МАТБУОТ КАМОЛГА ЕТКАЗГАН ИЖОДКОР

Матбуот соҳасида фаолият кўрсатган Жумабой Ҳидоятов ўқувчилик давридан шеърлар машқ қилиб, мактаб жамоасига танилган эди. Кейинчалик шеърлари ўша даврдаги туман газетаси – “Амударё ҳақиқати” саҳифаларида бирин-кетин ёритиб борилди.

Ижодкорнинг Жумуртов қишлоғи ҳақидаги биринчи шеърида қишлоқ қиёфаси ва манзаралари ҳамда заҳматкаш одамлари ифодаланган. Мактаб  ҳаёти ва аълочи ўқувчилар ҳақидаги шеърлари ва  мақолалари Республикадаги болалар газетасида ҳам чоп этила бошлади.

Ҳозир ҳам у 72 ёшдан ошса-да, шеъриятга умрини боғлаб, назм оламида кезишни, изланишни канда қилмайди. Илҳом булоғи тошган кезларда шеърлар битиб туради. Буни “Тараққиёт кўзгуси” газетаси саҳифаларида мунтазам равишда ёритиб келинаётган шеърлар гул-дасталарида ҳам аниқ, равшан кўришимиз мумкин.

Ж.Ҳидоятов сўзга, сўзнинг мазмун-моҳиятига жиддий эътибор беради ва ҳар бир сўзни танлаб ишлатади. 

Унинг ижоди элга танилишида, албатта, матбуотнинг ўрни ва аҳамияти алоҳида бўлди. Чунки у 1980-90 йиллар бошида “Амударё ҳақиқати” газетаси таҳририятида меҳнат қилиб, тажрибасини оширди. Ўша  йилларда газетанинг махсус мухбири сифатида қишлоқ хўжалигининг турли соҳаларида меҳнат қилаётган деҳқонлар, механизаторлар, пиллакор ва чорвадорлар, туманимизнинг маданий-маиший турмуши, устоз ўқитувчилар ҳақида ранг-баранг мақолалар ёзди. Газетанинг ўқишлилигини, халқчиллигини оширишга муносиб ҳисса қўшди.

Мен қаламкаш ижодкор сифатида барча ҳамкасбларимни, шу билан бирга кекса ижодкор Ж.Ҳидоятовни  27 июнь — Матбуот ва оммавий ахборот воситалари ходимлари куни билан қизғин муборакбод этаман.

Қобул Шомуродов, фахрий журналист.