“MILLIY QADRIYaTLARIMIZNI MUSTAHKAMLASh HAFTALIGI”DA DEPUTAT SAYLOVChILAR BILAN UChRAShDI

Navroʻz bayramining ahamiyatini, bobomeros qadriyatlarimizning xalqimizni bir-biriga yanada jipslashtiruvchi qudratini amalda namoyon etish maqsadida mamlakatimizda 22-28-mart kunlari “Milliy qadriyatlarimizni mustahkamlash haftaligi” tadbirlari oʻtkazilmoqda. Mazkur haftalik doirasida mahalliy Kengash deputatlarining oʻz hududlariga chiqishlari, “Temir daftar”, “Yoshlar daftari”, “Ayollar daftari”ga kiritilgan oilalarning ahvolidan xabar olish, ularning muammolarini tinglash, aholini oʻtkazilayotgan islohotlar va istiqboldagi rejalar bilan tanishtirish va xabardor qilish belgilangan edi.

Shu kunlarda tumanimizdan Qoraqalpogʻiston Respublikasi Joʻqorgʻi Kengesi va xalq deputatlari tuman Kengashiga saylangan deputatlarning oʻz saylovchilari bilan haftalik doirasidagi uchrashuvlari, dildan, samimiy muloqotlari boʻlib oʻtmoqda.

32-Qilichboy saylov okrugidan Qoraqalpogʻiston Respublikasi Joʻqorgʻi Kengesi deputati S. Xoʻjamurotova Yuqori qishloq mahalla fuqarolar yigʻinida joylashgan 8-sonli maktab jamoasi va  Boʻz solma mahalla fuqarolar yigʻinida joylashgan 70-sonli maktab jamoalari bilan uchrashdi. Deputat oʻz saylovchilariga Qoraqalpogʻiston Respublikasi va tumanimizda, shuningdek, okrug hududida rejalashtirilayotgan  istiqbolli loyihalar toʻgʻrisida hamda deputatlik faoliyati davomida amalga oshirilayotgan ishlari haqida gapirib berdi. Shu bilan birga S.Xoʻjamuratova Oʻzbekiston Respublikasi Prezidenti Sh.M.Mirziyoyevning "Insonparvarlik, ezgulik va bunyodkorlik-milliy gʻoyamizning poydevoridir" risolasi asosida milliy va maʼnaviy qadriyatlarimiz, maʼnaviy hayotimizdagi yutuqlar va qusurlar, ijtimoiy tarmoqlarning yoshlar tarbiyasiga taʼsiri kabi masalalarga batafsil toʻxtaldi. Saylovchilar tomonidan bildirilgan bolalar bogʻchasi filialini taʼmirlash, hududdagi bogʻcha yoshidagi bolalarni MTTlarga qamrab olish koʻrsatkichini oshirish, ichki yoʻllarni taʼmirlash, shagʻal toʻshash, turar joylarni taʼmirlab berish kabi aholi hayotiga oid muammolar deputat tomonidan eʼtiborga olinib, tegishli tashkilotlarga deputatlik soʻrovi bilan chiqish boʻyicha fikrlar bildirildi va 10 nafar muhtoj oilalarga  oziq-ovqat mahsulotlari, 4 nafar oʻqituvchi, 4 nafar texnik xodim, 4 nafar mahalla faollariga sovgʻalar berildi.

“Milliy qadriyatlarimizni mustahkamlash haftaligi” doirasida boʻlib oʻtgan deputat va saylovchilar vakillari, 8-sonli hamda 70-sonli umumtaʼlim maktablari mehnat jamoalari bilan uchrashuvda Adolat satsial-demokratik partiyasi tuman Kengashi raisi Mansur Oʻrozboyev ham ishtirok etib, 32-Qilichboy saylov okrugidan Qoraqalpogʻiston Respublikasi Joʻqorgʻi Kengesi deputati Sanobar Xoʻjamurotovaning oʻz hududiga chiqqan holda “Temir daftar”, “Ayollar daftari”, “Yoshlar daftari” roʻyxatlariga kiritilgan fuqarolar va ularning turmush tarzlarini oʻrganish borasidagi saʼy-harakatlari, aholi muammolarini hal etishga qaratilgan deputatlik soʻrovlari boʻyicha aniq reja asosida amalga oshirayotgan ishlarining natijadorligi xususida toʻxtalib oʻtdi.

Uchrashuvda hudud aholisi tomonidan tushgan murojaatlarni deputat S.Xoʻjamurotova alohida qayd etib, ularni ijobiy hal etish boʻyicha masʼul tashkilotlarga deputatlik  soʻrovi bilan kirishini va albatta, barcha murojaatlar boʻyicha tizimli ishlar olib borajagini bildirdi. Shu bilan birga, aholidan tushgan savollarga ham batafsil javob berdi.

Robiya YOʻLDOShEVA.