USTOZLIK BAXTI
Hammamiz bolalik davrimizni yaxshi xotiralar bilan eslaymiz. Maktabga ilk qadam qoʻygan kunimiz, oʻqishni oʻrganganimiz. Bizning orzularimizga qanot bagʻishlagan birinchi oʻqituvchimiz va nihoyat birinchi va soʻnggi qoʻngʻiroqlar chalingandagi hayajonlarimiz…
Biz, balki oʻqituvchilik kasbiga oʻsha damlarda havas qoʻygandirmiz. Har yili maktabimiz ostonasidan qalblarida ezgu orzular bilan hayotga uchirma boʻlayotgan oʻquvchilarimiz bilan bir dargohda 11-yil birga intilib, izlanib yashaganimiz uchunmi, sobiq oʻquvchilarimizning keyingi hayoti haqida xuddi oʻz farzandimiz kabi qaygʻuramiz, yutuqlaridan koʻksimiz togʻday yuksaladi. Hatto koʻcha-koʻyda, davralarda qaddimizni tik koʻtarib, faxrlanib yuramiz.
2019-2020 oʻquv yilida bizning 31-son umumtaʼlim maktabimizni uchta sinfda 91 nafar oʻquvchi bitirdi. Shulardan 27 nafari oliy taʼlim dargohlariga, 16 nafari yangidan tashkil etilgan texnikumlarga oʻzlari tanlagan yoʻnalishlar boʻyicha oʻqishga kirdilar. 49 nafar sobiq bitiruvchilarning deyarli barchasining bandligi taʼminlandi. Biri tadbirkor boʻlsa, yana birlari kasb-hunar egalari boʻlishdi. Bundan maktab direktori sifatida N.Davletova, oʻquv ishlari boʻyicha maktab direktori oʻrinbosari O.Shomurodov, maktab psixologi S.Karimova, maʼnaviy-maʼrifiy ishlar boʻyicha direktor oʻrinbosari D.Oʻrozimbetova hamda B.Sherniyozovlar behad mamnun boʻlishdi. Chunki ular har bir bolaning hayotda toʻgʻri yoʻlni topishlarida eng yaqin maslahatgoʻy boʻldilar.
Talabalik baxtiga erishgan sobiq oʻquvchilarimiz yaqinda birinchi yarim yillik imtihonlarini muvaffaqiyatli topshirishib, maktabimizga kelishib, oʻz quvonchlarini ustozlari bilan birga boʻlishdilar. Bunday holat deyarli har yili takrorlanadi. Har yili jajji bolajonlarni kutib olib, bitiruvchi yoshlarni hayotga yoʻllayveramiz. Vaqt esa yugurik. Kecha maktab ostonasidan hatlagan bolajonlar ertaga ona yurt xizmatiga kamarbasta, yetuk mutaxassis boʻlib yetishadilar. Kechagi yosh oʻqituvchi vaqt oʻtib, qadrdon maktabimizga nevaralarini yetaklab keladi. Maktabimizda ilm olishga undovchi birinchi va soʻnggi qoʻngʻiroqlar jaranggi hamisha bir-biriga payvasta. Biz oʻzimiz bilim sirlarini oʻrgatgan oʻquvchilarimizni yanada yorqin orzular quchogʻiga – kelajak ufqlari sari kuzatib qolaveramiz. Ularga oq, oydin yoʻl, baxt-iqbol tilashdan aslo toʻxtamaymiz. Bu – biz oʻqituvchi-murabbiylarning betimsol baxtimizdir.
Nigora Sobirova, Feruza Rajabova, Gʻulomjon Yusupov, 31-sonli umumtaʼlim maktabining oʻtgan 2019-2020 oʻquv yili bitiruvchi sinflari rahbarlari.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
