ДИНИЙ БИЛИМСИЗЛИК ҲАМ МАЪНАВИЙ, ҲАМ МОДДИЙ ЗАРАР ЕТКАЗДИ

Диний ва ҳуқуқий билимсизлик инсонни нафақат йўлдан адаштиради, балки элдошлари орасидаги обрў-эътиборига путур етказади. Ҳатто иқтисодий таназзулга олиб келади.

Туманимиз маҳаллаларидан бирида яшовчи, эндигина  19 ёшга тўлган ёшгина, Моҳирбек исмли (исм ўзгартирилди) йигит не машаққат билан ўзи ишлаб топган пулига “Redmi 6Pro”русумли қўл телефонини сотиб олиб, ҳужжатлаштирди. Янги қўл телефонини очиб, унинг хотирасида 56 та аудио, 5 та видео ёзувлар борлигини кўриб, бу аудио ва видео ёзувлар диний экстремизм тарғиботига оид эканлигини тушуниб етмай, улар билан танишишда давом этди.

Ваҳоланки, Ўзбекистон Республикаси Вазирлар Маҳкамаси ҳузуридаги дин ишлари бўйича қўмитасининг (04.03.2021 йилги) №26-сонли хулосасида бу каби “Диний экстремистик мазмундаги видео ва аудио ёзувли маърузаларни Ўзбекистон ҳудудига олиб кириш, тайёрлаш ва тарқатиш таъқиқланади”, деб кўрсатилган.

Моҳирбек ҳуқуқий ва диний саводсизлиги оқибатида ўз ҳатти-ҳаракатлари билан Ўзбекистон Республикаси Маъмурий жавобгарлик тўғрисидаги Кодексининг  184-3-моддасида кўрсатилган ҳуқуқбузарликни содир этган.

Яқинда Моҳирбек томонидан содир этилган ушбу маъмурий иш унинг ўзи истиқомат қиладиган маҳаллада, жиноят ишлари бўйича Амударё туман судининг кўчма очиқ суд мажисида ҳуқуқбузарнинг яқинлари, маҳалладошлари иштирокида муҳокама этилди.

Очиқ суд мажлисида Моҳирбекнинг диний саводсизлиги, қолаверса, маҳалла оқсоқоли ҳамда маҳалладошларининг у ҳақдаги ижобий фикрлари, ҳуқуқбузарнинг оилавий аҳволи, ишсизлиги, унинг қаттиқ пушаймонлиги инобатга олинди ва унга Ўзбекистон Республикаси МжТКнинг тегишли моддаларига кўра, БҲМнинг икки баравари миқдорида жарима  жазоси қўлланилиб, ҳуқуқбузарликни содир этиш пайтида фойдаланган қўл телефони давлат фойдасига мусодара этилди.

Билимсизлик инсонни не кўйларга солмайди, дейсиз. Моҳирбек ҳам диний ва ҳуқуқий саводсизлиги боис, ўзи сотиб олган қўл телефони хотирасига ғаразли ниятдаги кишилар томонидан атайлаб тайёрланган бузғунчи ғоялар тарғиботига бағишланган аудио ва видео ёзувларнинг қандай оқибатлар келтиришини билмади. Агар билганида дарҳол ўчириб ташлаган ёки қўл телефонини ҳужжатлаштирмасдан аввал ҳуқуқни муҳофаза этиш органларига олиб бориб, уни сотган кимсаларга чора кўриш ҳақида ўйлаган бўларди.

Афсуски, ғишт қолипдан кўчиб, унинг ўзи ҳам маънавий, ҳам моддий зарар кўрди. Шуни айтадилар-да “билимсизлик одамни сарсон-саргардон қилади, адаштиради, зулмат йўллар томон етаклайди”, деб.

С.ДАВЛЕТМУРАТОВ, жиноят ишлари бўйича Амударё туман суди раиси.