ХИТОЙ ОВУЛИДА “МЕҲНАТИ ЭЛДА АЗИЗ УСТОЗИМ” ДЕБ НОМЛАНГАН БАЙРАМ ТАДБИРИ ЎТКАЗИЛДИ

Туманимизда Устозлар ва мураббийлар куни кенг миқёсда, тантанали равишда нишонланди. Айниқса, таълим масканларида ушбу байрам муносабати билан турли тадбирлар ўтказилди.
Хитой овулида ҳам 85- ва 2-сонли умумтаълим мактаблари ўқитувчи ва ўқувчилари иштирокида “Меҳнати элда азиз устозим” деб номланган бадиийлаштирилган байрам кечаси ўтказилди. Кечада таълим масканларида фаолият кўрсатиб келаётган устоз-мураббийлар, соҳада кўп йиллар меҳнат қилган фахрийлар ва бошқалар қатнашишди.
Байрам кечасини 85-сонли умумтаълим  мактабининг она тили ва адабиёти фани ўқитувчиси Моҳира Эрдонова кириш сўзи билан очди ва бошқариб борди. Иккала мактаб ўқувчилари томонидан ҳам байрамга қизғин тайёргарликлар кўрилгани кеча бошланишидаёқ намоён бўлиб, барчанинг кўнглига завқ бағишлади. Айниқса, 5-,6-,7-,8-синф ўқувчиларининг устозлар ҳақида турли халқ тилларида ижро этган шеърлари барчага жуда манзур бўлди.
Қорақалпоқ тили фани ўқитувчиси Қурбоной Дуйсенбоева, фахрий ўқитувчи Турсунбой Абдуллаевлар барчани умумхалқ байрами билан муборакбод этиб, устоз ва мураббийлар шаънига илиқ фикрлар билдирдилар. Кеча давомида 7-синф ўқувчи қизлари ижро этган оммавий рақс, 9-синф қизлари ижросидаги “Мустазод” рақслари барчага хушкайфият бағишлади.
Меҳнат фахрийси, шифокор Тожибой ҳожи Бозорбоев барчани  байрам билан табриклаб, Хитой овулидан етишиб чиққан таниқли инсонлар ҳақида сўзлади. Бу инсонлар ҳам шу мактаблар парталарида ўтириб, устозларидан чуқур билим олганлари, бугунги кунда оламга машҳур инсонлар бўлиб етишганлигини фахр билан айтиб ўтди.
Шундан сўнг, 7-синф ўқувчи-қизлари “Сумбула” қўшиғига рақс ижро этиб, мусиқа ва санъат соҳасида ҳам иқтидорларини шакллантиришаётганини намоён этишди.
Байрам кечасида туманда фаолият олиб бораётган ёш ижодкорларнинг “Жайхун илҳомлари” нодавлат нотижорат ташкилоти раиси Ўрозали Рейимов ҳам сўзга чиқиб, соҳа фидойиларини табриклади. Мамлакатимизда ёш авлоднинг келажакда онгли, билимли, зукко бўлиб етишишларига барча имкониятлар яратиб қўйилганлиги, бу борада устоз-мураббийларнинг меҳнатлари беқиёс эканлигига алоҳида тўхталиб ўтди.
Кеча давомида 9-синф ўқувчилари ижро этган “Бешта муҳим ташаббус” қўшиғи ҳам барчага манзур бўлди. Қўшиқ орқали ўқувчилар мамлакатимиз ёшларининг ҳар томонлама етук инсонлар бўлиб камолга етишида нақадар улкан мақсадлар олға қўйилганлигини фахр билан баён этишди. Дарҳақиқат, бешта ташаббус ижросини таъминлаш билан ёш авлод барча кўзлаган чўққиларини забт этишига асло шубҳа йўқ.
Ўқувчи-қизлар мактаб саҳнасида инглизча қўшиқ ва рақс ижро этишиб, мактабда фақат чет тилларни ўрганибгина қолмай, қардош халқларнинг мусиқаси, санъати, маданияти билан ҳам таниш эканликларини яна бир бор намойиш этдилар.
Тадбирда бошланғич синф ўқитувчиси Зебо Собурова ҳам устозлар ҳақида самимий сўзлар айтиб, ўзининг чуқур эҳтиромини кўрсатди. Шундан сўнг, 2-сонли умумтаълим мактабининг ижодий-маданий масалалар бўйича тарғиботчиси, фахрий ўқитувчи Аҳмад Нафасов барчани байрам билан қутлаб, “Устозларга” деб номланган шеърини ўқиб берди.
Байрам кечаси куй-қўшиқлар, табриклар билан мазмунли ўтди.

(Махсус мухбиримиздан)