ПРОБАЦИЯ ҲИСОБИДАГИ 3 НАФАР МАҲКУМ МУДДАТИДАН ИЛГАРИ ЖАЗОДАН ОЗОД ЭТИЛДИ

24 июль куни Амударё туман суди биносида ўтказилган суд мажлисида тегишли карантин хавфсизлик чоралари кўрилган ҳолда қатъий тузалиш йўлига ўтган 3 нафар пробация ҳисобидаги шахсларни муддатидан олдин шартли равишда озод қилиш тўғрисидаги тақдимномалар кўриб чиқилди.

Ушбу суд мажлисида Жиноят ишлари бўйича Тахиатош туман суди раиси Арман Кошанов, Амударё туман прокурорининг ёрдамчиси Аббоз Ниязимбетов, Амударё тумани Пробация гуруҳи ходими Руслан Искандаров ва 3 нафар маҳкумлар қатнашишди.

Маҳкумлардан бири ўғирлик содир қилгани учун Жиноят кодексининг тегишли моддасига кўра айбланиб, 3 йил муддатга 20 фоиз ахлоқ тузатиш ишлари жазосига ҳукм қилинган. Суд давомида оилали, уч нафар фарзанди бор ушбу шахснинг муқаддам судланмаганлиги, айни пайтда тумандаги корхоналардан бирида ишчи бўлиб ишлаб келаётганлиги маълум бўлди.

Судда, маҳкумнинг жазони ўташ тартиб ва қоидаларига тўлиқ амал қилганлигини, меҳнатга ҳалол муносабатда бўлганлигини ва тайинланган ахлоқ тузатиш ишлари жазосининг учдан бир қисмини, яъни 1 йил 1 ой муддатини ўтаганлигини маълум қилиниб, ўталмаган 1 йил 11 ой муддатидан илгари шартли равишда озод қилиш сўралди.

Шунингдек, ноконуний валюта олди соттиси билан шуғуллангани учун 1 йил муддатга озодликни чеклаш жазосига ҳукм қилинган яна бир маҳкумга доир иш кўрилиб, унинг оилали, уч нафар фарзанди борлиги, муқаддам судланмаганлиги, айни пайтда ишсизлиги аниқланди.

Судда ушбу маҳкум ҳам жазони ўташ қоидаларига, белгиланган таъқиқ ва чекловларга тўлиқ амал қилганлигини ва тайинланган озодликни чеклаш жазосининг учдан бир қисмини, яъни 4 ой муддатини ўтаганлигини маълум қилиниб, ўталмаган 8 ой муддатидан илгари шартли равишда озод қилиш сўралди.

Суд мажлисида фирибгарлик жиноятини содир қилгани учун Жиноят Кодексидаги тегишли моддаларга кўра 1 йил муддатга озодликни чеклаш жазосига ҳукм қилинган яна бир маҳкумни ҳам жазосининг ўталмаган муддатидан муддатидан илгари шартли равишда озод қилиш тўғрисидаги иш кўрилди.

Белгиланган тартиб-қоидаларга амал қилганлиги, муносиб хулқ-атворда бўлганлиги учун ушбу маҳкум ҳам муддатидан илгари жазодан озод этилишга лойиқ кўрилди.

Маҳкумлар ҳам ўзларининг жиноий қилмишларини тўлиқ англаб етганлигини, содир қилган жиноятидан пушаймонлигини, тегишли хулоса чиқарганлигини, жазони ўташ даврида маъмурий жавобгарликка тортилмаганлигини, жазони ўташ тартиб-қоидаларига тўлиқ амал қилганлигини айтиб, тайинланган жазодан муддатидан илгари шартли равишда озод қилишни сўрашди.

Судда Пробация гуруҳи ходими ва прокурорнинг фикрлари, маҳкумларнинг жазони ўташ тартиб ва қоидаларига тўлиқ амал қилганлиги, меҳнатга ҳалол муносабатда бўлганлиги инобатга олинди ва 3 нафар маҳкум муддатидан илгари шартли равишда озод қилиш лозим деб топилди.

Ахлоқ тузатиш ва озодликни чеклаш жазоларини ўтаётган ушбу маҳкумлар жазони ўташ тартиб-қоидаларини сўзсиз бажарганлиги ва меҳнатга ҳалол муносабатда бўлганлиги учун давлатимиз қонунчилигининг инсонпарварлик тамойили асосида жазонинг ўталмаган қисмидан муддатидан илгари шартли озод қилиндилар.

Элёр Жуманиёзов, судья ёрдамчиси.