БИР ДАҚИҚА ҚАДРИ

(Қатра)
 Бир дақиқа қадри. Бир дақиқа. Бу сўз қисқа бўлса ҳам кенг қамровга эга. Инсоннинг туғилиши ва ўлим. Ўйлаб қаралса, мана шуларнинг ҳаммаси бир дақиқада содир бўлади.
...1991 йил 1 сентябрь, соат 23:58:07 сония ўтди. Aйнан шу дақиқаларда Суннатовлар оиласида катта қувонч. Кўзларида ёш. Дилларида шукроналик ҳисси. Бунинг сабабчиси оилага қўшилган янги меҳмон, яъни чақалоқ. У айнан шу бугун, шу йил, ушбу санада туғилди! Ўзбекистон Республикаси мустақил бўлган кунда дунёга келган гўдакка Раҳматжон деб исм қўйишди.
Умрлар дақиқаларга қўшилиб, югурганча давом этади. Ҳар дақиқа сайин янги тақдир яралиб, бошқаси ниҳояга етади.
Aжойиб ёз кунларининг бирида яна бир гўшадаги бахтли оиланинг бахтиёр қизчаси Муслима онаси билан бувисиникига кетаётган эди. Aтроф гўзал ва хушманзара. Йўллар текис ва равон. Муслима тинмай онасига саволлар беради... У нима, нимага бундай каби саволларининг охири йўқдек гўё...
Онаси йўл четидаги светофорга қаради. Унинг яшил чироғи ёниб турарди. Муслима билан онаси нариги тарафга ўтиш учун йўлга яқин келишди. Шу ондаёқ қизил чироқ ёнди ва улар тўхташди.
Яшил чироққа бир кўз ташлаб, шошганича ўтиб кетган Раҳматжон эса йўл ўртасида қолди! Светофорда қизил чироқ. Шу пайт машиналарнинг қаттиқ сигнали ва қаттиқ чинқириқ эшитилди!!!
Ҳа, бу Раҳматжон эди. Унга йўлни кесиб ўтиш учун атиги бир неча дақиқа етмади холос! Муслима ва онаси эса бўлган ҳодисадан саросимага тушиб, йўлида давом этишди.
 Инсон Аллоҳ таъолодан инъом этилган умрнинг ҳар бир куни, ҳар бир дақиқаси, ҳар бир сониясининг қадрига етиб яшамоғи керак. Умр бу – вақт! Вақт эса дақиқадан иборат. Дақиқа эса сониядир! Умрнинг ҳар бир куни, дақиқаси ва сониясининг қадрига етиб яшамоқ керак.

Муяссархон Ёдгорова, ҚМУ талабаси.