Имконияти чекланган фуқаролар учун маънавий-маърифий тадбир ўтказилди
Мамлакатимизда инсон қадрини улуғлаш, унинг ҳуқуқ ва эркинликларини, шунингдек, қонуний манфаатларини таъминлаш давлат сиёсатининг энг устувор йўналишларидан бирига айланган. Янги Ўзбекистон шароитида бу борадаги ислоҳотлар кўлами янада кенгайиб бормоқда. Бугунги кунда жамиятимизнинг ҳар бир аъзоси, айниқса, имконияти чекланган фуқароларнинг ижтимоий ҳаётдаги фаоллигини ошириш, уларни ҳар томонлама қўллаб-қувватлаш ва маънавий дунёқарашини бойитиш мақсадида кенг кўламли ишлар амалга оширилмоқда. Инсонпарварлик ва меҳр-оқибат тамойилларига асосланган бундай юксак эътибор натижасида кўплаб юртдошларимиз ўзларини жамиятнинг тўлақонли аъзоси сифатида ҳис этмоқда. Зеро, ҳеч бир инсон давлат ва жамият эътиборидан четда қолмаслиги шарт.
Ана шундай эзгу мақсадлар ва олижаноб ташаббусларнинг амалий ифодаси сифатида Амударё туманида ўзига хос маънавий-маърифий ва маданий тадбир бўлиб ўтди. Амударё тумани Ахборот-кутубхона маркази ҳамда Ўзбекистон ногиронлар жамиятининг Амударё туман бўлими ҳамкорлигида ташкил этилган тадбир нафақат маълумот алмашиш ёки расмий учрашув мақомида, балки иштирокчилар ўртасидаги самимий дийдорлашув, қизғин мулоқот ва кўтаринки кайфият улашувчи ҳақиқий дўстлик байрамига айланиб кетди.
Мазкур тадбирнинг мазмун-моҳиятини янада теранроқ очиб беришда ва йиғилганларнинг кўнглига йўл топиб, уларга қувонч улашишда жамиятимиздаги саховатпеша инсонларнинг ўрни беқиёс эканлиги яна бир бор ўз тасдиғини топди. Хусусан, тадбир жараёнида фаол иштирок этган ва яқиндан кўмак кўрсатган ҳомий Дилдора Ҳайитбоева ўз ташаббуси билан барчага ўрнак бўлди. Унинг меҳр-мурувватга йўғрилган эзгу ишлари, тадбир иштирокчиларига кўрсатган беғараз эътибори ва ғамхўрлиги даврага ўзгача шукуҳ ҳамда кўтаринки руҳ бағишлади. Бундай саховатли инсонларнинг борлиги жамиятимиздаги ҳамжиҳатлик ва меҳр-оқибат ришталарининг қанчалик мустаҳкам эканлигидан яққол далолат беради.
Тадбирнинг бадиий қисми эса йиғилганлар қалбида унутилмас ва ёрқин таассуротлар қолдирди. Кечада «Соғлом авлод» нодавлат мактабгача таълим ташкилотининг жажжи тарбияланувчилари томонидан маҳорат билан ижро этилган жозибали, шўх ва ранг-баранг миллий ҳамда замонавий рақслар тадбир дастурини янада бойитди. Уларнинг юзларидаги беғубор ва қувноқ табассум, самимий чиқишлар ва болаларча соф истеъдод томошабинларга олам-олам қувонч улашиб, чинакам байрамона ва кўтаринки муҳитни яратди. Болажонларнинг бундай эътибори имконияти чекланган инсонларнинг қалбига катта далда бўлди.
Тадбир ниҳоясида сўзга чиққан иштирокчилар ўзларига кўрсатилган бундай юксак эътибор ва ғамхўрлик учун ташкилотчиларга ва ҳомийларга ўзининг чексиз миннатдорчилигини изҳор этдилар. Уларнинг таъкидлашича, бу каби маданий-маърифий учрашувлар инсонлар ўртасидаги меҳр-оқибат, дўстлик ва ҳамжиҳатлик ришталарини янада мустаҳкамлашга хизмат қилади.
Тадбир сўнгида Республика Маънавият ва маърифат марказининг Амударё туман бўлинмаси томонидан тадбирни юқори савияда ташкил этишда жонбозлик кўрсатган Ахборот-кутубхона маркази мутахассисларига ташаккурнома топширилди. Бундай эзгу ташаббуслар келгусида ҳам изчил давом этиши, жамиятимизда меҳр-мурувват ва инсонпарварлик ғоялари янада кенг қулоч ёйиши шубҳасиз. Зеро, бир-бирига елкадош ва меҳрибон бўлган халқнинг келажаги буюк, маънавияти эса юксак бўлади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
