“МИЛЛИЙ ҚАДРИЯТЛАРИМИЗНИ МУСТАҲКАМЛАШ ҲАФТАЛИГИ”ДА ДЕПУТАТ САЙЛОВЧИЛАР БИЛАН УЧРАШДИ

Наврўз байрамининг аҳамиятини, бобомерос қадриятларимизнинг халқимизни бир-бирига янада жипслаштирувчи қудратини амалда намоён этиш мақсадида мамлакатимизда 22-28 март кунлари “Миллий қадриятларимизни мустаҳкамлаш ҳафталиги” тадбирлари ўтказилмоқда. Мазкур ҳафталик доирасида маҳаллий Кенгаш депутатларининг ўз ҳудудларига чиқишлари, “Темир дафтар”, “Ёшлар дафтари”, “Аёллар дафтари”га киритилган оилаларнинг аҳволидан хабар олиш, уларнинг муаммоларини тинглаш, аҳолини ўтказилаётган ислоҳотлар ва истиқболдаги режалар билан таништириш ва хабардор қилиш белгиланган эди.

Шу кунларда туманимиздан Қорақалпоғистон Республикаси Жўқорғи Кенгеси ва халқ депутатлари туман Кенгашига сайланган депутатларнинг ўз сайловчилари билан ҳафталик доирасидаги учрашувлари, дилдан, самимий мулоқотлари бўлиб ўтмоқда.

32-Қиличбой сайлов округидан Қорақалпоғистон Республикаси Жўқорғи Кенгеси депутати С. Хўжамуротова Юқори қишлоқ маҳалла фуқаролар йиғинида жойлашган 8-сонли мактаб жамоаси ва  Бўз солма маҳалла фуқаролар йиғинида жойлашган 70-сонли мактаб жамоалари билан учрашди. Депутат ўз сайловчиларига Қорақалпоғистон Республикаси ва туманимизда, шунингдек, округ ҳудудида режалаштирилаётган  истиқболли лойиҳалар тўғрисида ҳамда депутатлик фаолияти давомида амалга оширилаётган ишлари ҳақида гапириб берди. Шу билан бирга С.Хўжамуратова Ўзбекистон Республикаси Президенти Ш.М.Мирзиёевнинг "Инсонпарварлик, эзгулик ва бунёдкорлик-миллий ғоямизнинг пойдеворидир" рисоласи асосида миллий ва маънавий қадриятларимиз, маънавий ҳаётимиздаги ютуқлар ва қусурлар, ижтимоий тармоқларнинг ёшлар тарбиясига таъсири каби масалаларга батафсил тўхталди. Сайловчилар томонидан билдирилган болалар боғчаси филиалини таъмирлаш, ҳудуддаги боғча ёшидаги болаларни МТТларга қамраб олиш кўрсаткичини ошириш, ички йўлларни таъмирлаш, шағал тўшаш, турар жойларни таъмирлаб бериш каби аҳоли ҳаётига оид муаммолар депутат томонидан эътиборга олиниб, тегишли ташкилотларга депутатлик сўрови билан чиқиш бўйича фикрлар билдирилди ва 10 нафар муҳтож оилаларга  озиқ-овқат маҳсулотлари, 4 нафар ўқитувчи, 4 нафар техник ходим, 4 нафар маҳалла фаолларига совғалар берилди.

“Миллий қадриятларимизни мустаҳкамлаш ҳафталиги” доирасида бўлиб ўтган депутат ва сайловчилар вакиллари, 8-сонли ҳамда 70-сонли умумтаълим мактаблари меҳнат жамоалари билан учрашувда Адолат сациал-демократик партияси туман Кенгаши раиси Мансур Ўрозбоев ҳам иштирок этиб, 32-Қиличбой сайлов округидан Қорақалпоғистон Республикаси Жўқорғи Кенгеси депутати Санобар Хўжамуротованинг ўз ҳудудига чиққан ҳолда “Темир дафтар”, “Аёллар дафтари”, “Ёшлар дафтари” рўйхатларига киритилган фуқаролар ва уларнинг турмуш тарзларини ўрганиш борасидаги саъй-ҳаракатлари, аҳоли муаммоларини ҳал этишга қаратилган депутатлик сўровлари бўйича аниқ режа асосида амалга ошираётган ишларининг натижадорлиги хусусида тўхталиб ўтди.

Учрашувда ҳудуд аҳолиси томонидан тушган мурожаатларни депутат С.Хўжамуротова алоҳида қайд этиб, уларни ижобий ҳал этиш бўйича масъул ташкилотларга депутатлик  сўрови билан киришини ва албатта, барча мурожаатлар бўйича тизимли ишлар олиб боражагини билдирди. Шу билан бирга, аҳолидан тушган саволларга ҳам батафсил жавоб берди.

Робия ЙЎЛДОШЕВА.