ЁШЛАР – ЭРТАНГИ КУНИМИЗ БУНЁДКОРЛАРИ, КЕЛАЖАГИМИЗ ЭГАЛАРИДИР

Жаннатмакон юртимиз келажагини маънан ва жисмонан соғлом, баркамол авлод яратади. Шундай масъулиятли ва улкан вазифани зиммасига олишга қодир ёшларни камолга етказиш учун эса мамлакатимизда зарур шарт-шароитларни яратишга алоҳида эътибор қаратилмоқда. Бугунги кунда барча имкониятлардан фойдаланиб, замонавий билим ва тафаккурга, соғлом дунёқарашга эга бўлаётган, ривожланган давлатлардаги тенгдошлари билан беллашишга тайёр, навқирон авлод катта ишонч билан ҳаётга дадил кириб келаётгани барчамизни қувонтиради.

Туманда 2021 йил давомида ёшлар билан ишлашнинг янгича тизимини жорий этиш мақсадида “маҳаллабай” ўрганишлар орқали ёшларнинг бандлигини таъминлаш, касб-ҳунарга ўқитиш, тадбиркорликка жалб этиш, шунингдек, улар ўртасида маданият, санъат, спорт, ахборот технологиялари ва китобхонликни ривожлантириш мақсадида янгича тизим асосида 9 та йўналиш, 74 та банддан иборат “Ёшлар дастури” ишлаб чиқилди. Ҳар бир маҳалла кесимида ишсиз, тадбиркорлик фаолияти ҳамда касб-ҳунарга ўқиш истагида бўлган, ижтимоий муаммоли 6 минг 753 нафар ёшлар рўйхати шакллантирилиб, “Ёшлар дафтари” га киритилди.

Улардан 4 минг 685 нафарини ишлаш истагида бўлган ёшлар ташкил этади. Ушбу ёшларнинг бандлигини таъминлаш мақсадида қурилиш ва ҳақ тўланадиган жамоат ишлари, қишлоқ хўжалиги,  хизмат кўрсатиш соҳалари, ишлаб чиқариш корхоналари, ўзини ўзи банд қилиш йўналиши ҳамда ўз мутахассислиги бўйича ишга жойлаштириш режалаштирилган.

Тадбиркорлик билан шуғулланиш истагини билдирган 511 нафар ёшларга 12 млрд. 586 млн. сўм имтиёзли кредит ажратилишига кўмаклашиш кўзда тутилган.

Шунингдек, касб-ҳунарга ўқиш истаги бор 350 нафар, “Устоз-шогирд” анъанаси доирасида ҳунармандларга бириктириладиган 704 нафар ва ижтимоий муаммолари бор 503 нафар ёшлар аниқланиб, уларга ёрдам бериш чоралари кўрилмоқда.

Бугунги кунга қадар 6 753 нафар “Ёшлар дафтари”га киритилган ёшлардан 3 376 нафарининг бандлиги таъминланди. Шундан 290 нафари мутахассисликлари бўйича корхона ва ташкилотларга ишга жойлаштирилди. Жамоатчилик ишларига жойлаштириш орқали 240 нафари, имтиёзли кредит ажратиш орқали 188 нафари, субсидия ажратиш орқали 24 нафарининг бандлиги таъминланишига кўмаклашилди.

Ишсиз ёшлардан 2634 нафарига эса 912 гектар ер майдонлари ажратиб берилди.

Вазирлар Маҳкамасининг “Ёшларни ижтимоий қўллаб-қувватлаш бўйича қўшимча чора-тадбирлар тўғрисида”ги жорий йил 11 март кунги Қарори ёшлар билан ишлаш тизимини янги даражага олиб чиқиш, уларни ижтимоий-ҳуқуқий ва психологик қўллаб-қувватлаш, касб-ҳунарга ўргатиш ва бандлигини таъминлаш ишларини самарали ташкил этишнинг доимий молиявий манбалари ва улардан фойдаланиш тартибини белгилаб берувчи муҳим ҳужжат бўлди.

Мазкур қарор ижроси юзасидан “Ёшлар дафтари”га киритилган ёшларни қўллаб-қувватлаш жамғармалари ташкил қилиниб, ушбу жамғармаларда 935,3 млн. сўм маблағ шакллантирилди. Бугунги кунга қадар ёшларнинг муаммоларини ҳал этишда амалий ёрдам кўрсатиш учун 67,4 млн.сўм маблағ сарфланди.

Ушбу маблағлар ҳисобидан 20 нафар ёшларга бир марталик ёрдам учун 19,6 млн. сўм, 9 нафар ёшларга асбоб-ускуналар ва меҳнат қуроллари учун 47,8 млн. сўм ажратилди. Ҳомийлар маблағлари ҳисобидан 3 нафар ёшларга электр пайвандлаш ускуналари, 3 нафарига микротўлқинли печь, 6 нафарига тикув машинаси олиб берилди.

Бундан ташқари яна, 38 нафар ёшларга асбоб-ускуналар ва меҳнат қуроллари олиш учун 101 млн. сўм, маданият ва санъат йўналишига 50 та инвентарь олиш учун 312 млн. сўм, спорт йўналишига 1 870 та инвентарь олиш учун 183,6 млн. сўм давлат харидлари аукцион биржасига қўйилди.

Муҳтарам Президентимизнинг ёшларга юксак эътибори ва ишончини оқлаш, бу ғамхўрликка ҳар томонлама муносиб бўлиш учун ўз устимизда жиддий ишлашимиз, қаттиқ меҳнат қилишимиз лозимлигини ҳар биримиз чуқур англашимиз зарур.

Ушбу давлат дастурида бизга юклатилган  ҳар бир вазифани белгиланган муддатларда сифатли амалга оширишга барча имкониятларимизни сафарбар этамиз.

Жасур Давлетов, Ёшлар агентлиги туман бўлими раҳбари.