ЮРТ ҲИМОЯСИГА МУНОСИБ ЁШЛАР ТАРБИЯЛАЁТГАН УСТОЗ

Тор ёп маҳалласидаги 51-сонли мактабнинг ҳарбий чақириққа тайёргарлик раҳбари, истеъфодаги ҳарбий офицер Давронбек Давлетмуродов айни пайтда ёшларга ҳарбий таълим бўйича бошланғич билимларни бериб келмоқда.

Мактабга 2021 йилдан ишга келган Давронбек ёшларни ватанпарварлик руҳида тарбиялаш, бошланғич ҳарбий таълимни ўргатишда соҳадаги кўп йиллик тажрибаси ва билимларидан унумли фойдаланмоқда. У дастлаб мактабда ажратилган алоҳида хонанинг машғулотлар сифатли ташкил қилиниши учун зарур кўргазмали воситалар билан жиҳозланишига эътибор қаратди. Газниқоб, махсус ҳарбий кийимлар, қурол-аслаҳалар макетлари каби зарур кўргазмали воситаларни келтирди. Синфда хотира бурчагини ташкил қилди ва унда Ватанимиз сарҳадлари дахлсизлигини таъминлашда ҳалок бўлганлар тўғрисида фотолавҳа ва маълумотларни жойлаштирди.

Таълим сифатини ошириш, жумладан, ёшларда ҳарбийликка ҳавасни кучайтириш мақсадида тумандаги ҳарбий қисмлар ва Мудофаа бўлими билан ҳамкорликни йўлга қўйиб, ҳарбийлар билан ўқувчи-ёшларнинг учрашувларини ҳам ташкил қилиб келаётган мактабнинг чақирувга қадар бошланғич тайёргарлик раҳбарига ўзининг ҳарбий хизмат мобайнидаги тажрибалари жуда қўл келмоқда.

Давронбек 2000-2004 йилларда Тошкент Олий Умумқўшин қўмондонлик билим юрти курсанти бўлди. Ўқишни тугатганидан сўнг, 2006 йилдан 2021 йилгача турли вилоятлардаги ҳарбий қисмларда масъулиятли лавозимларда хизмат қилди. Хизмат даври мобайнида “Мустақилликнинг 20 йиллиги” ва “Мустақилликнинг 25 йиллиги” эсдалик нишонлари билан тақдирланди. Ундан ташқари, бу ватанпарвар ҳарбийга бир неча бор Ўзбекистон Республикаси Мудофаа вазирлигининг Фахрий ёрлиқ ва миннатдорчилик хатлари ҳам топширилди. Отаси Хўжамурод ака ва онаси Ўрозгул опаларга ҳам 2018 йилда Жануби-Ғарбий ҳарбий округ қўмондонининг ташаккурномаси берилганида Ватан корига ярайдиган мард ўғлон вояга етказишганидан жуда фахрланишган эди.

Ҳарбий соҳада самарали хизмат қилиб, истеъфога чиққан Давронбек туман Мудофаа бўлими томонидан ёш авлод таълим-тарбиясига ҳисса қўшишга жалб этилганидан сўнг, ўз билим ва тажрибаларини ўқувчиларга ўргатишни шараф деб билди. У айни пайтда ўзи фаолият кўрсатаётган мактабда назарий ва амалий машғулотлар ташкил этиш билан бирга “Ёш қутқарувчи”, “Темурбеклар” сингари танловларни ҳам ўтказиб, ўқувчилар эгаллаётган билимларни синовдан ўтказиб бормоқда.

Ҳарбий хизматчилар ҳаёти билан яқиндан таништириш мақсадида тумандаги ҳарбий қисмларда ўтказиладиган "Очиқ эшиклар куни" тадбирларида ҳам мактаб ўқув-чиларининг иштирокини таъминлаб, улар қалбидаги юртга муҳаббат ва бурчга садоқат туйғуларини мустаҳкамламоқда. Ўқувчилар ҳам чақириққа қадар бошланғич тайёргарлик кўникмаларини шакллантираётган, ҳарбийликка қизиқишларини ошираётган, қалбларидаги ватанпарварлик туйғуларини янада мустаҳкамлаётган устоздан жуда миннатдор.

Мамлакат келажагини яратишда шижоатли, қатъий ва мақсадни аниқ қўйиб, шу асосда ҳаракат қиладиган ёшларнинг ўрни катта. Шу сабабли 51-сонли мактабнинг ҳарбий чақириққа тайёргарлик раҳбари Давронбек Давлетмуродов ёш авлоднинг юрт ҳимоясига муносиб, мард ва жасур, ҳақиқий ватанпарвар бўлиб камолга етишига ҳисса қўшиб, ҳарбийликка доир билимларни мукаммал ўргатишга ҳаракат қилмоқда.

Озода Худойберганова.