Imkoniyati cheklangan fuqarolar uchun maʼnaviy-maʼrifiy tadbir oʻtkazildi
Mamlakatimizda inson qadrini ulugʻlash, uning huquq va erkinliklarini, shuningdek, qonuniy manfaatlarini taʼminlash davlat siyosatining eng ustuvor yoʻnalishlaridan biriga aylangan. Yangi Oʻzbekiston sharoitida bu boradagi islohotlar koʻlami yanada kengayib bormoqda. Bugungi kunda jamiyatimizning har bir aʼzosi, ayniqsa, imkoniyati cheklangan fuqarolarning ijtimoiy hayotdagi faolligini oshirish, ularni har tomonlama qoʻllab-quvvatlash va maʼnaviy dunyoqarashini boyitish maqsadida keng koʻlamli ishlar amalga oshirilmoqda. Insonparvarlik va mehr-oqibat tamoyillariga asoslangan bunday yuksak eʼtibor natijasida koʻplab yurtdoshlarimiz oʻzlarini jamiyatning toʻlaqonli aʼzosi sifatida his etmoqda. Zero, hech bir inson davlat va jamiyat eʼtiboridan chetda qolmasligi shart.
Ana shunday ezgu maqsadlar va olijanob tashabbuslarning amaliy ifodasi sifatida Amudaryo tumanida oʻziga xos maʼnaviy-maʼrifiy va madaniy tadbir boʻlib oʻtdi. Amudaryo tumani Axborot-kutubxona markazi hamda Oʻzbekiston nogironlar jamiyatining Amudaryo tuman boʻlimi hamkorligida tashkil etilgan tadbir nafaqat maʼlumot almashish yoki rasmiy uchrashuv maqomida, balki ishtirokchilar oʻrtasidagi samimiy diydorlashuv, qizgʻin muloqot va koʻtarinki kayfiyat ulashuvchi haqiqiy doʻstlik bayramiga aylanib ketdi.
Mazkur tadbirning mazmun-mohiyatini yanada teranroq ochib berishda va yigʻilganlarning koʻngliga yoʻl topib, ularga quvonch ulashishda jamiyatimizdagi saxovatpesha insonlarning oʻrni beqiyos ekanligi yana bir bor oʻz tasdigʻini topdi. Xususan, tadbir jarayonida faol ishtirok etgan va yaqindan koʻmak koʻrsatgan homiy Dildora Hayitboyeva oʻz tashabbusi bilan barchaga oʻrnak boʻldi. Uning mehr-muruvvatga yoʻgʻrilgan ezgu ishlari, tadbir ishtirokchilariga koʻrsatgan begʻaraz eʼtibori va gʻamxoʻrligi davraga oʻzgacha shukuh hamda koʻtarinki ruh bagʻishladi. Bunday saxovatli insonlarning borligi jamiyatimizdagi hamjihatlik va mehr-oqibat rishtalarining qanchalik mustahkam ekanligidan yaqqol dalolat beradi.
Tadbirning badiiy qismi esa yigʻilganlar qalbida unutilmas va yorqin taassurotlar qoldirdi. Kechada «Sogʻlom avlod» nodavlat maktabgacha taʼlim tashkilotining jajji tarbiyalanuvchilari tomonidan mahorat bilan ijro etilgan jozibali, shoʻx va rang-barang milliy hamda zamonaviy raqslar tadbir dasturini yanada boyitdi. Ularning yuzlaridagi begʻubor va quvnoq tabassum, samimiy chiqishlar va bolalarcha sof isteʼdod tomoshabinlarga olam-olam quvonch ulashib, chinakam bayramona va koʻtarinki muhitni yaratdi. Bolajonlarning bunday eʼtibori imkoniyati cheklangan insonlarning qalbiga katta dalda boʻldi.
Tadbir nihoyasida soʻzga chiqqan ishtirokchilar oʻzlariga koʻrsatilgan bunday yuksak eʼtibor va gʻamxoʻrlik uchun tashkilotchilarga va homiylarga oʻzining cheksiz minnatdorchiligini izhor etdilar. Ularning taʼkidlashicha, bu kabi madaniy-maʼrifiy uchrashuvlar insonlar oʻrtasidagi mehr-oqibat, doʻstlik va hamjihatlik rishtalarini yanada mustahkamlashga xizmat qiladi.
Tadbir soʻngida Respublika Maʼnaviyat va maʼrifat markazining Amudaryo tuman boʻlinmasi tomonidan tadbirni yuqori saviyada tashkil etishda jonbozlik koʻrsatgan Axborot-kutubxona markazi mutaxassislariga tashakkurnoma topshirildi. Bunday ezgu tashabbuslar kelgusida ham izchil davom etishi, jamiyatimizda mehr-muruvvat va insonparvarlik gʻoyalari yanada keng quloch yoyishi shubhasiz. Zero, bir-biriga yelkadosh va mehribon boʻlgan xalqning kelajagi buyuk, maʼnaviyati esa yuksak boʻladi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
