фавқулодда вазиятлар давлат тузилмаси хизматлари билан саф кўриги ташкил этилди.

Иккинчи босқичда ўрмон хўжалигида ёнғин содир бўлганда жабрланганларни хавфсиз ҳудудга олиб чиқиш, биринчи тиббий ёрдам кўрсатиш, ёнғинни бартараф этиш каби ҳаракатлар бажарилди.

Ундан ташқари, бошқарув органи ва фуқаро муҳофазаси шахсий таркибига ёнғин ўчириш ва қутқарув ишларига тайёргарликни кучайтириш лозимлиги тушунтирилди. Шунингдек, фавқулодда вазиятлар юзага келганда фуқаро муҳофазаси шахсий таркибининг ўз мажбуриятларини аниқ ва тўғри бажариши амалиётда синалди ва камчиликлар ўрганилиб, бартараф этиш чоралари кўрилди. Туман фуқаро муҳофазаси хизматларининг ҳамкорликдаги ҳаракатлари янада такомиллаштирилди.

Ўқув машқига Қипчоқ давлат ўрмон хўжалиги объектининг раҳбар таркиби ва объект фуқаро муҳофазаси тузилмасидан 17 нафар киши ва 3 та техника жалб этилди. Туман Фавқулодда вазиятлар бўлимидан 7 нафар ходим ва 1 та ёнғин ўчириш автомашинаси, туман Ички ишлар бўлимидан 3 нафар ходим ва 1 та махсус техника, электр таъминоти корхонасидан 4 нафар киши ва 2 та техника, Ҳудудгаз газ таъминоти корхонасидан 6 нафар киши ва 1 та махсус техника иштирок этди.

Шунингдек, туман Санитария эпидемиология осойишталик ва жамоат саломатлиги хизматидан 8 нафар киши ва 1 та махсус техника, Тоза ҳудуд давлат унитар корхонасидан 2 нафар киши ва 1 та махсус техника, туман Йўллардан фойдаланиш унитар корхонасидан 1 нафар киши, Сув таъминоти бўлимидан 4 нафар киши қатнашди. Тадбирда 56 нафар киши ва 10 та махсус техникалар иштироки таъминланди.

Х.Матякубов, туман ФВБ бошлиғи подполковник.