“ЁШЛАР ДАФТАРИ” РЎЙХАТИДАГИ ЁШЛАРГА ЗАРУР ИШ ҚУРОЛЛАРИ БЕРИЛДИ

Маълумки, юртимизда аҳолини ижтимоий қўллаб-қувватлаш, муаммоларини ҳал этиш, бандлигини таъминлаш, касбга ўқитиш мақсадида моддий ёрдам ва кўмакка муҳтож оилалар рўйхати, яъни “Темир дафтар”, ёшлар ҳаётига  оид муаммоларни тизимли ўрганиш ва уларни ижобий ҳал этишга қаратилган “Ёшлар дафтари” ва аёл-қизлар ҳаётини яхшилашга кўмаклашиш мақсадида “Аёллар дафтари” шакллантирилган эди.

Шу боис, бутун мамлакатимизда бўлгани каби туманимизда ҳам аҳолининг ижтимоий ҳимояга муҳтож қатламини қўллаб-қувватлаш, уларни камбағалликдан чиқариш, касб-ҳунарга ўқитиш, имтиёзли банк кредитларини олиб, ўз тадбиркорлик фаолиятларини йўлга қўйишларида яқиндан ёрдам бериш мақсадида манзилли ишлар амалга оширилмоқда. Бу борада туманда фаолият олиб бораётган 4 та сектор раҳбарлари томонидан амалга оширилаётган саъй-ҳаракатлар туфайли кўплаб оилалар “Темир дафтар”, “Аёллар дафтари” ва “Ёшлар дафтари” рўйхатларидан чиқарилиб, фаровонлиги таъминланмоқда. Айниқса, ёшлар давлат Дастури ижросини таъминлашга қаратилган амалий ишлар натижасида ёшларнинг иш билан бандлиги даражаси, ижтимоий фаоллиги ошиб бормоқда.

Жорий йилнинг 22 май санасида туман ҳокимлиги биносида бўлиб ўтган амалий тадбир ҳам ёшлар давлат Дастури ижросини таъминлашга қаратилгани билан муҳим аҳамиятга эга бўлди.

Туман ҳокими С.Йўлдашев раҳбарлигида туман ҳокими ўринбосарлари, 4 та сектор раҳбарлари, туман ҳокимлигининг етакчи мутахассислари, тумандаги сиёсий партиялари депутатлари, фуқароларнинг ўзини ўзи бошқариш органлари раислари ҳамда оммавий ахборот вакиллари ҳамда “Темир дафтар”, “Аёллар дафтари”, “Ёшлар дафтари” рўйхатига киритилган фуқаролар иштирок этган мазкур тадбирда туман ҳокими С.Йўлдашев мамлакатимизда аҳолининг ижтимоий ҳимояга муҳтож қатламини қўллаб-қувватлаш, уларнинг  иш билан бандлигини таъминлаш, янги иш ўринларини яратиш, айниқса, уюшмаган ёшларнинг муаммоларини ҳал этиш борасида белгиланган чора-тадбир, устувор вазифаларга батафсил тўхталиб, бу борада туманимизда амалга оширилаётган ишлар, ёшлар давлат Дастури ижросини таъминлаш мақсадида белгиланган чора-тадбирлар ҳақида маълумот берди. Шу билан бирга “Ёшлар дафтари” рўйхатига киритилган ёшлар билан манзилли ишлаш бўйича эришилаётган ютуқлар, кўплаб ёшларнинг ўзини-ўзи банд қилиш тамойили асосида иш юритиб, оиласи фаровонлигига ҳисса қўшаётганликларини эътироф этди.

Шундан сўнг, туман ҳокимлиги ва Ёшлар ишлари агентлиги туман бўлими томонидан “Ёшлар дафтари” рўйхатига киритилган 20 нафар аёл-қизларга 20 та тикув машинаси, 4 нафар ёшга мотокультиватор агрегати, 10 нафар ёшга пайвандлаш ускунаси ва 1 нафар ёшга эса хизмат кўрсатиш соҳасида зурур бўлган иш асбоби топширилди.

Бўлиб ўтган йиғилишда “Ёшлар дафтари” рўйхатига  киритилган, туман ҳокимлиги ва Ёшлар ишлари агентлиги туман бўлими томонидан зарур иш қуроллари билан таъминланган ёшлар ўзларига кўрсатилаётган беғараз ёрдамлари учун туман ҳокимлигидан, Ёшлар ишлари агентлигидан миннатдор эканликларини изҳор этишиб, бундан кейин самарали фаолият юритажакларини ва албатта, яқин вақт ичида “Ёшлар дафтари” рўйхатидан чиқишларини билдирдилар.

Робия ЙЎЛДОШЕВА.