“ОЗОД ЮРТНИНГ ОБОД МАҲАЛЛАСИ” НОМЛИ КЎРИК-ТАНЛОВ ЎТКАЗИЛДИ

Мамлакатимизда 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси доирасида халқимиз манфаатларига, уларнинг турмуш сифатини оширишга қаратилган кенг қамровли ислоҳотлар олиб борилмоқда.

Амалга оширилаётган ислоҳотларнинг мазмун-моҳияти ва аҳамиятини ҳар бир фуқаро ўз ҳаётида сидқидилдан ҳис қилмоқда ва кўнглида жараёнларга дахлдорлик ҳисси юксалмоқда. Бу ўз навбатида аҳолининг кайфиятини кўтариб, умуминсоний қадриятларнинг янада кучайишига, меҳр-оқибатнинг юксалишига, юртимизда инсон омилига қаратилаётган эътибордан фахрланиш ҳиссини уйғонишига асос бўлмоқда.

Яқинда туманимизнинг “Аёқчи” маҳалласи ҳудудида жойлашган 69-сонли мактабда бўлиб ўтган “Озод юртнинг обод маҳалласи” мавзусида ўтказилган кўрик-танловда ҳам айнан юртдошларимизнинг ўз юртига, истиқомат қиладиган маҳалласига ҳурмати, ҳудуднинг ўзига хос тарихидан хабардорлиги, келгусида яна ҳам равнақ топиши учун қўшаётган ҳиссаси  кўпчилик эътиборига ҳавола этилди.

Кўрик-танловда ҳудуднинг 3 та оиласи ушбу мактаб ўқувчилари бўлган фарзандлари билан иштирок этдилар. Яъни 3 оиладан ота-она, бир нафар фарзанд ўзларининг интеллектуал салоҳиятларини намойиш этиш, ғолиб бўлиш учун ўзаро беллашдилар.

Тадбирда “Аёқчи” маҳалла фуқаролар йиғини раиси Оллоёр Қаландаров, ўринбосари Нигора Полвонова ва мактабнинг тажрибали ўқитувчиларидан иборат ҳакамлар ҳайъати уларнинг ҳар бир чиқишларини диққат-эътибор билан кузатиб, одилона баҳолаб бордилар.

Кўрик-танлов иштирокчилари аввало ўзлари яшаётган ҳудуди - маҳалласи тарихи, оиласи аҳволи билан таништириб, беллашувга келган аъзолари ҳақида маълумотлар беришди.

Шуниси эътиборлики, умргузаронлик қилаётган заминимизнинг ҳар бир қарич ерининг ўз тарихи бор, юртни юрт сифатида элга танитишга, ривожлантиришга ҳисса қўшган фидойи фарзандлари бор.

Булар ҳақда билиш, албатта, ҳар одамнинг ўз юртига меҳр-муҳаббатини оширади. Бу борадаги иштирокчиларнинг тақдимотини эшитиш барча томошабинлар учун мароқли бўлди.

Шунингдек, эркин мавзу, расм чиқиш ва мазмун-моҳиятини тушунтириб бериш, ҳудудимизда етиштириладиган, аҳоли истеъмол қиладиган сабзавотларни таърифлаш, тезкор саволларга жавоб бериш, баҳру байт айтишиш шартлари ҳам жуда қизиқарли ўтди ва ҳар бири алоҳида баҳоланди.

Натижаларга кўра, Гулимбетовлар оиласи биринчи, Йўлдошевлар оиласи иккинчи, Бозорбоевлар оиласи эса учинчи ўринни эгалладилар.

Иштирокчиларга маҳалла фуқаролар йиғини ва мактаб маъмурияти томонидан фахрий ёрлиқ ва қимматбаҳо совғалар тақдим этилди.

Кўрик-танловни ташкиллаштиришда ва ўтказишда мактаб ўқитувчилари Рустам Ваисов, Барчиной Ишматова, Дилшод Бобониёзов, Дилмурод Қодировлар фаоллик кўрсатдилар.

О.РАЖАБОВА.