ХАВФСИЗЛИК ҚОИДАЛАРИГА РИОЯ ҚИЛИШ – ТУРМУШИМИЗ ОСОЙИШТАЛИГИНИ ТАЪМИНЛАЙДИ

Аҳоли хонадонларини иситиш тизими ва ёқилғи маҳсулотларидан фойдаланишда фавқулодда вазиятлардан ҳимоя қилиш, юртдошларимизнинг тинч ва осойишта яшашларига эришиш борасида туманимизда кўпгина чора-тадбирлар амалга оширилмоқда. Чунки инсон ҳаёти бебаҳо. Ўтган йиллар давомида юртимизда ёнғинлар, газ ва ҳаво аралашмасининг чақнаши, ис газидан заҳарланиш каби содир бўлган нохуш ҳодисаларни унутиб бўлмайди. Келгусида туманимизда бунингдек кўнгилсизликлар содир бўлишининг олдини  олишга қаратилган ишлар кенг миқёсда олиб борилаётир.

Туманимиз ҳудудидаги корхона, ташкилотлар бинолари, аҳоли яшаш жойларида содир бўлиши мумкин бўлган ёнғинлар, газ ва ҳаво аралашмасининг чақнаши, фуқароларнинг ис газидан заҳарланишининг олдини олиш мақсадида 4 та секторлар кесимида фавқулодда вазиятлар, ички ишлар бўлимлари, ҳокимлик, соғлиқни сақлаш, ёнғинга қарши кураш жамияти 44 нафар кишидан иборат вакилларидан тузилган таъмирловчи-тикловчи отрядлар фаолияти йўлга қўйилди. Улар 15 та овул ва маҳаллаларда шу кунга қадар 25 та рейд текширувларини ўтказишди.

 Рейдлар давомида 14548 та уйлар, 12 та кўп қаватли уйлардаги 174 та хонадонларда табиий газдан, электр энергиясидан ва ёқилғилардан фойдаланиш ҳолати назорат қилинди ва 472 та камчиликлар аниқланди. Булар дудбуронларнинг носозлиги, резина шланглар орқали газ мосламаларига уланиш, газ сўрғичлардан фойдаланиш, иситиш печ (қозон)ларнинг носозлиги кабилардир. Шу кунгача аниқланган ушбу камчиликлардан 378 та носоз дудбуронлар таъмирланди,табиий газ тармоғига уланган ностандарт резина шланглар ва газ сўрғичлар далолатнома асосида олиб қўйилди ва ёнғин ҳавфсизлиги қоидаларига риоя этиш юзасидан аҳоли билан суҳбатлар олиб борилди.

Ҳозирги кунда туман ҳудудидаги 94 та давлат тасарруфидаги объектларда текширувлар, 134 та тадбиркорлик субъектларида ёнғин профилактика кўриги ўтказилди ва аниқланган камчиликлар бартараф этилаяпти.

Ўтказилган текширишлар жараёнида аниқланган камчилик ва нуқсонлар юзасидан туман ҳокимлигига 4 та, туман прокуратурасига 4 та ахборот хатлари, электр ва табиий газ идораларига 6 та, бошқа идораларга 3 та тақдимномалар киритилди.

Бу борада олиб борилаётган ишлардан кўзланган асосий мақсад туманимиз ҳудудида фуқароларнинг ис газидан заҳарланиши, ёнғинлар туфайли жабрланишининг олдини олишга қаратилгандир.

Мана куз фасли охирлаб, қишнинг совуқ, аёзли кунлари яқинлашмоқда. Айни кунларда  ҳам давлат тасарруфидаги объектларда, аҳоли яшаш хонадонларида иситиш тизими юртдошларимизнинг осойишта яшаб, ишлашларига хизмат қилаяпти. Фуқаролар бунда қўлбола ностандарт иситиш печлардан фойдаланмаслиги, ёнғин хавфсизлиги қоидаларига риоя қилишлари талаб этилади. Бу – фавқулодда ҳолатлар содир бўлишининг олдини олишга хизмат қилишини унутмаслигимиз керак.

Ғ.ЎРАЛОВ, туман Фавқулодда вазиятлар бўлими бошлиғи ўринбосари.