QIPChOQ DAVLAT OʻRMON XOʻJALIGIDA MAXSUS-TAKTIK OʻQUV MAShGʻULOTI OʻTKAZILDI

Qipchoq davlat oʻrmon xoʻjaligida “Obʼektda sodir boʻlgan texnogen tusdagi favqulodda vaziyatlarni bartaraf etishdagi harakatlari” mavzusida maxsus-taktik oʻquv mashqi oʻtkazildi.

Oʻquv mashqida Qipchoq davlat oʻrmon xoʻjaligi direktori oʻrinbosari Rustam Dosmanov, tuman Favqulodda vaziyatlar boʻlimining boʻlinma boshligʻi kapitan Bekzod Tajibayev, tuman Favqulodda vaziyatlar davlat tuzilmasining tegishli xizmatlari va Qipchoq davlat oʻrmon xoʻjaligining maʼsul xodimlari ishtirok etdilar.

Tadbir Qoraqalpogʻiston Respublikasi Vazirlar Kengashining Raisi – Fuqaro muhofazasi boshligʻining shu yil 22-yanvardagi “Aholi va hududlarni favqulodda vaziyatlardan muhofaza qilish boʻyicha 2020-yilda  amalga oshirilgan tadbirlar va 2021-yilda ustuvor vazifalar toʻgʻrisida”gi buyrugʻi talablari hamda Qoraqalpogʻiston Respublikasi Favqulodda  vaziyatlar boshqarmasining tegishli koʻrsatmalariga asosan tashkil etildi.

Tabiiy va texnogen tusdagi favqulodda vaziyatlar yuzaga kelganda obʼekt rahbarlar tarkibi hamda fuqaro muhofazasi shaxsiy tarkibining toʻgʻri harakat qilish koʻnikmalarini takomillashtirish maqsadida tashkil etilgan ushbu oʻquv mashgʻuloti ikki bosqichda oʻtkazildi. Birinchi bosqichda obʼektda tuman Favqulodda vaziyatlar davlat tuzilmasi xizmatlari bilan saf koʻrigi tashkil etildi.

Ikkinchi bosqichda oʻrmon xoʻjaligida yongʻin sodir boʻlganda jabrlanganlarni xavfsiz hududga olib chiqish, birinchi tibbiy yordam koʻrsatish, yongʻinni bartaraf etish kabi harakatlar bajarildi.

Undan tashqari, boshqaruv organi va fuqaro muhofazasi shaxsiy tarkibiga yongʻin oʻchirish va qutqaruv ishlariga tayyorgarlikni kuchaytirish lozimligi tushuntirildi. Shuningdek, favqulodda vaziyatlar yuzaga kelganda fuqaro muhofazasi shaxsiy tarkibining oʻz majburiyatlarini aniq va toʻgʻri bajarishi amaliyotda sinaldi va kamchiliklar oʻrganilib, bartaraf etish choralari koʻrildi. Tuman fuqaro muhofazasi xizmatlarining hamkorlikdagi harakatlari yanada takomillashtirildi.

Oʻquv mashqiga Qipchoq davlat oʻrmon xoʻjaligi obʼektining rahbar tarkibi va obʼekt fuqaro muhofazasi tuzilmasidan 17 nafar kishi va 3 ta texnika jalb etildi. Tuman Favqulodda vaziyatlar boʻlimidan 7 nafar xodim va 1 ta yongʻin oʻchirish avtomashinasi, tuman Ichki ishlar boʻlimidan 3 nafar xodim va 1 ta maxsus texnika, elektr taʼminoti korxonasidan 4 nafar kishi va 2 ta texnika, Hududgaz gaz taʼminoti korxonasidan 6 nafar kishi va 1 ta maxsus texnika ishtirok etdi.

Shuningdek, tuman Sanitariya epidemiologiya osoyishtalik va jamoat salomatligi xizmatidan 8 nafar kishi va 1 ta maxsus texnika, Toza hudud davlat unitar korxonasidan 2 nafar kishi va 1 ta maxsus texnika, tuman Yoʻllardan foydalanish unitar korxonasidan 1 nafar kishi, Suv taʼminoti boʻlimidan 4 nafar kishi qatnashdi. Tadbirda 56 nafar kishi va 10 ta maxsus texnikalar ishtiroki taʼminlandi.

X.Matyakubov, tuman FVB boshligʻi podpolkovnik.