ЁШ САЁҲАТЧИЛАР ТАРИХИЙ-ЎЛКАШУНОСЛИК МУЗЕЙИДА ТУМАНИМИЗ ТАРИХИ БИЛАН ТАНИШДИЛАР

Амударё – бой тарихга эга, қадимий ўлкалардан биридир. Бу ҳудудда осори атиқалар, Чилпиқ, Гавур қалъа, Тошмадраса каби обидалар ва бошқа шу каби узоқ мозийдан сўзловчи аждодларимиздан қолган улкан мерослар бор. Ёш авлодга бу маънавий-маданий бойликларни бутунлигича етказиш, тарихини таништириб бориш эса улар қалбидаги Ватанга муҳаббат, аждодларга чуқур эҳтиром туйғуларини янада мустаҳкамлайди.

Туманимизда янги ташкил этилган тарихий-ўлкашунослик музейи ҳам, нафақат аму элининг, балки бутун қорақалпоқ халқининг буюк ва бетакрор тарихи ҳақидаги манбаларга эга бўлган, олис ўтмишга саёҳат қилдирувчи масканга айланди. Бугунги кунда ушбу масканга фақат туманимиздангина эмас, Республикамизнинг турли ҳудудларидан ташриф буюрувчилар сони ортмоқда.

Вақт ўтган сари ҳар бир халқ доимо тарихга назар ташлаб, мавжуд урф-одатлар, анъаналар ҳамда қадимий ёдгорликларни ўрганишга ва сақлашга интилади. Бу борада, албатта, музейларнинг аҳамияти жуда катта. Уларда сақланаётган ўтмиш маданияти, маърифати ва турли жиҳозлар, ёдгорликларни кўриб, аждодлар турмуши, ҳаёти ва ҳозирги тараққиётнинг асоси ҳақида улкан тасаввурга эга бўлиш мумкин.

  16 июнь куни ушбу масканга тумандаги Баркамол авлод болалар мактабида ҳунар ўрганаётган ёшлар ташриф буюришди. Саёҳатчиларга музей раҳбари, фахрий ўқитувчи Шавкат Чоршамов ҳар бир экспонат ҳақида батафсил маълумот бериб, тарихи ҳақида сўзлаб берди.

Хотира ва қадрлаш кунига бағишлаб, туманимизда ўтказилган тадбирда очиб берилган ушбу замонавий кўринишдаги музей икки қаватли янги бинода жойлашган. Музейнинг ҳар бир бўлими алоҳида эътибор ва дид билан безатилган. Экспонатларнинг номлари, қайси даврга хослиги, ким томонидан музейга тақдим этилгани ҳақидаги маълумотлар тартиб билан жойлаштирилган.

Музейдан ўрин олган турли бебаҳо ёдгорликлар, қадим аждодларимиз ишлатган уй-рўзғор буюмлари, ўтмишда фойдаланилган иш қуроллари, ёғ ишлаб чиқариш жувозлари, ерларни суғоришда ишлатилган сув ҳайдовчи чиғир ва чархпалак, ноёб қўлёзмалар, созандаларнинг қадимий чолғу асбоблари, ўша даврларда кийилган турфа либосларни  томоша қилиб, тарихи билан танишган ёш саёҳатчилар катта таассуротларга эга бўлдилар.

Саёҳат давомида ўқувчи-ёшлар ҳам ўз навбатида фахрий ўқитувчи Шавкат Чоршамовга турли саволлар билан мурожаат қилиб, ҳар бир экспонат ҳақида янада кўпроқ маълумот олишга қизиқдилар.

Тарихчи-ўлкашунос Шавкат Чоршамов саёҳатчиларга ушбу музей кўпчилик юртдошларимиз, қолаверса, масъул раҳбарларнинг тинимсиз саъй-ҳаракатлари билан ташкил этилгани, эндиликда ёшлар учун туман ва қорақалпоқ эли тарихи билан янада яқинроқ танишиш, кўпроқ маълумотга эга бўлиш имконияти яратилгани ҳақида сўзлаб ўтди. Ундан ташқари, тарих кўзгуси бўлган музейларда халқ ўтмиши, урф-одат ва анъаналари, турмуш тарзини ифода этувчи барча нарсалар жамланишини, улар орқали маданий, хўжалик ва ижтимоий ҳаёт тарзини чуқурроқ ўрганиш мумкинлигини таъкидлади.

Ёш саёҳатчилар билан суҳбат давомида музейларнинг заҳираларини доимо бойитиб бориш, тўпланган музей ашё ва экспонатларини келажак авлодларга бус-бутун ҳолатда етказиш, асраб-авайлаш ҳар биримиздан алоҳида масъулият талаб этиши тушунтирилди. Шунингдек, маънавий-маърифий хазина бўлган ушбу маскан узоқ йиллар юртдошларимизга қадим ўтмишни ўрганишга хизмат қилиши учун уни янада тўлдириб бориш кераклиги хусусида сўз юритилди.

Тарихий-ўлкашунослик музейида ўтказилган саёҳат жуда мароқли, қизиқарли ва мазмунли бўлди.

Озода Худойберганова.