БОШЛАНҒИЧ СИНФ ЎҚИТУВЧИЛАРИ ЎЗАРО ТАЖРИБА АЛМАШДИЛАР

Сентябрь – Бошланғич таълим фан ойлиги доирасида 1-сонли умумтаълим мактабида бири-биридан қизиқарли тадбирлар ўтказилди. Хусусан, “Математика – барча фанлар калити”, “Кимнинг хати чиройли”, “Ёш рассомлар”, “Ёш математиклар”, “Моҳир қўллар кўрик-танловлари ташкил этилиб, ушбу кўрик-танловларда барча бошланғич синфлар ўқувчиларининг иштироки таъминланди.

2 октябрь куни ойлик доирасидаги барча тадбирлар умумлаштирилиб, Ўқитувчи ва мураббийлар куни  байрами муносабати билан “Биз Янги Ўзбекистон келажагимиз!” мавзусида якуний  тадбир ўтказилди.

Фан ойлиги доирасида “Кимнинг хати чиройли” кўрик-танловида 2-,3-,4-синфлар ўқувчилари ўртасида диктантлар ёзиш бўйича мусобақалар ўтказилди. “Ёш математиклар”, “Метаматика – барча фанлар калити”, “Моҳир қўллар”, “Ёш рассомлар” кўрик-танловлари иштирокчилари турли хил математик амалларни бехато бажариш, бошқотирмалар ечиш, табиат манзараларини чизиш, оддий ипак ва қоғозлардан, газлама қирқимларидан чиройли буюмлар ясаш бўйича баҳслашдилар. Мазкур кўрик-танловлар якунида ғолиблар аниқланиб, мактаб маъмурияти томонидан фахрий ёрлиқлар билан тақдирландилар.

Шунингдек, фан ойлиги доирасида бошланғич синфлар ўқитувчилари, намунали очиқ дарслар ташкил этишди. Ўқитувчилар ўртасида “Энг яхши дарс ишланмаси”, “Энг яхши кўргазмали қуроллар” кўрик-танловлари ҳам ўтказилиб, бошланғич синф ўқитувчиларининг дарс ўтиш маҳорати, ўз синфида деворий газеталарни безатиш бўйича диди ва услуби синовдан ўтказилди. Ҳар бир синф ўқитувчиси томонидан ташкил этилган очиқ дарсни мактабнинг бошланғич таълим услуббирлашма аъзолари ва малакали ўқитувчилар, ота-оналар қўмитаси аъзолари кузатиб бордилар.

Тадбирда фан ойлиги доирасида фаол иштирок этган ўқувчилар, шунингдек, ўтказилган кўрик-танловлар ғолибларининг номлари алоҳида эътироф этилиб, мактаб маъмурияти томонидан рағбатлантирилди. Бошланғич синф ўқитувчилари ўртасида ўтказилган “Энг яхши” кўргазмали қуроллар” ва “Энг яхши дарс ишланмаси” кўрик-танловлари ғолибларининг номлари алоҳида эътироф этилди ва муносиб тақдирланди.

Шунингдек, тадбирда “Энг яхши деворий газета”ни тайёрлашда фаол иштирок этган ёш ижодкор-ўқувчилар ҳам аниқланди. Ёш ижодкор-ўқувчилар ҳам фахрий ёрлиқлар билан тақдирландилар.

Бошланғич таълим фан ойлиги доирасида мактабда ўтказилган барча тадбирлар ўқувчилар ва ўқитувчиларнинг ойлик доирасида эришган ютуқ ва камчиликлари юзасидан ҳисобот ҳамда таълим соҳасида амалга оширилаётган ислоҳотлар самараси сифатида қайд этилди.

Шу билан бирга бошланғич таълим фанлари ўқитувчилари эришилган ютуқлари бўйича бир-бирлари билан тажриба алмашиб, камчиликларини муҳокама этдилар.

Робия ЙЎЛДОШЕВА.