“Оила – муқаддас, фарзанд – азиз!” шиори остида тарғибот тадбири ўтказилди

Амударё туманида жорий йил 8 ой ҳолатига 92 та оилавий ажрашишлар қайд этилган бўлиб, ўтган йилнинг шу даврига нисбатан 42 тага ошган. Бу каби салбий ҳолатларнинг олдини олиш, оилаларда маънавий-ахлоқий муҳитни янада яхшилаш, оилавий ажрашишларга барҳам бериш, ёшларда оилага бўлган маъсулиятни янада ошириш бугунги кунинг муҳим масаласи бўлиб қолмоқда.

Шу боис, маҳаллаларда истиқомат қилаётган оилаларда умуминсоний ва миллий, оилавий қадриятларни мустаҳкамлаш, фарзандларни юксак одоб-ахлоқ тамойиллари асосида тарбиялаш, уларнинг онги ва қалбини ғоявий таҳдидлардан ҳимоя қилиш, соғлом турмуш тарзини тарғиб қилиш мақсадида Ўзбекистон Республикаси Президентининг 2020 йил 18 февралдаги Фармони ижросини таъминлашга қаратилган кенг қамровли ишлар амалга оширилмоқда.

Жамиятнинг бетакрор ижтимоий тузилмаси ҳисобланган маҳалла институтини аҳолининг чинакам маслакдоши ва кўмакдошига айлантириш, жамиятда “Обод ва хавфсиз маҳалла” тамойилининг тўлақонли ва самарали жорий этилишига ҳар томонлама кўмаклашиш, оила институтини мустаҳкамлаш бўйича, энг аввало, “Соғлом оила – соғлом жамият” ғоясини ҳаётга тадбиқ этиш мақсадида жорий йилнинг 25 августидан 25 сентябригача “Оила - муқаддас, фарзанд - азиз!” шиори остида тарғибот ойлиги ўтказилмоқда.

Тарғибот ойлиги доирасида Беруний номли маҳалла фуқаролар йиғинида “Оила - муқаддас, фарзанд - азиз!” шиори остида ўтказилган тадбирда ҳам оилаларда маънавий-ахлоқий муҳитни янада яхшилаш, оилавий низоларнинг олдини олиш, ёшларда оилага бўлган маъсулиятни ошириш, бой илмий-маданий меросимиз, қадимий урф-одат ва анъаналаримизни асраш, тарбиявий, маънавий-маърифий, руҳий-ахлоқий, иқтисодий-ҳуқуқий муносабатларга асосланган ижтимоий бирлик ҳисобланмиш оила муқаддаслигини тарғиб қилиш, ҳар бир ота-онанинг фарзанд тарбиясидаги бурч ва маъсулиятларини ошириш мақсадида тарғибот тадбири ўтказилди.

Унда Маҳалла ва оилани қўллаб-қувватлаш бўлими бош мутахассиси Гавхар Чимбайчиева, туман Ички ишлар бўлими хотин-қизлар масалалари бўйича катта инспектори Гавҳар Утемуратова, туман халқ таълими бўлими психологи Татьяна Пирлапесова, 27-сонли мактаб психологи Мавлуда Тўраева, Беруний номли, Олмазор, Гулзор, Ойбек номли ва Бўстон маҳаллалари фуқаролар йиғинлари раисларининг оила ва хотин-қизлар масалалари бўйича ўринбосарлари ва мазкур маҳаллалар хотин-қизлари, “Аёллар дафтари”да рўйхатга олинган, психологик кўмакка муҳтож  аёл-қизлар иштирок этдилар.

Тарғибот тадбирида туман Маҳалла ва оилани қўллаб-қувватлаш бўлими бош мутахассиси Гавҳар Чимбайчиева сўзга чиқиб, туманда 8 ой якунларига кўра, оилавий ажрашишлар сони кўпайгани ўта аянчли ҳолат эканлигини ва бунинг олдини олишда маҳаллалардаги Оилавий қадриятларни мустаҳкамлаш комиссияларининг фаолиятини янада жонлантириш лозимлиги, суд ёки фуқаролик ҳолати далолатномаларини ёзиш органидан никоҳдан ажратишга ариза билан мурожаат қилган эр-хотинларни яраштириш учун тегишли чораларни кўриш зарурлиги ҳақида алоҳида тўхталиб ўтди.

Шундан сўнг, туман Ички ишлар бўлими катта инспектори, подполковник Гавҳар Утемуратова маҳаллаларда оилавий низолар, ёшлар тарбиясига эътиборсизлик ҳолатлари, фуқаролар, айниқса, ёшларнинг турли ёт ғоялар таъсирига тушиб қолиши, ичкиликбозлик ҳамда гиёҳвандлик иллатларига берилиши, турли кўринишлардаги ҳуқуқбузарликларнинг содир этилиши  - оилалар барбод бўлишининг асосий сабабларидан бири эканлиги ҳақида тўхталиб, оилалар мустаҳкамлигини таъминлашда маҳалла ва оила ҳамкорлиги, кенг жамоатчилик эътибори жуда муҳимлигини таъкидлади.

Шунингдек, тадбирда туман Халқ таълими бўлими психологи Татьяна Пирлапесова, 27-сонли умумтаълим мактаби психологи Мавлуда Тўраевалар ҳам музокараларда иштирок этишиб, намунали оилаларнинг фарзанд тарбияси борасидаги тажрибаларини ҳамда оила аъзолари ўртасидаги ибратли муносабатларини оммалаштириш, йигит ва қизларни оилавий ҳаётга тайёрлаш, ёш оилаларни ҳар томонлама қўллаб-қувватлашга кўмаклашиш, оиланинг муқаддаслиги ҳақида сўз юритишиб, оилавий муносабатлар бузилишининг олдини олиш тўғрисида ўз фикр-мулоҳазаларини билдирдилар.

Тарғибот ойлиги доирасида бўлиб ўтган мазкур тадбирда 27-сонли мактаб психологи Мавлуда Тўраева ота-оналарнинг фарзанд тарбиясидаги психологик билимларини ошириш, фарзанд тарбиясига етарли эътибор бермаётган ота оналарга ёрдам кўрсатишни амалга ошириш бўйича машғулотлар олиб борди ва зарур йўл-йўриқлар кўрсатди.

Рисолат ИБРАГИМОВА.