ОНА ЮРТ ҲИМОЯСИГА МУНОСИБЛАР ТАНЛАНАДИ
Она Ватан тараққиёти, ҳимояси ҳамда келажаги учун энг аввало бугунги ёшлар масъулдир. Шунинг учун ҳам ҳар йили ҳарбий хизматга чақирув бўйича олиб бориладиган тадбирларга алоҳида эътибор қаратилиб, танлов Кенгаши томонидан жисмонан ва маънан етук, соғлом йигитлар ҳарбий хизматга саралаб олинади.
Айни пайтда туманимизда Ўзбекистон Республикасининг “Умумий ҳарбий мажбурият ва ҳарбий хизмат тўғрисида”ги Қонуни ҳамда Вазирлар Маҳкамасининг 2019 йил 9 апрель санасида қабул қилинган “Чақирилувчиларни танлаб олиш тўғрисида”ги Қарори асосида танлов Кенгаши томонидан туман Мудофаа ишлари бўлими билан ҳамкорликда 2021 йилги ҳарбий хизмат чақирувига тайёргарлик кўриш мақсадида танлов тадбирлари олиб борилмоқда.
Муддатли ҳарбий хизматга танлов тадбирлари 2020 йилнинг 10 август санасидан 2021 йилнинг 10 февраль санасигача давом этади. Танлов тадбирларида қатнашиш истагини билдирган ёшлар жуда кўп. Лекин Ватан ҳимоясига муносиб йигитларни саралаб олишда, аввало уларнинг жисмоний етуклигига, маънавий жиҳатдан савияси юксаклигига алоҳида эътибор қаратилади. Бундан ташқари, танлов тадбирларида 18 ёшдан 27 ёшгача бўлган 1994-2003 йилларда туғилган, аввал ҳарбий хизматда бўлмаган йигитлар иштирок этадилар.
Танловда, юқорида айтганимдай, аввало жисмоний тайёргарлик даражаси баҳоланади. Ушбу йўна-лишда юқори натижага эришган йигитлар билан якка тартибда суҳбат ўтказилиб, уларнинг маънавий-маърифий билим савияси синовдан ўтказилади. Унга кўра, ёшларнинг дунёқараши, фикрий ривожланиш жараёни, оилавий аҳволи ўрганилади ҳамда тарих фани, айниқса, Амир Темур тузуклари бўйича савол-жавоблар орқали интеллектуал салоҳияти қай даражада эканлигига аниқлик киритилади. Чунки якка тартибдаги суҳбат чақирилувчи ёшларнинг ҳарбий хизматга чақирувга муносиб ёки муносиб эмаслигини белгилашда муҳим аҳамият касб этади. Якка тартибдаги суҳбатдан ўтган ёшларгина Бутлаш комиссиясидан ўтиш ҳуқуқига эга бўладилар ва март-апрел ойларида тиббий кўрикдан ўтказилиб, Бутлаш комиссиясининг тавсиясига кўра, Республика раҳбарлар Кенгаши қарори билан муддатли ҳарбий хизмат командалари ҳамда қўшин турларида ҳарбий хизмат қилиш учун тайинланадилар.
Ўзбекистон Республикаси Қуролли Кучлари таркибини жисмонан бақувват ва маънан етук аскарлар билан бутлаш орқали Ватанимизнинг равнақи ва келажаги йўлида хизмат қилишга даъват этиш ва бу борадаги бурчимизни аъло даражада бажариш, она юрт ҳимоясига муносиб, ватанпарвар ёшларни тарбиялаш энг масъулиятли ва шарафли бурчимиздир.
Тоир БОЛТАЕВ,
туман Мудофаа ишлари бўлими Чақирув бўлинмаси бошлиғи.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
