“АЁЛЛАР ДАФТАРИ”ГА КИРИТИЛГАН ХОТИН-ҚИЗЛАРГА ТИКУВ МАШИНАЛАРИ БЕРИЛДИ

Бугунги кунда Амударё туманида ҳам Халқ депутатлари туман Кенгашининг қарорлари асосида 370 нафар, аёл-қиз “Аёллар дафтари” рўйхатидан чиқарилган. Бу мазкур рўйхатга киритилган аёл-қизларнинг 20,1 фоизини ташкил қилади. “Аёллар дафтари”да рўйхатда турган аёл-қизлардан 287 нафарига кредит ажратиш, 12 нафарига ҳуқуқий ёрдам кўрсатиш, 74 нафарига психологик маслаҳат бериш орқали муаммолари ҳал қилинишига кўмаклашилди.  Шунингдек, ушбу дафтар рўйхатида турган аёл-қизларга туман «Аёллар дафтари» жамғармаси ҳисобидан моддий ёрдамлар кўрсатиш йўлга қўйилди.

19 июнь куни туман Амударё туман ҳокими ўринбосари, туман Маҳалла ва оилани қўллаб-қувватлаш бўлими бошлиғи Алишер Йўлдошев бошчилигида бўлим ходимлари Хитой овули ҳудудидаги “Аёллар дафтари”га киритилган аёл-қизлар ҳолидан хабар олишди. Юзма-юз ўтказилган ўзаро суҳбат чоғида аёллар муаммолари тингланди. Уларни ҳал этиш бўйича тегишли вазифалар белгилаб олинди. Шунингдек, масъуллар суҳбат давомида туманда камбағалликни қисқартириш ва бандликни таъминлаш борасида олиб борилаётган ижобий ишларни таъкидлаш билан бир қаторда мавжуд муаммоларни бартараф этиш чоралари ҳақида ҳам тўхталиб ўтишди. Маҳалла ва оилани қўллаб-қувватлаш бўлими томонидан ушбу аёл-қизларга ўз оилаларини даромад билан таъминлашларига кўмаклашиш мақсадида «Аёллар дафтари» жамғармаси ҳисобидаги маблағлардан олинган тикув машиналари топширилди.

Туман «Аёллар дафтари» жамғармасида жами 787 млн. 210 минг 400 сўм миқдоридаги маблағлар шакллантирилган бўлиб, шундан 129 млн. 850 минг сўм маблағлар 265 нафар боқувчисини йўқотган, ижтимоий ёрдамга муҳтож 2-гуруҳ ногиронлиги бўлган, қарамоғида бир ва ундан ортиқ I ёки II гуруҳ ногиронлиги бўлган болалари мавжуд хотин-қизлардан ҳар бирига 490 минг сўмлик бир марталик ёрдам учун сарфланган.

Туман Маҳалла ва оилани қўллаб-қувватлаш бўлими томонидан Чойкул овулидаги “Аёллар дафтарида” рўйхатда турган ишсиз  хотин-қизлардан 6 нафарига ҳам “Аёллар дафтари” жамғармаси маблағлари ҳисобидан олинган тикув машиналари берилди.

Айтиш керакки, нотурар жойларда истиқомат қилаётган, ўзининг ёки биргаликда яшовчи оила аъзоларининг номидаги турар жой учун 10 нафар аёл-қизга 26 млн. 460 минг сўм миқдорида ижара компенсацияси, уй-жойини таъмирлашга муҳтож I гуруҳ ногиронлиги бўлган 13 нафар аёлга 12 млн.740 минг сўм миқдорида бир марталик моддий ёрдам, тиббий ҳимояга муҳтож эҳтиёжманд аёлларнинг 66 нафарига 65 млн. 660 минг сўм миқдорида бир марталик моддий ёрдам, 24 нафар аёл-қизга эса даволаниш учун 55 млн. сўм миқдорида моддий ёрдам,  ишсиз тоифасидаги 30 нафар аёлга 120 млн. сўм миқдоридаги маблағга  тикув машинаси берилди. “Аёллар дафтари” жамғармасидан жами 279 млн. 860 минг сўм миқдорида моддий ёрдам кўрсатилди.

Қиличбой овули ҳудудида ҳам “Аёллар дафтари” рўйхатида турган хотин-қизлар билан суҳбатлар олиб борилиб, оилавий шароитлари, эҳтиёж ва имкониятлари бирма-бир ўрганилди. Хотин-қизларга янги тикув машиналари топширилиб, шу орқали ўз оилаларига даромад олиб киришлари, ўзлари учун яратилган бу имкониятлардан унумли фойдаланиб, турмуш шароитларини яхшилаш йўлида илдам қадам ташлашга ҳаракат қилиш, янги иш яратиш бўйича тавсиялар берилди.

Таъкидлаш лозимки, тиббий ҳимояга мухтож, эҳтиёжманд 92 нафар аёлларни тиббий кўрикдан ўтказиш ва керакли дори воситаларини сотиб олиш учун бир марталик моддий ёрдам пул маблағлари ажратилган, ҳуқуқий ёрдамга муҳтож 12 нафар аёлларга тегишли юридик маслаҳат берилган, психологик маслаҳатга муҳтож 75 нафар аёлларга мутахассислар томонидан консультациялар ташкил этилган.

“Аёллар дафтари”га киритилган хотин-қизларни моддий ва маънавий жиҳатдан қўллаб-қувватлаш ишлари тизимли равишда давом эттирилмоқда.

Муқаддас Бекназарова, туман Маҳалла ва оилани қўллаб-қувватлаш бўлими бошлиғи ўринбосари.