Вариатив синфидаги барча битирувчилари юз фоиз талаба бўлган 56-сонли мактабда семинар ўтказилди

Бугунги кунда мамлакатимизда барча соҳалар қатори таълим соҳасини ривожлантиришга ҳам алоҳида эътибор берилаяпти. Шу боисдан ҳам юртимизда “Янги Ўзбекистон – мактаб остонасидан, таълим-тарбия тизимидан бошланади” деган ғоя асосида кенг кўламли ислоҳотлар амалга оширилаяпти. Булар мактаб таълимини тубдан яхшилаш ва унинг сифатини ошириш, муаллимларга муносиб шароит яратиш борасидаги ишларда яққол кўриниб турибди.

Ўзбекистон Республикаси Президентининг 2019 йил 29 апрелдаги Фармони билан тасдиқланган Ўзбекистон Республикаси Халқ таълими тизимини 2030 йилгача ривожлантириш концепциясини  2019 йилда амалга  оширишнинг йўл харитасида белгиланган бандларини амалга ошириш мақсадида 2019 йилнинг 28 декабрида Халқ таълими вазирининг “Умумий ўрта таълим мактабларида вариатив ўқув режаларни тажриба-синовдан ўтказиш тўғрисида”ги буйруғи қабул қилинган эди. Ушбу буйруқ асосида мамлакатимизнинг бир қанча умумтаълим мактабларида вариатив синфлар ташкил этилди.

Жорий йилнинг 8 октябрь куни 56-сонли мактабда мазкур мактабда фаолият юритаётган илғор ўқитувчиларининг вариатив ўқув режалари асосида ўқитиш борасидаги тажрибаларини оммалаштиришга бағишланган семинар ўтказилди.

Айтиш жоизки, туманимиздаги 56-сонли мактабнинг математика фани ўқитувчиси Азимбой Сапарбоев туманимизда биринчилардан бўлиб вариатив синф ташкил этишнинг ташаббускори бўлди.

Бугунги кунда мактабда Азимбой Сапарбоевнинг шогирдларидан Хушнуд Чоршамов ва Нафосат Тиловбоевалар ҳам вариатив синфларда дарс ўтиш жараёнларини янада такомиллаштириш йўлида астойдил ҳаракат қилмоқдалар.

Бу ташаббускор ўқитувчиларнинг ўқувчиларга янгича услубда таълим бериш борасидаги ҳаракатлари таҳсинга сазовор бўлмоқда. Уларнинг фидойиликлари туфайли 2020-2021 ўқув йили якунига кўра умумий ўрта таълим мактабларида вариатив ўқув режалар асосида ташкил этилган синфлар ўқувчиларининг олий ўқув юртларига қабул қилиниши  борасидаги рейтинг натижаларига кўра 56-сонли мактаб Қорақалпоғистон Республикасида биринчи ўринни эгаллади.

Мактабнинг математика фани ўқитувчиси Азимбой Сапарбоев, физика фани ўқитувчиси Хушнуд Чоршамов ҳамда она тили ва адабиёт фани ўқитувчиси Нафосат Тиловбоеваларнинг ўқув жараёнини ташкил этишда ўқувчи манфаатларини инобатга олиш, ўқув жараёнини компетенциявий  ёндашув  асосида ташкил этиш, ўқув жараёнини ўқувчиларнинг индивидуал  хоҳишларига мувофиқ вариатив ўқув режалар асосида ташкил этиш, ўқувчиларнинг олий таълим муассаларига киришда имтиҳон топширадиган фанларни чуқур ўрганишларига шароитлар яратиш борасидаги ҳаракатлари яхши натижаларни берди.

Бунга мактабда ташкил этилган вариатив синфлар битирувчиларидан 94 фоизининг олий таълим муассасаларига ўқишга кирганлиги яққол мисол бўла олади.

Мазкур илғор ўқитувчиларнинг тажрибаларини оммалаштиришга бағишлаб ўтказилган семинарда туман халқ таълими  бўлими ходимлари ва умумтаълим мактаблари ўқитувчилари иштирок этдилар.

Семинар иштирокчилари дастлаб мактабда ташкил этилган вариатив синфларда дарс ўтиш жараёнлари билан танишдилар ва математика фани  ўқитувчиси Азимбой Сапарбоев, она тили ва адабиёт фани ўқитувчиси Нафосат Тиловбоева ҳамда физика фани ўқитувчиси Хушнуд Чоршамовларнинг  дарс ўтиш услубларини ўргандилар.

Шундан кейин семинарнинг иккичи қисми бошланиб, уни туман Халқ таълими бўлими таълим сифати мониторинги бош инспектор-методисти Рашан Холмуродов кириш нутқи сўзлаб очди ва олиб борди.

Семинарда 56-сонли умумтаълим мактабининг математика фани ўқитувчиси, Ўзбекистон Республикаси Халқ таълими аълочиси, “Қорақалпоғистон Республикасида хизмат кўрсатган халқ таълими ходими” фахрий унвони  соҳиби Азимбой Сапарбоев ва физика фани ўқитувчиси, Қорақалпоғистон Республикаси Халқ таълими аълочиси Хушнуд Чоршамовлар сўзга чиқишиб, вариатив синфларда ўқитиш юзасидан ўзларининг иш тажрибалари ҳақида гапирдилар.

Шундан кейин 21-сонли мактаб директори Турсунбой Дўсчонов ва 50-сонли мактаб директори Алишер Эшниёзовлар сўзга чиқишиб, мактабда ташкил этилган вариатив синфлар ва уларнинг ўқитувчилари фаолиятига катта баҳо бердилар, бу ердаги илғор тажрибаларни тумандаги барча ўрта таълим муассасаларига кенг ёйиш бўйича ўз таклиф ва истакларини билдирдилар.

Семинар якунида мактаб директори, Қорақалпоғистон Республикаси Халқ таълими аълочиси Арзигул Худойберганова сўзга чиқиб, мактаб ўқитувчиларининг иш тажрибаларини оммалаштиришга қаратаётган эътибори учун туман Халқ таълими бўлими раҳбариятига ўз миннатдочилигини билдирди ва мактаб жамоасининг вариатив синфлар фаолияти билан танишишни, бу ердаги ўқитувчиларнинг иш тажрибаларини ўрганишни хоҳловчилар учун доимо ёрдамга тайёр эканлигини маълум қилди.

Шу билан 56-сонли мактаб ўқитувчиларининг вариатив ўқув режалари асосида фаолият кўрсатадиган синфларни ташкил этиш ва ўқитиш борасидаги тажрибаларини оммалаштиришга бағишлаган семинар ўз ишини якунлади.

А.ЖУМАНИЁЗОВ, мактабнинг ижодий-маданий масалалар бўйича тарғиботчиси.