УНИ КАСБИ ЭЛГА ТАНИТДИ

Улуғ мутафаккир Абдулла Авлоний бобомиз тарбиячини табибга ўхшатган, табиб бемор баданидаги касалига даво қилгани каби яхши тарбиячилар болада яхши хислатлар шаклланишига, ёмон одатлардан тийилишига сабабчи бўлади, деган эдилар.

Тарбиячи – энг аввало ота-онадир. Ҳа, бола кўз очиб кўрган яқинлари даврасида илк тарбия олса, бу жараён мактабгача таълим ташкилотларида давом эттирилади.

Кейинги йилларда мактабгача таълим ташкилотларига мактабгача ёшдаги болаларнинг қамровини оширишга алоҳида эътибор қаратилаётгани бежиз эмас. Чунки боғчаларда тарбияланган бола аввало мактаб таълимига сифатли тайёрланади, дунёқараши кенг бўлади, жамоада ўзини тутиш, муомала маданиятининг илк кўникмаларига эга бўлади. Ҳатто оддий суҳбатда ҳам боғчада, уйида тарбияланаётган болаларни фарқлаш қийин эмас.

Манғит шаҳрининг Навоий номли маҳалласида туғилиб, вояга етган Ойдин Казакова буларга ўзининг 31 йилдан зиёд меҳнат фаолияти давомида қайта-қайта иқрор бўлгани учун гуруҳидаги болаларга ширин сўзи, қалб қўри билан яхши тарбия беришга интилади, худди ўз ота-оналари каби эркаланиб оғушига талпинишларидан кўнгли юксалиб кетади.

У 1990 йилда туманимиздаги 1-сонли мактабни тугатиб, Тошкентдаги собиқ Крупская номли педагогика билим юртига ўқишга кирди. Муассасани аъло баҳолар билан битириб келиб, дастлаб ўзи  таълим олган мактабда куни узайтирилган гуруҳ тарбиячиси бўлиб иш бошлади. 1993 йилда эса 1-сонли Мактабгача таълим ташкилотига тарбиячи бўлиб ишга кирди ва шу кунгача болажонлар таълим-тарбияси йўлида меҳнат қилиб келаётир.

Унинг дастлаб тарбиялаган ўғил-қизлари ҳозирги кунда турли мутахассислик, касб-ҳунарларни эгаллаб, ҳаётда ўз ўринларини топишган.

– Ҳозир аввалги тарбиялаган болаларимнинг болаларини тарбиялаяпман. Ота-оналари ҳам ярим ҳазил, ярим чин “боғча опа”  деб мурожаат қилишади, – дейди кулиб О.Казакова.

Унинг касбига фидойилиги бежиз эмас. Бир умр ўқитувчилик қилиб, ёшларга таълим-тарбия берган отаси, таълим фахрийси бўлган Шомурод Казаков қизига ёш болалар тарбияси жуда нозик ва масъулиятли иш эканлигини кўп уқтирар, ўз устида кўп ишлашга, касб маҳоратини оширишга ундарди.

Меҳнат фаолиятида О.Казакова отаси, онаси орзу қилганидай даражага эришди. Буни ҳар куни эрталаб муассаса эшиги олдида тарбияланувчиларнинг ота-онаси қўлидан тушиб, унинг бағрига талпинишларидан ҳам англаш мумкин.

О.Казакова ҳалол меҳнатлари туфайли Қорақалпоғистон халқ таълим аълочиси, дея эътироф  этилган.

Севара ИСМОИЛОВА.