Ёшлар иштирокида “Ҳарбийчасига 50 қадам!” шиори остида марафон ўтказилди

Ўзбек халқининг ажойиб орзу-ниятлари бор-да. Оилада ўғил фарзанд дунёга келса: “Ўғил муборак!” дейишдан олдин “аскар қутлуғ бўлсин!” дея бири-бирини табриклашади. Ана шу эзгу тилакнинг замиридахалқимизнинг улкан орзулари, эзгу ниятлари мужассам. Онанинг кўнгли хотиржам, отанинг кўкраги баланд бўлади бундан ва ўғил улғайган сари, она юртига содиқ фарзанд тарбиялаш орзуси билан яшайдилар. Шунинг учун ҳамсевимли шоиримиз Ғафур Ғулом: “Йигит омон бўлса хавф-у хатар ёқ”, деб баралла куйлаганлар. Бўйга етган ўғлонларнинг деярли барчаси она Ватан ҳимоячиси бўлиш, ҳеч бўлмаса, бир марта ҳарбий либос кийиш орзусида яшашади. Буни биз – Амударё туманидаги ДХХ чегара қўшинлари томонидан турли байрам саналарида ўтказилаётган байрам тадбирларида кузатиб, ёшларнинг қалбидаги ватанпарварлик, она юртига садоқат туйғуларининг кучлилигидан фахрланамиз.

Мустақиллигимизнинг шонли 30 йиллигига бағишлаб, ДХХ чегара қўшинлари зобит ва аскарлари томонидан Қиличбой мавзесидаги Қиличбой ОФЙ ҳамда Аёқчи МФЙларида истиқомат қилувчи ёшлар ва уларнинг ота-оналари, кекса авлод вакиллари билан ўтказилган учрашувда мустақил Ватанимизнинг бугуни ва келажаги ҳақида сўз юритилди. Айниқса, ҳарбий зобитлар мамлакатимизда ёшлар учун яратилган шарт-шароит ва имкониятлар, уларнинг ҳарбий соҳани эгаллашлари учун мавжуд олий ҳарбий билим юртлари, махсус лицейлар, “Темурбеклар мактаби” ва улардаги жаҳон андозаларига мос олиб борилаётган ўқув машғулотлари ҳақида ёшларга кенг тушунча ва маълумотлар бердилар ҳамда ёшлар билан самимий мулоқот ўтказдилар.

Шундан сўнг, ёшларни жисмонан бақувват, кучли ва иродали бўлишга ундовчи “Ҳарбийчасига эллик қадам!” шиори остида ҳарбий сафда қадам ташлаб юриш бўйича марафон ташкил этилиб, унда Қиличбой ОФЙ ва Аёқчи МФЙда истиқомат қилувчи барча хоҳловчи ёшлар иштирок этишди. Марафон ўзаро аҳиллик, жанговорлик ва ватанпарварлик руҳида ўтди. Тадбир якунида энг фаол иштирокчиларга ДХХ чегара қўшинласри қўриқлаш бригадаси командири номидан ташаккурномалар тақдим қилинди.

Ёшларни Ватанга муҳаббат, мустақиллик ғояларига ҳурмат ва садоқат руҳида тарбиялаш, жисмонан бақувват ҳамда уларнинг кучли ирода эгалари сифатида камол топишларига кўмаклашиш мақсадида ташкил этилган мазкур тадбир иштирокчи ёшлар қалбидаги ҳарбий ҳаётга ҳавасни янада кучайтиргани билан аҳамиятли бўлди.

Отабек Маҳмудов, ДХХ чегара қўшинлари ҳарбий химатчиси, 1-даражали сержант.

Фото: https://milliygvardiya.uz