УСТОЗЛИК БАХТИ
Ҳаммамиз болалик давримизни яхши хотиралар билан эслаймиз. Мактабга илк қадам қўйган кунимиз, ўқишни ўрганганимиз. Бизнинг орзуларимизга қанот бағишлаган биринчи ўқитувчимиз ва ниҳоят биринчи ва сўнгги қўнғироқлар чалингандаги ҳаяжонларимиз…
Биз, балки ўқитувчилик касбига ўша дамларда ҳавас қўйгандирмиз. Ҳар йили мактабимиз остонасидан қалбларида эзгу орзулар билан ҳаётга учирма бўлаётган ўқувчиларимиз билан бир даргоҳда 11 йил бирга интилиб, изланиб яшаганимиз учунми, собиқ ўқувчиларимизнинг кейинги ҳаёти ҳақида худди ўз фарзандимиз каби қайғурамиз, ютуқларидан кўксимиз тоғдай юксалади. Ҳатто кўча-кўйда, давраларда қаддимизни тик кўтариб, фахрланиб юрамиз.
2019-2020 ўқув йилида бизнинг 31-сон умумтаълим мактабимизни учта синфда 91 нафар ўқувчи битирди. Шулардан 27 нафари олий таълим даргоҳларига, 16 нафари янгидан ташкил этилган техникумларга ўзлари танлаган йўналишлар бўйича ўқишга кирдилар. 49 нафар собиқ битирувчиларнинг деярли барчасининг бандлиги таъминланди. Бири тадбиркор бўлса, яна бирлари касб-ҳунар эгалари бўлишди. Бундан мактаб директори сифатида Н.Давлетова, ўқув ишлари бўйича мактаб директори ўринбосари О.Шомуродов, мактаб психологи С.Каримова, маънавий-маърифий ишлар бўйича директор ўринбосари Д.Ўрозимбетова ҳамда Б.Шерниёзовлар беҳад мамнун бўлишди. Чунки улар ҳар бир боланинг ҳаётда тўғри йўлни топишларида энг яқин маслаҳатгўй бўлдилар.
Талабалик бахтига эришган собиқ ўқувчиларимиз яқинда биринчи ярим йиллик имтиҳонларини муваффақиятли топширишиб, мактабимизга келишиб, ўз қувончларини устозлари билан бирга бўлишдилар. Бундай ҳолат деярли ҳар йили такрорланади. Ҳар йили жажжи болажонларни кутиб олиб, битирувчи ёшларни ҳаётга йўллайверамиз. Вақт эса югурик. Кеча мактаб остонасидан ҳатлаган болажонлар эртага она юрт хизматига камарбаста, етук мутахассис бўлиб етишадилар. Кечаги ёш ўқитувчи вақт ўтиб, қадрдон мактабимизга невараларини етаклаб келади. Мактабимизда илм олишга ундовчи биринчи ва сўнгги қўнғироқлар жарангги ҳамиша бир-бирига пайваста. Биз ўзимиз билим сирларини ўргатган ўқувчиларимизни янада ёрқин орзулар қучоғига – келажак уфқлари сари кузатиб қолаверамиз. Уларга оқ, ойдин йўл, бахт-иқбол тилашдан асло тўхтамаймиз. Бу – биз ўқитувчи-мураббийларнинг бетимсол бахтимиздир.
Нигора Собирова, Феруза Ражабова, Ғуломжон Юсупов, 31-сонли умумтаълим мактабининг ўтган 2019-2020 ўқув йили битирувчи синфлари раҳбарлари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
