“АЁЛЛАР ДАФТАРИ”ГА КИРИТИЛГАН ХОТИН-ҚИЗЛАРГА ТИКУВ МАШИНАЛАРИ БEРИЛДИ
Президентимиз томонидан жорий йил 26 февраль куни хотин-қизларнинг муаммоларини ҳал қилиш ва уларни ижтимоий қўллаб-қувватлаш масалалари муҳокамаси юзасидан йиғилиши ўтказилган эди. Унга кўра аёллар бандлигини таъминлаш, уларни тадбиркорликка жалб этиш, молиявий қўллаб-қувватлаш борасида бир қатор вазифалар белгиланди.
Мамлакатимиз аҳолисининг қарийб ярми – 17 миллиони хотин-қизлардир. Уларнинг манфаатларини таъминлаш, жамият ҳаётидаги ўрнини мустаҳкамлаш давлатимиз ижтимоий сиёсатининг муҳим йўналишларидан бири ҳисобланади. Қизларнинг сифатли таълим олиши, касб эгаллаб, ишли бўлиши учун катта имкониятлар яратилган. Аёлларнинг тадбиркорлиги, ташаббуслари қўллаб-қувватланаяпти. Ўтган йили 585 мингга яқин хотин-қизларнинг бандлиги таъминланди. Шундан 36 мингдан ортиқ аёллар эса касб-ҳунарга ўқитилди.
Жорий йилда 6 июль куни туман Маҳалла ва оилани қўллаб-қувватлаш бўлими биносида “Аёллар дафтари”га киритилган хотин-қизларнинг муаммоларини тизимли равишда ҳал этиш ва уларни ижтимоий қўллаб-қувватлаш мақсадида “Аёллар дафтари” рўйхатида турган боқувчисини йўқотган, ижтимоий ҳимояга муҳтож 40 нафар аёллар учун жамғарма ҳисобидан тикув машиналари берилди. Тадбир очилишида сўз олган туман ҳокими Султонбой Йўлдашев аёллар бандлигини таъминлаш мақсадида туманда кўплаб ишлар амалга оширилаётганини, жумладан, 40 нафар хотин-қизга тикув машинаси берилганини, бу эса уларнинг бандлигини таъминлаш учун восита бўлиб хизмат қилишини таъкидлади.
Қорақалпоғистон Республикаси Маҳалла ва оилани қўллаб-қувватлаш Вазирининг биринчи ўринбосари Марям Аҳмедова, туман ҳокими Султонбой Йўлдашев, сектор раҳбарлари Ж.Муфтуллаев, У.Худайберганов, А.Сеитовлар иштирокида тикув машиналари ўз эгаларига топширилди. Йиғилишда аёлларни иш билан таъминлаш, ижтимоий қўллаб-қувватлаш, уларга тиббий ва психологик ёрдам қамровини кенгайтириш, оилавий ажралишларнинг олдини олиш чора-тадбирлари муҳокама қилинди.
Амударё туманида ижтимоий ҳимояга, ёрдамга муҳтож хотин-қизларни қўллаб-қувватлаш мақсадида тузилган “Аёллар дафтари”га 1832 нафар ёрдамга муҳтож хотин-қизлар киритилган эди. Кейинчалик ижтимоий, иқтисодий, псиҳологик қўллаб-қувватланиб, бандлиги таъминланди ҳамда 1832 нафар ёрдамга муҳтож аёл-қизлар “Аёллар дафтари”дан чиқарилди. Шунингдек, хотин-қизларни тадбиркорликка жалб қилиш учун ҳудуд банклари орқали кредитлар берилмоқда. Сўнгги йилларда Маҳалла ва оилани қўллаб-қувватлаш вазирлиги раҳбарияти бошчилигида, ишчи гуруҳи тузилиб, барча ҳудудларда аёлларни қийнаётган муаммолар ўрганилиб чиқилмоқда.
Хотин-қизлар бандлигини таъминлаш масаласига алоҳида аҳамият қаратилди. Уларни талаб юқори бўлган касблар ва тадбиркорликка ўқитиш, шу асосда бизнесини йўлга қўйишда молиявий қўллаб-қувватлаш тартибини жорий этиш тадбирнинг асосий вазифаси этиб белгиланди.
Тадбирда олиб борилаётган ишларни тизимли амалга ошириш мақсадида, мамлакатимизда жорий этилган ишсиз ва боқувчисиз хотин-қизлар бўйича алоҳида рўйхатлар шакллантириб, ҳар бири билан янги тизим, янгича тартибда манзилли ишлаш муҳимлиги таъкидланди.
Севара ИСМОИЛОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
