НАВОИЙ ЎЗ АСАРЛАРИ ТУФАЙЛИ ДОИМО БАРҲАЁТ

Алишер Навоийнинг адабий мероси фақат ўзбек адабиётидагина эмас, балки жаҳон адабиётида ҳам салмоқли ўринга эга. У шеъриятнинг 16 хил жанрида ижод қилган ва асарлари орқали инсонни қадрлашни, ҳимоя этишни, савоб ишларни қилишга даъват этган, юксак инсоний фазилатлар – вафо, садоқат, дўстликни қадрлашга чақирган. У давлат арбоби сифатида илм аҳилларига раҳнамолик қилди, эл маъмурлиги йўлида курашди.

Навоий яшаган даврдан бери беш асрдан кўпроқ вақт ўтди. Аммо шоир ижодининг қадр-қиммати пасаймади, ҳамон авлодларга маънавий қувват, улкан таассуротлар бахш этиб келмоқда.

Улуғ бобокалонимиз таваллуд топган сана муносабати билан 76-сонли мактабда туман Халқ таълими бўлими ҳамкорлигида ўзбек тили ва адабиёти фани ўқитувчиларининг касбий маҳоратини ошириш ва ўқувчиларнинг буюк аждодимиз Алишер Навоий ижодий меросига бўлган меҳрини янада ошириш мақсадида «Навоий доимо барҳаёт» деб номланган маънавий-маърифий кеча ўтказилди.

Тадбирга туманимиз мактабларида фаолият юритаётган ўзбек тили ва адабиёти фани ўқитувчилари ҳам иштирок этдилар. Улар дастлаб 5-Б синфда Роза Абдуллаеванинг, 10-синфда Мунаввар Болтабоеванинг шоир ҳаёти ва ижодига бағишланган очиқ дарсларида кузатувчи сифатида қатнашдилар. 1-сонли мактаб ўқитувчиси Дилноза Иброҳимова 5-А синфда Алишер Навоийнинг ҳаёти ва ижодига бағишланган маҳорат дарси ўтди.

Мактаб кутубхонасида очиқ дарслардаги ўқитувчилар маҳорати, эътибор берилмаган жиҳатлар хусусидаги муҳокамадан сўнг барча мактаб фаоллар залига йиғилдилар ва Алишер Навоий ҳаёти ва ижодига бағишланган адабий кечани томоша қилдилар.

Кечани туман Халқ таълими бўлими услубчиси Ўткир Матмуродов очди.

Буюк мутафаккир шоир ижодий мероси, уни ўрганишнинг аҳамияти ҳақида маъруза ўқилгач, навбат  мактаб ўқувчиларига берилди, 10-синф ўқувчиларининг Ҳусайн Байқаро ва Алишер Навоий сиймоларини гавдалантиргани, 5-синф ўқувчиларининг «Ҳайрат ул аброр» достонидан парчани саҳнада маҳорат билан ижро этгани томошабинларга жуда манзур бўлди.

Шунингдек, ўқувчилар ифодали ёд айтган беназир классик шоирнинг рубоийлари, ғазаллари, туюқлари барчада ўчмас таассуротлар қолдирди.

Тадбирга меҳмон сифатида ташриф буюрган 69-сонли мактаб бадиий ҳаваскор қизларининг ўзбек мумтоз куйларидан «Тановар»га рақсга тушгани тадбирга ўзгача руҳ бағишлади.

Улуғ аллома, давлат арбоби, тенгсиз адиб Алишер Навоий таваллудининг 580 йиллигига бағишлаб ўтказилган тадбир ўчмас таассуротларга бой бўлди, ўқувчиларнинг шоир ижодига қизиқишларини яна ҳам оширди.

Ойгул РАЖАБОВА.